یولچولوق مساژلاری
کیان خیاو
(تبریزین آرا گونلری توپلوسوندان)
۱)
اوتانقاج
دیللیکن دیلسیز گلیرم یانینا
دیللیکن دیلسیز بیر شهر سورگونونه
هارداسان؟
سرگردان روحلار بورادا کوسوک اولماز بیلیرسنمی؟
سئزن آکسو بورادا دیلمانج ایسته‌میر
هئچ محمدرضا شجریان دا.
تبریزین خریته‌سینده آرانان اییده بولوارلاری بولونور
و ائینا‌لی اته‌یینده آتلاز تیکینتیسی‌یله
اوچ مئتیرلیک بویوتوندا کیتاب قوخولو بیر اوتاق!
بیر داها دیللیکن دیلسیز اؤپه‌جه‌یم اوردا سنی
گؤزله منی!
گؤزله
سورگونه گلن یوللارین یاریسیندایام
گلیرم!…
۲)
اؤلموشوندور بو سنه ساری گلن
آدسیز، سانسیز مزار داشی‌یلا چیینینده.
سن بیلگینلر یوردوندانسان
اؤلموشونسه بیلگینلرله اؤزگه بیریسی.
منجه سنی سئومه‌ین فیلوسوفلار بئله
داغ- داش بوش اولماسین دئیه گلمیشلر بو دونیایا.
و من – آرتیق‌لار آرتیغی –
دیرچه‌لیش تانیمایان بیر اؤلکه‌دنم.
اوزون ایللر کئچدی مندن
آرا گونلر، آرا گونلر اوستوندن
اونودولدوم
و یالنیزجا یالنیز قالدیم آرازلا
آراز قیزی خیالی‌یلا
سوره‌سیز
سسسیز
و سنسیز.
ایندی اؤلموشوندور بو سنه گلن
دیل- دیل اؤتن بیر اؤلو!
من آنا دیلیمله سنی سئویرم
منی سیخ- سیخ قوجاقلایان اییده آغاج‌لاریملا.
اییده آغاج‌لاریمی قورویا‌راق
بوتون آغاج‌لار ایچیندن کئچیرم
و بوتون دیللرده سنی اوخویورام
آنا دیلیمیزی سئویب قورویارکن.
دیللیکن دیلسیز بیر اؤلو سنه ساری گلیرم
قارانلیق‌دیر یئر اوزو
گونش بیر نئچه تؤکونتو تؤکور اوستومه
سونرا یئنه مزاریما دؤنورم
آدسیز، سانسیز مزار داشیملا چیینیمده.
آنا دیلیم، سن و اییده آغاج‌لاری
تورپاق آلتینا سوروکلرسینیز منی!…
۳)
بورا تورپاق آلتی تبریز
کؤکسومده ساوالان داغینی گتیرمیشم سنه
اللریمده ایش- پئشه‌لی بیر سئیید باشاریغینی؛
سن یوخسان.
قاینارجا گولوشلو دوداق‌لاریمدا
یئددی اؤلکه ناخیشی‌یلا توخونموش بیر خالچا گتیرمیشم سنه
و کرمین حلب چؤللری‌یجه سونسوز عطشینی؛
سن یوخسان.
قول‌لاریمدا اؤزگورلویه بوراخیلمیش دوستاق‌لارین قالان قاندال‌لارینی گتیرمیشم سنه
ساچ‌لاریمدا خزرین اوخشایان خزری‌لرینی؛
سن یوخسان.
گؤزلریمده زینه بولاق گتیرمیشم سنه
او ایکی داغ آراسیندان آخان بال بولاغی کیمی توم- تورش
و بارماق‌لاریمین اوجوندا
انجیر آغاجیمیزین دؤرد چئوره‌سینده
دؤرد کرتی‌یجه گؤیه‌رن نانا قوخوسونو
سن یوخسان.
آخ، قهوه بویا‌لی باشماق‌لاریمدا
قیرخ بیر داریخما‌لی خییابان گتیرمیشم سنه
و قول ساعاتیمدا
بوتون بیر ایرمی دؤرد ساعات بورجومو
و سن یئنه ده یوخسان
ایلکینیندن یوخ اولدوغون کیمی
یوخ!…
۴)
ایلکینیندن
ایلکینیندن بیلیردیم
بیر آرا گونده سنی ایتیره‌جه‌یم ائینا‌لیدا
و اؤز مزاریمی دا.
اولاندان اؤله‌نه کیمی
اییده آغاج‌لاری منه ال قالدیراجاقمیش‌لار:
الویدااااع
الویدااااع
تبریزدن حلبه گئدن یوللارین سون یولچوسو!
