بیر یای آخشامی
کمال عبدالله – کؤچورن: محمد صبحدل
باغ مؤوسومو ایدی. برکتلی توت آغاجینین آلتینداکی چمنلیکده بیر یای آخشامی اوچ قیز و دؤرد اوغلان دؤوره ووروب بارداش قورموشدولار. اورخان ایسه ائیواندا اوتوروب، گویا کی، کیتاب اوخویوردو، آمما کیتابدان چوخ تنبل-تنبل بو «گنجلره» گؤز یئتیریب هانسی هنگامه‌دن چیخاجاقلارینی گؤزله‌ییردی. دؤوره‌نین اورتاسینا تاختا بیر تاباق قویدولار. ایچی بوش پیوه شوشه‌سی تاپدیلار، اونو دا گتیریب قویدولار بو تاباغین اوستونه. دئیه‌سن، حاضیرلاشیردیلار شوشه‌نی فیرلاتماغا.
بو اویوندا کیمین هاردا و کیمین یانیندا اوتورماسی، گؤرونور، چوخ اؤنملی ایدی. اورخانین قارداشی قوشقارین، بیر یاخین دوستو واردی – شاهین، بو ایل عالی مکتبه قبول اولوب بیر نئچه گونلویه اورخانین باغینا قوناق گلمیشدی، بو مسئول ایشله بؤیوک جانفیشانلیقلا او مشغول اولوردو. آمما اویونا باشلاماق اوچون لازیم اولان میزان هئچ جور آلینمیردی. اونو اوردا اوتوردوردو، دوروب یئرینی ده‌یَیشیردی، بونو بوردا اوتوردوردو، بو دا ائله.
نهایت، شاهینین گوجو اونا چاتدی کی، هامینی تاختا تاباقدان عئینی مسافه‌ده ا‌یَلشدیردی. قیزلار ایکی آیاقلارینی بیر باشماغا دورتوب بیر-بیری‌نین یانیندان آیریلمادیلار. اونلاری آییریب آرالارینا اوغلان «سوخماق» شاهینه «قیسمت» اولمادی. فوضولی دئمیش، «اوچ صف قیز اوتوردو، اوزبه‌صورت ده اوچ صف اوغلان…» گرک کی، داهی شاعر بئله دئمیشدی. بلکه ده بئله دئمه‌میشدی.
اویونون مغزی ایسه بوندا ایدی. هامی دؤوره ووروب اوتوراندان سونرا پیوه شوشه‌سینی تاباغین هامار اوستونده فیرلاتماق لازیم ایدی. پیوه شوشه‌سی فیرلانیب-فیرلانیب، نهایت، آغزی کیمه طرف دوراردیسا او، آیاغا قالخیب دؤوره‌ده‌کیلرین هانسینی ایسته‌سه اؤپه بیلردی. البته کی، اوغلانلار کیمی اؤپه‌جکلرینی بری باشدان یاخشی ازبرله‌میشدیلر. آدام بیلمیردی، بونا اوشاق اویونو دئسین، یا کی، بؤیوک اویونو؟!
اورخان دوشونوردو: «بیزیم واختیمیزدا بیز بئله اویونلار اوینامیردیق. مکتبده اوخودوغوموز زامان قیزلارلا ان ایستی تماسیمیز «ال-اله» اویونو ایدی. الین اله توخونماسی بیزیم اوچون آرتیق سیرر ایدی. هامیمیز بیر-بیری‌نین دالینجا ایکی-ایکی، ال-اله توتوشوب دایانار، اللریمیز بیر یئرده گؤیه قالخاردی. طرف-موقابیلی اولمایان بیری گلیب بو گؤیده بیر-بیریندن برک-برک یاپیشان اللرین تونئلی آلتیندان کئچیب اوره‌یَی ایسته‌ین بیرینی سئچر، اللری بیر-بیریندن آییرار، سئچدییی‌نین الیندن توتوب گئدیب تونئلین آخیریندا اونونلا دوراردی. عادتن اوغلان قیزی سئچردی، قیز اوغلانی. سونرا نؤوبتی دفعه کیم تک قالاردی سا اییله-اییله گلیب تونئلدن بو دا کئچردی. بئله‌جه، ساعتلارلا یورولمادان، های-کویله «ال-ال» اویونو داوام ائدردی. بو اویونلا باغلی غریبه و عزیز خاطیره‌لر وار. «الیم اونون الینه ده‌یَیب…» دئیه خوشبخت اولان و الینی ایکی گون یومایان واردی، سئودییی‌نین باشقاسی ایله ال-اله وئردییینه گؤره داوالارین دوشمه‌سی واردی، آشکار سیرلر اونسوز دا آشکار ایدی، گؤزله‌نیلمز حالدا کیمین کیمی سئچمه‌یینه گؤره گیزلینلرین اوزه چیخماسی واردی، غرض، اویوندان سونرا صینیفده‌کی دسته‌لر آراسیندا صؤحبتلر، موذاکیره‌لر گونلرله بیتمک بیلمزدی.»
…بو یئددی نفردن اوچو قیز ایدی و اونلارین اوچو ده اورخان‌گیلین باغ قونشولاری ایدی. اورتا مکتبین یا دوققوزونجو، یا دا اونونجو صینیف شاگیردلری ایدیلر. اوغلانلاردان بیری اورخانین قارداشی قوشقار آرتیق اینستیتوتون اوچونجو کورسوندا حکیملیک اؤیره‌نیردی، اونون دوستو شاهین ایسه تزه‌لیکجه عالی مکتبین طلبه‌‌سی اولموشدو. او دا حکیم اولاجاقدی. او بیری قونشو موصطافا کیشی‌نین بالاجا نوه‌سی ازیش ایدی، اؤزونون ده لقبی واردی: جوللوت. بو بیر اود-یالوو ایدی، اؤزوندن بؤیوک اوغلانلارین آراسینا اؤزونو سوخسا دا، هئچ بیر دله-دوزلوقدا اونلاردان گئری قالمیردی. هه، بیر ده؛ مک دونالدز چاغیردیقلاری (نه اوچون، نییه؟؟) بیری واردی. اونو اورخان او قدر ده یاخشی تانیمیردی. گؤزلریندن جین یاغیردی، دانیشاندا دا آغزینی ا‌یه-ا‌یه دانیشیردی، ائله بیل، آغزینین ایچینده داش واردی. آغزینی آچان کیمی ائله بیلردین، گولور. آمما سونرالار گؤردولر کی، آغزینداکی داش دئییل، ایری دیشلرینی دوزلتمک اوچون دیشلری‌نین اوستوندن تاخدیغی پروتئزدیر.
قیزلار اورخان اوچون داها ماراقلی ایدیلر. محلله‌ده بیر دسته قیز واردی. آدام گؤردویونده چاشان بو قیزلار اورخان‌گیلین داریسقال باغ یولونون ساغینداکی و سولونداکی باغ ائولرینده یاشاییب، بوتون یایی بو اورک اوزن باغ یئرلرینده کئچیرمه‌یه محکوم اولونموشلاردی. آرتیق یاواش-یاواش پوخته‌لشمه‌یه، اه‌یین-باشلارینا، انلیک-کیرشانلارینا فیکیر وئرمه‌یه باشلایان بو گؤزلچه‌لر دونیانین هانسی شهرلرینده، هانسی اه‌یلنجه یئرلرینده اولماق ایسته‌مزدیلر؟! بؤیوکلرین اویونلارینا گیرن واختلاری چاتمامیشدیمی؟! خیاللاریندا نه‌لر قورموردولار؟! کیملری اؤزلرینه مفتون ائتمیردیلر؟! آمما! آمما و لاکین اونلار اوزون و قیزمار یایی بو باغلاردا اوتوروب انجیر-اوزوم یئمه‌یه مجبور ایدیلر. «باکی – آبشئرون» یولو اونلارین، هله کی، یئگانه مارشروتو ایدی. ان ماراقلی اه‌یلنجه دنیز و بو جور اوغلانلی-قیزلی توپلانتیلار اولوردو. صباحدان آخشاما کیمی اورخانین باغینین قاپیسینا یاخین اوزبه‌اوز سکامیالاردا اوتوروب داریخا-داریخا توم چیرتلاییر، گیج-گیج صؤحبتلری‌له اونلاردان زلی کیمی، میلچک کیمی ال چکمه‌ین اوغلانلارلا، داها چوخ ایسه بیر-بیری ایله سونسوز-سایسیز، هر شئیدن و هئچ نه‌دن صؤحبتلر ائدیردیلر. آخشام طرفی اورخان شهرده‌کی ایشینی بیتیریب باغا قاییداندا بو قیزلار اونو آز قالا «اوررا» ایله قارشیلاییردیلار. ماشینی دار داروازادان بیر آز ال-قول ایله، داها چوخ «ساغا، سولا، ایستوپ، ساخلا، ساخلا!» باغیرا-باغیرا حیطه سالماغا کؤمک ائدیر، سئویملی اورخانی احاطه‌‌یه آلیر، ال-آیاغینا پیشیکلر کیمی دولاشا-دولاشا ماشیندان دوشمه‌یی‌نی بئله گؤزله‌مه‌دن ایکی داشین آراسیندا گونون واجیب حادیثه‌‌لرینی تله‌سیک، بیر-بیری‌نین سؤزونو کسه-کسه اونا خبر وئریردیلر. بو قیزلار اورخاندان خئیلی کیچیک اولسالار دا اونون اصل دوستلاری ایدیلر. اونو بؤیوک سئوینجله قارشیلاییر، اوز-گؤزلرینده ده بو یازیلیردی: «نه یاخشی بو گون تئز گلدین، اورخان دایی، اؤلدوک بیز، آل بیزی بو مالچیشکالارین الیندن…» مالچیشکالار اونلاردان ایکی-اوچ، بلکه ده دؤرد-بئش یاش بؤیوک ایدیلر.
– …اؤلدوردولر بونلار بیزی. تصووور ائدیرسن، اورخان دای، بیتلزلاری تانیمیرلار…
– بیز تانیمیریق؟! آی-های! «تانیمیریق…» بیز سیزی دولاییردیق.
–تانیمازلار، اینانیرام، تانیمازلار. اونلار هئچ دون کیخوتو دا تانیمیرلار. – طبیعی، اورخان قیزلارین طرفینده ایدی.
– آی-یای-یای… دوغرودان دئییرسن؟؟؟ –تعججوبلری چوخ «صمیمی» آلینیردی. کناردان باخان ائله بیلردی کی، بونلار دون کیخوتو تانیییرلار.
– هَری، البتته کی، «آی-یای-یای».
…و ایندی، آخشامین بو آخشام چاغی، اؤزو ده اولا بئله بیر یای آخشامی، اوغلانلارلا اؤپوشمه‌یه حاضیرلاشان بو قیزلار اورخانین تانیدیغی قیزلارمی ایدی؟! اونا ائله گلدی کی، ایندی توت آغاجینین آلتینداکی بالاجا چمنلیکده دؤوره ووروب اوتورموش، پیققیلداشا-پیققیلداشا بیر-بیریله باخیشان بو اوچ قیز هانسیسا درین بیر مقصد اوغروندا چالیشان اؤن کشفییات دسته‌سی‌دیر.
باشچیلاری حلیمه آدلی یاراشیقلی بیر قیز ایدی. اونون ایکی طرفینده ایسه بیزیم قاپینین آغزیندان ال چکمه‌ییب سحردن آخشاما قدر توم چیرتلایان ایکی یؤندمسیز قیز رفیقه‌سی اوتورموشدو. حلیمه او بیری رفیقه‌لریندن هم یاراشیغی ایله سئچیلیردی، هم ده داها ساده گئییمی ایله. اؤزو ده یاشیندان بؤیوک گؤرونوردو. ائله بیلردین، عالی مکتب طلبه‌‌سی‌دیر. البته کی، باشدا قوشقار اولان بو «لوطولارین» اویونلا باغلی اصل مقصدی بللی ایدی – حلیمه! اوغلانلارین اوزونه باخاندا کیمین اوچون آغیزلارینین سویونو آخیتدیقلارینی آنلاماماق مومکون دئییلدی. بو بیری ایکی قیز ایسه اصل «ساتدیق مالا» علاوه (یاماق) ایدیلر. حلیمه‌نین اوزونده-گؤزونده، بوتون ووجودوندا… سؤزگلمه‌ین بیر جاذیبه واردی. آزاجیق خام باخان باخیشلاری، آمیرانه دانیشیق و حرکت طرزی، هردن اوتانماز-اوتانماز، هردن ایسه یالانچی اوتانجاقلیقلا باخان یاشیل گؤزلرینی دانیشدیغی، آمما داها چوخ موباحیثه ائتدییی آدامین دوز گؤزلری‌نین ایچینه زیلله‌ییب اونون بئینینه «من… بویام… سن… منیم… اوستونلویومو… قبول ائتمه‌یه… بیلمزسن… بیلمزسن… اؤلسن ده… منی… بَینمه‌یه… بیلمزسن…» سؤزلرینی آیری-آیریلیقدا، جسارتله گؤندرمه‌سی حلیمه‌نی بوتون اطرافدا غئیری-رسمی «پریمادوننا» ائتمیشدی. هامینین یانیندا اورخانلا همیشه آز قالا ارکله دانیشان، اصل ائنئرژی داغارجیغی اولان حلیمه قیزلارین غئیری-رسمی «دوعایئنی» ایدی. اورخانی «آغلاییب-سیسقاییب» (اصلینده، نازلانیب) «بیرتهر» راضی سالاراق، بعضی آخشاملار بالاجا ماشینینا ان آزی یئددی-سککیز قیز ییغیب دنیزه چیممه‌یه آپارماغا مجبور ائده بیلن یئگانه قیز او ایدی. بیچاره اوغلانلار بو زامان اوست کؤینکلرینی چیخاریب باشلاری اوستده یئلله‌یه-یئلله‌یه ماشینین دالینجا «کیم کیمی اؤتدو» دئیه لهله‌یه-لهله‌یه قویوردولار اوستونه، نه قویوردولار — «ساعتدا یوز ایییرمی ایله».
…اورخانین بو واختاجان یادیندا دقیق قالان اودور کی، بو حلیمه اونو تکلیکده گؤرنده یاناقلاری قیپقیرمیزی قیزاریر، قاشینین بیری تعججوبله یوخاری دارتیلیردی. نه دینیردی، نه ده دانیشیردی. اوول-اوول اورخان بونون فرقینده دئییلدی. بیر موددت کئچدی. اورخان بونون فرقینده او زامان اولدو کی، تکلیکده حلیمه ایله قارشیلاشاندا باشلادی حیسس ائله‌مه‌یه کی، اونون اؤزونون ده یاناقلاری بئله تک‌به‌تک گؤروشلر زامانی آغیرلاشیر، ایسینیر.
…اورخانین خالاسی ایچری‌دن بیر ایستکان چای گتیریب قویدو اونون قاباغینا. سونرا سسلری-کویلری باغی باشینا گؤتورموش اوشاقلار طرفه دقتله نظر یئتیریب:
– آ بالا، بونلار یئنه نه اویون چیخاریرلار؟ وای،وای، وای… – و بیر جاواب گؤزله‌مه‌دن یئنه دؤنوب گیردی ائوه.
– هله بو هاراسیدیر؟!.. – اورخان اونون آرخاسینجا یاواشدان ائله سسلندی کی، خالا ائشیتمه‌سین.
دؤرد اوغلانین دؤردو ده، کیچیکلی-بؤیوکلو، عمللی-باشلی «قیزمیشدی». اورخان گؤروب حیسس ائدیردی کی، قیزلاردا دا بیر بالاجا گرگینلیک وار، آمما اونلارین هیجانی کیفایت قدر دریندیدی. اوغلانلار ایسه… آشیب-داشان حیسلرینی هئچ جور گیزله‌یه بیلمیردیلر. اوندان، عادتا، چکینن بو «مالچیشکالار» ایندی اورخانی عمللی-باشلی اونوتموش، قان اییی آلان آکولالار کیمی اوولارینین اطرافیندا بئله‌دن-بئله، ائله‌دن-ائله اوزوشوردولر.
حزین یای آخشامی ایدی. هاوادا لذذتلی بیر سرینلیک واردی، اولا بیلردی کی، خزری باشلاسین، آمما ایندی باشلامازدی، گئجه — بلکه… یای آخشاملارینین «عزیز» قوناغی اولان آغجاقانادلار نه اوچون‌سه همین آخشام یوخ اولموشدولار. بئله واختلاردا قوشقار دئییردی: «وئرتولیوتلار» بو گون اوچوشا چیخماییب…
حلیمه اوز-گؤزونده گویا ایسته‌مه‌یه-ایسته‌مه‌یه، بیر بالاجا دا نوماییشکارانه شکیلده ایکی قیزین آراسیندا بارداش قوروب اه‌یله‌شدی، بو زامان اونون آلابزک تومانینین اتکلری چکیلیب دیزلریندن خئیلی یوخاری قالخدی. اطرافداکیلاردان هئچ کیم، دئیه‌سن، بونا فیکیر وئرمه‌دی. او بیری قیزلار دا سربست اوتورموشدولار، آمما اونلار تئز-تئز تومانلارینی دیزلرینه طرف سوروشدوروب آیاقلارینی «اؤرتمه‌یی» یاددان چیخارمیردیلار. حلیمه بونو ائتمیردی. اورخانا ائله گلدی کی، بو ساعت حلیمه آنادان گلمه چیلپاق اولسایدی بئله، یئنه کیمین سه اونون بدنینه باخیب-باخماماغی وئجینه اولمایاجاقدی، او بونو ساده‌جه، حیسس ائتمه‌یه‌جکدی. اونا ائله گله‌جکدی کی، بدنی آغاج کیمی، داش کیمی، اولدوز کیمی، آی کیمی… نه بیلیم داها نه کیمی بیر شئیدی، کیم باخیرسا باخسین، آغاج، داش، اولدوز، آی کی بونو حیسس ائتمیرلر….
بیردن، «نه منه، نه سنه»، اورخانین اؤزونون-اؤزونه برک آجیغی توتدو. او، بو بویدا کیشی، نییه هاییل-ماییل اولوب گؤزلرینی بو یاراشیقلی قیزین گؤزل، یومرو دیزلریندن، قارالمیش، عضله‌‌لری تاریما چکیلمیش بالدیرلاریندان آییرا بیلمیر؟! حلیمه‌نین گنجلیک طراوتی ایله دولو آرامسیز، ساققیز قوخولو سرت نفسی آرالارینداکی آلتی-یئددی مئتیرلیک مسافه‌نی قطعییتله کئچیب گلیب اورخانین اوزونه توخونور، ساچلارینی تومارلاییر، سونرا بورنونا، آغزینا دولوب اونو بیهوش ائدیردی. بیردن اورخانا ائله گلدی کی، حلیمه نه دانیشیرسا، کیمینله دانیشیرسا، حقیقتده بو بئله دئییل، حقیقتده حلیمه یالنیز اونونلا دانیشیر. اطرافدا هئچ کیم، هئچ کیم یوخدور. آلتدان-آلتدان او آنجاق اورخانا باخیر، اوزونه-گؤزونه تؤکولن قاپ-قارا ساچلارینی اوزوندن الی ایله ییغمیر، اورخانین خوشو گلسین دئیه کینوداکی قادینلار کیمی دوداقلارینی بوزوب اونلاری آشاغیدان یوخاری اوفله‌ییر. مرمر کیمی هامار، چیلپاق آیاقلارینی دا بو قیز آنجاق اورخان اوچون بئله‌جه‌نه آچیب قویوب…
بو سون فیکیر بئینیندن کئچمیشدی کی، غفلتن آییلدی. «دایان، ظالیمین اوغلو، دایان! هارا زیلله‌میسن، آی سنی، یاراماز، گؤزونو؟! اولماز! هئچ اولماز! بیردن کیمسه حیسس ائلر، گؤرر کی، سن بو اوشاغا بئله باخیرسان، عاییبین عاییبی اولار.» اورخان اؤزونو بؤیوک بیر گوناه توتموش آدام کیمی حیسس ائتدی، گؤزلرینی قاچیریب تله‌سیک کیتابا دیکدی و آوتوماتیک اولاراق قارشیسینداکی چایدان بیر قورتوم آلدی. چای سویومامیشدی، اورخانین آغزی عمللی-باشلی یاندی.
اوغلانلار اوجادان دئییب-گولور، اوتانمادان اللرینی اللرینه سورتوردولر. قیزلارین وضعییتی ایسه موعممالی ایدی، اویون اونلارین سانکی بویونلارینا دوشموشدو. آمما گئری ده چکیلمک ایسته‌میردیلر. شاهماتداکی کیمی پات وضعییتی یارانمیشدی. اویونچولار قایدالاری تام موعیینلشدیره بیلمه‌دیکلریندن اویون هله ده باشلانمیردی.
– بلکه بئله ائدک؟! شوشه‌نین آغزی کیمه دوشسه، او… توت آغاجینا دیرماشسین. یوخ، قوی او، شئعر دئسین… — قیزلار سون موقاویمت گؤسترمه‌یه جهد ائتدیلر.
جهد ضعیف ایدی، البته کی، نتیجه وئرمه‌دی. «آکولالار» هئچ بیر کومپرومیسه دوغرو «اوزمک» نیتینده دئییلدیلر، اونلار آمانسیزجاسینا یالنیز بیر شئی طلب ائدیردیلر: «اؤپوش! اؤپوش! آنجاق اؤپوش!!! اویونون اؤز پوزولماز قایداسی وار، اونو ده‌یَیشمک اولماز!» بو طلب اونلارین دویونلنمیش قاشلاریندا، حدقه‌سیندن آز قالا چیخان گؤزلرینده آچیق-آشکار یازیلمیشدی.
قیزلار یئنه بیر-بیریله باخیشدیلار: «بونلاردان‌می چکینه‌جه‌ییک؟! آی-های…»
– باشلایاق؟ – قوشقارین دوستو شاهین سوروشدو. – یوخسا…
– قورخما قیزیم، سیزی بوردا هئچ کیم یئمه‌یه‌جک… — بو اداباز سؤزلری ایسه بالاجا جوللوت دئدی. اوغلانلار هیریلدادیلار.
دئیه‌سن، جوللوتون بو سؤزلریندن سونرا حلیمه‌نین اوز-گؤزونه سرت بیر ایفاده قوندو، قاشلاری چاتیلدی:
– باشلایاق! – حلیمه آلت دوداغینی بوزوب ایره‌لی گتیردی، ساچی بو دفعه اوزونه دوشمه‌سه ده باشینی گئری آتاراق آشاغیدان یوخاری برکدن اوفله‌دی و آلتدان-آلتدان یئنه ده من طرفه نظر سالدی. «باشلایاق» سؤزونو ائله قطعییتله دئدی کی، سانکی کیمینله‌سه اؤلوم-دیریم ساواشینا گیره‌جکدی، سانکی اوغلانلارین بیلمه‌دییی نَه‌یی ایسه او بیلیردی. اونون قطعییتی او بیری قیزلارا دا کئچدی.
– باشلایاق. کیم بیرینجی فیرلادیر؟..
– سیز فیرلادین. – مک دونالدز ایریشه-ایریشه، گویا، ژئست ائله‌دی و، گویا، خلوته سالیب قوشقارا بیج-بیج گؤز ووردو. اورخان اوتوردوغو بالکوندان بو سیرتیق ایریشمه‌نی آچیق-آیدین شکیلده گؤردو. اتی تؤکولدو.
شوشه‌نین بیرینجی فیرلانیشی چوخ چکمه‌دی. دؤرد-بئش دؤوره… و شوشه‌نین آغزی حلیمه‌نین ساغ طرفینده اوتورموش قیزی توپ آغزی کیمی نیشان آلیب دایاندی. قیز اؤزونو ایتیردی.
«اوه… اوه… اوه… آه… آه…آه… ها-ها-ها…» و باشقا بونا بنزر جنگل‌لیک سسلری چمنلییی بورودو. ان چوخ دا، آیدین مسئله، اوغلانلارین سسی ایدی. قیزلار یئنه ده بیر-بیری ایله آنی باخیشدیقدان سونرا هدفده‌کی چیل-چیل قیز آیاغا قالخدی، اول ساغینا، سونرا سولونا باخدی، گویا هئچ کیمی تاپمادی، یعنی، لاییق بیلمه‌دی، تزه‌دن یئرینه اوتوردو. چیینیندن قوجاقلاییب حلیمه‌نین یاناغیندان اؤپدو. بو دفعه قیزلار گولوشدولر.
– اولمادی! واللاه، اولمادی!.. یانینداکینی اولماز. – بیر بهانه تاپا بیلمه‌ین قوچاقلار پارتلادیلار، قطعییتله اعتراض ائتمه‌یه باشلادیلار، چونکی، آنلادیلار کی، بئله گئدرسه «ایدئیا» محو اولا بیلر.
حلیمه ال-قول آتا-آتا داغ شلاله‌سینی خاطیرلادان گور سسی ایله اونلارین سسینی چوخ آسانلیقلا باتیردی:
– نییه، نییه اولماز؟؟ ائله اولار کی… کیمی ایستر، اونو دا اؤپر!
اورخانین قولاغی عکس-صدا «رئژیمینده» ایشله‌مه‌یه باشلادی. «کیمی ایستر… اونو دا اؤپر… اونو دا اؤپر… اونو دا… اؤپر…اؤپر…اؤپر…»لرین سایی-حئسابی یوخ ایدی.
شاهین یئنه سوکانی الینه آلماق ایسته‌دی، آز قالا قیشقیردی:
– اویونون معناسینی ایتیریرسیز… اولماز کی…
سسلرینی ده زحمت چکیب قیسمیردیلار. آرتیق اورخانین بالکوندان بونلاری ائشیدیب-ائشیتمه‌مه‌یی‌نین هئچ بیر اهمییتی یوخ ایدی. بؤیوک-کیچیکلییین باشقا واخت کسکین جیزیلان سرحدلری ایتمیشدی.
– البته، بئله گئتسه، اویونون معناسی قالمیر، ائح…
– نییه کی، یاخشی قالیر. – قیزلار تسلیم اولماق ایسته‌میردیلر. — کیم کیمی ایسته‌سه اؤپسون. سیز ده ائله ائله‌یین.
حلیمه بو سؤزلری سؤیله‌ین چیل-چیل قیزین اته‌ییندن چکدی. اه‌ییلیب قولاغینا نه‌سه پیچیلدادی، ایکیسی ده پیققیلدادی.
جوللوت حیرصینی شاهینین اوستونه تؤکدو:
– سن ده فیرلادیرسان بونو، یاخشی فیرلات دا…
شاهین قوشقارا گؤز ووردو: «داریخما…»
قوشقار داها حیله‌‌گر ایدی، حلیمه‌نین سون سؤزلریندن توتوب بوراخمادی:
– نولار، دوز دئییرلر، کیم کیمی ایسته‌سه اونو دا اؤپسون.
– سونرا بیزدن اینجیمه‌یین… — بو معناسیز سؤزلری ایسه مک دونالدز دئدی و بئله‌لیکله، بو هیند سئریالینین بیرینجی سئرییاسی بیتدی.
بو دفعه شوشه‌نی جوللوت ائله برک فیرلاتدی کی، اوشاقلار اوچون، ائله اورخانین اؤزو اوچون ده بو، بیر عؤمور قدر اوزون گلدی…
…هر شئیی اونوتموشدولار. اؤپوشون بیری بیر قپیک ایدی. اوغلانلارین هامیسینین «اوره‌یی یئرینه گلدی»، هامیسی حلیمه‌نین اوستونه جوموردو. حلیمه‌نین یاناقلاری اؤپوشلردن آللانمیشدی. آمما غریبه اولان باشقا ایدی. حلیمه اؤزو هئچ جور شوشه‌نین آغزینا توش گلمیردی. نهایت، بو، اویونداکیلارین دا دیققتینی جلب ائله‌دی.
«بو قیز، گؤره‌سن، کیمی اؤپه‌جک؟!» اورخان نه قدر چالیشیردی، بو معناسیز سؤزلری باشیندان چیخارا بیلمیردی.
آخیردا مسله‌نی جوللوت «حل ائله‌دی». شوشه‌نین آغزینی، دئمک اولار کی، گؤز گؤره الی‌له حلیمه‌یه طرف چئویردی. قیزلار «اوه» ائله‌ییب ایسته‌دیلر، های-کوی قالدیرسینلار، آمما حلیمه کی، دوداغینی دیشله‌ییب دینمه‌دی، بونلار دا چوخ درینه گئتمه‌دیلر. هارداسا، عدالت اؤز یئرینی توتموشدو، بو قدر واخت کی، بونلار اویون اویناییردیلار، «یازیق» حلیمه اؤز حوسن-رغبتینی، هله کی، بیلدیرمه‌یه ایمکان تاپمامیشدی. هامی اونون اوچون بئله بیر فورصت یارانماسینا سئویندی.
– تبریک! تبریک! – نه‌دن‌سه، حتی قیزلار دا سسلرینی باشلارینا آتیب قیشقیریشدی. بیلینمیردی، کیم کیمی و نه اوچون تبریک ائدیر.
اورخانین ایندیکی کیمی همن صحنه گؤزونون قاباغیندادی. او بو گون ده هر شئیی آیدیندان آیدین خاطیرلاییر. اونا گؤره بئله آیدین خاطیرلاییر کی، اصلینده، اونوتدوغو گون اولماییب.
…حلیمه، یاواشیدیلمیش کادرداکی کیمی تلسمه‌دن، یاواش-یاواش آیاغا قالخیر. یئنه ده یاواش-یاواش دؤوره ووروب اوتورموش و اورکلرینده مین بیر دیل‌له آللاهلارینا یالواران اوغلانلارین آرخاسیندان کئچیر. و حلیمه… اورخان اوتوران بالکونا طرف یؤنه‌لیر.
بودور، اورخانین گؤزلری اؤنونده ماراقلی کادرلار بیر-بیرینی عوض ائدیر: مک دونالدز گؤزلرینی برک-برک یوموب، شاهین عصبی-عصبی ایریشیب آیاقلارینی وار گوجو ایله قاشیییر. جوللوت قوللارینی سینه‌سینده چارپازلاییب یئرینده‌جه دیکه‌لیب و دونوب. قوشقارین اوزونه قونموش او جیددی ایفاده‌نی ایسه اورخان سونرالار بیر داها گؤرمه‌دی.
…حلیمه قاچا-قاچا گلیب دوز اورخانین قارشیسیندا دایاندی. اورخان هله ده بیر شئی آنلامادان آغیر-آغیر آیاغا قالخدی. اونلار اوزبه‌اوز دایاندیلار و اورخانا ائله گلدی کی، اونلارین اورکلری بیر-بیری‌نین دؤیونتو سسینی ائشیدیر. بیر آن‌می کئچدی، مین ایل‌می کئچدی؟! قیز باخیشلارینی اوندان قاچیراراق دریندن بیر «آه» چکیب اللرینی اورخانین بوینونا دولادی و دوداقلارینی برک-برک دایادی اورخانین اوزونه. دوداقلارینین یاریسی اورخانین دوداقلارینین اوستونه دوشدو، آمما بو، چمنلیکدن اونلارا ماددیم-ماددیم باخانلارین گؤزوندن اوزاق، گیزلی شکیلده باش وئردی.
اونلارین هامیسی — گنج، دیری‌باش، عاغیللی قیزلار و اوغلانلار اؤزلرینه او قدر اینانیردیلار کی… حیات یاخین و اوزاق گله‌جکده اونلار اوچون نه حاضیرلاییردی؟! «باکی – آبشئرون» مارشروتوندان بئزیب هله دونیایا سپه‌لنمه‌یه ماجال تاپمامیش بو نور پارچالارینی یاخین، اوزاق گله‌جکده نه گؤزله‌ییردی؟! کیم بونو بیلیردی؟! همن یای آخشامی ایسه اونلار خوشبخت، آسوده، قایغیسیز ایدیلر. حیات هله اونلارلا اؤز ظارافاتینی ائله‌مه‌میشدی. هله‌لیک برکدن و اورکدن گولوشوردولر و نه‌دن‌سه هامیسی بیر یئرده ائله برکدن چپیک چالدیلار کی، حلیمه اورخانی اؤپندن سونرا پؤرتموش بیر حالدا، اصل غالیب اداسی ایله بالکوندان ائنیب اونلارین یانینا قاییداندا…
اون بئش ایل اوولین حادیثه‌‌سینی اورخان بو گون نییه خاطیرلادی؟! هر شئیین بیر معناسی وار. بو گون ایشدن چیخیب آوتوبوس دایاناجاغینا طرف گئدنده قارشیداکی «باهالی» ماغازادان بیر خانیم چیخدی، اونلار اوزبه‌اوز گلدیلر. چوخ یاراشیقلی بیر خانیم ایدی. زنگین گئییمی واردی. دیققتلی باخیشلارینی اورخانین اوزونده ساخلاماسی آرتیق یاشلانمیش، ساچلاری آغارماغا باشلایان بو، عادتن، قادینلارا موناسیبتده احتیاطلی کیشینی جسارتلندیردی و او، اورکک بیر سلام وئردی. نه اولار، اولار. اوزاق-باشی نیفرتلی بیر باخیش آلتیندا اؤتوب کئچه‌جکدی.
— سلام… – قادین سلامی آز قالا سئوینجک آلدی و آیاق ساخلادی.
اورخان سوال دولو گؤزلرینی قادینین اوزونه زیلله‌دی. قادین اورخانی اونون آلیشمادیغی بیر شفقتله، غریبه بیر جان-یانانلیقلا سوزوردو. اؤزو ایسه بیر سؤز دئمیردی، ائله بیل، گؤزله‌ییردی، اورخان نه ایسه دئسین.
– بئله… نئجه‌سینیز؟
بوندان عاغیللی بیر شئی تاپیب دئمک اونون عاغلینا گلمه‌دی. قادین اورخانین چاشقینلیغینی گؤروب اونو تانیمادیغیمی درحال باشا دوشدو، قطعیین پرت اولمادی، آمما بوتون یاراشیقلی چؤهره‌سینی صمیمی بیر تأسف ایفاده‌سی بورودو:
– اورخان دا قوجالارمیش… — اونون یومشاق سسی نوازیشله دولو ایدی.
«آها، نه یاخشی…» اورخانین اوره‌یی گوپپولدادی، «دئمه‌لی، تانیشیق. نه ایسه دئمک، دانیشماق لازیمدیر، سوسماق اولماق، اولماز… »
– سیز… سیز… – یئنه ده دیلی توپوق ووردو، بیلمه‌دی، سؤزونو نئجه داوام ائتسین. – یادیما سالا بیلمیرم. سیز…
قادین اوزونده همن تبسسوم باشینی یئلله‌ییب، یعنی، «سنه گووندیییم داغلار…» اورخانین یانیندان کئچدی. اورخان حیاتی بویو بیر چوخ فورصتلری الدن وئرمیشدی. بو فورصتی ایسه الدن وئرمک اولمازدی، هئچ اولمازدی. آرخاسینجا دوشوب نه ایللاه ائله‌دی‌سه، او، آدینی سؤیله‌مه‌دی. بیر ایپ-اوجو دا وئرمه‌دی کی، اونو هارادان تانیدیغینی اورخان یادینا سالا بیلسین. خز پالتوسونون اتکلرینی یوخاری ییغیب اورخانین اونون اوچون ساخلادیغی تاکسییه اوتوراندان سونرا سونونجو دفعه اونا غریب بیر ویداع تبسسومو بخش ائدیب، نئجه دئیه‌رلر، غئیب اولدو. او تبسسوم، تخمینن، بو دئمک ایدی: «آخ، زمانه، زمانه، اورخان دا قوجالارمیش…»
اورخانا ائله گلدی کی، او، بیر اوشاقدیر و جیرناتماق اوچون اونا بیر اویونجاق گؤستریب سونرا الیندن آلیرلار.
او آخشام اورخان سئویملی خالاسینین، آناسینین وفاتیندان سونرا اونون قئیدینه قالان یئگانه آدامین یئددیسینه گئدیردی. او، هله ده چاشقین و قانیقارا بیر حالدا چادیرا گیرنده چادیر آرتیق آز قالا بوشالمیشدی. قوشقار یولداشلاری ایله بیر طرفده اوتورموشدو. اونو گؤروب آیاغا قالخدیلار. اورخان دا ائله اونلارین یانینا کئچدی. فیکرینده همن یاراشیقلی نامعلوم خانیما نه ایسه ثبوت ائده-ائده باش-ساغلیقلارینی قبول ائتدی. «کیم ایدی او؟! آخی چوخ دوغما بیر تؤورو واردی. اولا بیلمز کی، تامام یادیمدان چیخا، هئچ جور اولا بیلمز…»
قوشقاردان باشقا اوچ نفر ایدیلر. اورخانا حؤرمت و ماراقلا باخیردیلار. بیرینی تانیییردی. قوشقارین، ائله اورخانین دا، آرتیق بئله دئمک اولاردی، دوستو شاهین ایدی.
– اوشاقلاری تانیدین؟ – قوشقار محبت و صداقت دولو گؤزلرینی اونا دیکیب تبسسومله سوروشدو. اصلینده، بو، «نییه گئج گلدین، نییاران قالدیق…» دئمک ایدی.
اورخان دا تبسسومه تبسسومله جاواب وئردی، گولومسه‌دی. «منیمکی بو گون تانیمامازلیقدان گلیب… هئچ، ناراحات اولما، بالاجا ایشیم چیخمیشدی…»
– انوَر یادینا گلمیر؟
– مک دونالدز. – انور ایریشه-ایریشه اورخانین یادینا نه‌یی‌سه سالماغا چالیشدی.
– البته، البته، تانیدیم.
– نئجه‌سیز، اورخان موعللیم؟! – مک دونالدز، یعنی، انوَر قابیلییت‌له سوروشدو.
اوجابویلو یاراشیقلی اوغلان ایسه گؤزله‌مه‌دی کی، قوشقار اونو تقدیم ائتسین.
– یادینیزا گلیر، اورخان موعللیم، بیر دنه جوللوت واردی…
جوللوت… البته، خاطیرلاییر. نئجه اونودا بیلردی؟! البته! مک دونالدز، شاهین، جوللوت، بیر ده عزیز قارداشی قوشقار. او اونودولماز یای آخشامینین قوناقلاری. دؤوره ووروب چمنلیکده قیزلارلا بیر یئرده بارداش قوروب شوشه فیرلاتمالاری، اونون بالاجا ماشینینا دولوشان قیزلارین، خوصوصیله ده، حلیمه‌نین عشقینه ماشینین دالینجا دنیزه قدر “لهله‌یه-لهله‌یه” قاچمالاری، داها نه‌لر، داها نه‌لر یادا دوشمه‌دی‌می، یادا دوشدو. اورخانا ائله گلدی کی، بو اوشاقلار هله ده توزلو باغ یولو ایله قیشقیریشاراق «مایکالارینی» باشلاری اوستده فیرلادا-فیرلادا دنیزه طرف قاچماقلاریندادیلار.
غفیلدن اورخانین بئینیندن، ائله بیل، ایلدیریم کئچدی. نئجه اولا بیلر کی، بایاق اونو تانیمادی؟! البته کی، او ایدی. گرک ان آزیندان قاشینین تعججوبله یوخاری دارتیلماسیندان تانییایدی. «اورخان دا قوجالارمیش…» او ایدی، او. باشقا هئچ کیم ائله دوغما اولا بیلمزدی. اورخان راحاتلیقلا کؤکس اؤتوردو.
— بو گون کؤهنه تانیشلارلا گؤروش گونونه دؤنوب. بایاق یولدا بیری ده قارشیما چیخمیشدی… – اورخان گؤزلرینده نیسگیللی بیر تبسسوم، او اوزاق و یاخین زاماندا اولدوغو کیمی یاناقلارینین یئنه ده آغیرلاشدیغینی حیسس ائله‌دی.
قوشقار و اونون دوستلاری اورخاندان یولدا هانسی کؤهنه تانیشینی گؤردویونو سوروشمادیلار. او دا دئمه‌دی.
…ایکی ایلدن سونرا بو اوشاقلارین دؤردو ده کؤنوللو اولاراق جبهه‌یه یولا دوشدو. آغدام اوغروندا دؤیوشلرده بیر حزین یای آخشامی دؤردو ده حیاتینی قوربان وئردی. وطن بایراغینا بورونموش تابوتلاری گلدی. قارداشینین یوخلوغونا اورخان بو گون ده آلیشا بیلمیر.
سکامیا=نیمکت
توم=توخوم
مالچیشکا=جوجوق
بیتلزلار = 1960 دان ۱۹۷۰ـه قدر موسیقی حیطه سینده فعال بیر قروپ. اونلار دونیانین ان چوخ ساتیلان موسیقی قروپلاریندان ایدیلار و پول مک کارتنی نین بقیه ایله دوز دئمه مه سی اوجباتیندان بیر بیریندن آیریلادیلار.
پریمادوننا = اوپئرادا باش روللاری ایفا ائدن آکتریسا
آکولا= کؤپک بالیغی،(کوسه ماهی)
خزری= یئل آدی
وئرتولیوت= هلی کوپتر
کینو = سینما
کومپرومیس= موصالیحه
مارشروت =اوتوبوس خطی
جیرناتماق =اله سالماق
مایکا=کؤینک(تی‌شرت)