بیر آراگوندن باشقا بیر آراگونه ایللر کئچدی
ایزله‌نیلمز باخیش‌لارا ایزلندیم
و سورولماز سورولارا سورولدوم
دردیمی چکمه‌یه آنام اولمادی
آرخامدا دورماغا آتام
دوست‌لاریمسا چوخدان دوستچا‌لارا چئوریلمیشدیلر
یاخالاندیم، توتوقلاندیم، قانداللاندیم
نه ایش دئسن سنین اوچون گؤردوم
گونشدن تئز اویاندیم
آیدان گئج باتدیم
نه ایش دئسن گؤردوم
تکی بایراق بزه‌مه‌دیم دیکتاتورلوق آدینا.
سنسیز تانری‌نین گونشی بئله
گونباشی بیر دؤنه چیخیب باتدی
اویسا من یوز دؤنه اؤلوب دیریلدیم
سنی تاپمادیم آنجاق
مزاریم دا ایتگین- بیتگین ائینا‌لیدا!…
۵)
نه اولمازین ایشلر دئسن سنین اوچون گؤردوم
سنی سئومک، سنی سئو‌دیرمک اوچون.
شهر- شهر دولاندیردیم اؤیرنجی‌لریمی
شاه ایسماییل ختایی‌یه آینا قویدوم
نئی چالدیم دا ایستانبولدا ماراغا‌لی عبدوالقا‌دیره
و بورج آلدیغیم زامانی اؤده‌مک ایسته‌دیم سنه.
داخائودا پول سئلان اوخودوم
مودیلیانی‌یله ایچدیم مونپارناسدا
هیتلئری توتوب بوغدوم
موسسولینینی آسدیم
و یاشادیغیم بو حئیوان باغچاسیندا
سنه موزونو ترس گلن عاغیللی مئیمون‌لارا
موزالانیمی ترس گلدیم دلیجه
و بورج آلدیغیم زامانی اؤده‌مک ایسته‌دیم سنه.
آشیلماز آشیت‌لار آشیرام هله ده
کئچیلمز کئچیت‌لر کئچیرم سنین اوچون
دویونقارنینا یئییرم گؤزل پاریسده
دویونقارنینا یاتیرام ایتالیان مودئللری‌یله
سئوگی ایشله‌ییر منده‌کی بوتون ماکینا‌لار
منی دانس ائدیر باکیدا بالئرینا‌لار.
و بورج آلدیغیم زامانی اؤده‌مک ایسته‌ییرم سنه.
سنی سئومک، سنی سئو‌دیرمک اوچون
آنامین یاساق دیلینی قیزیما اؤیره‌دیرم
آنجاق نه اوو اوولاییرام
نه ده قوش قوشلاییرام
داریخیر، داریخیر و داریخیرام
آرادا بیر اؤزومو یاخالاییرام
آرادا بیر ایسنایپئر کیمی اؤزومو آلنیمین چاتیندان توشلاییرام
آرادا بیر اؤلدورورم، اؤلورم
گؤتوروب آراز چایینا آتیرام اؤز جسدیمی
سونرا یئنه تاپیلیرام
و بورج آلدیغیم زامانی اؤده‌مک ایسته‌ییرم سنه
هله ده!…
۶)
سن زامانی تانیییرسان
او آراگون‌لردن آراگون‌لره کئچن ایللری
او منی ایچینده قویلایان ایرمی دؤرد ساعاتی.
تؤکولن قانیمدا سنین الین وار
و سرگردان روح‌لارلا یاتیشان مزاریمدا سنین گؤز یاشین.
مزاریم هاردا‌دیر منیم؟
بوراسی دند داغی‌نین دیبسیز اوچوروم‌لاریمی
یوخسا سنین یاتاغیندا ساغ بؤیرونمو
اورتا دوغونون گؤبه‌یی تبریزده؟
بو اسن یئل نه یئلی‌دیر؟
آرازدانمی اسدی بو یئل
یوخسا ائینا‌لی یئلیمی؟
و مزاریما سپیلن بو چیچک‌لر
هانکی اییده آغاجیندان قوپاریلمیش یاغیر اورتا دوغویا؟
بیلیرم
تؤکولن قانیمدا سنین الین وار
قورخما آنجاق
تؤکولن الینده قانیم قالماسین
قورخما، آغلاما
بیر مزار دا گؤزیاشیندا قازیلیر منه!…
۷)
آغلاما، بیر گون ده بیر گون‌دور
دقیقه- دقیقه بیتن بیر ایرمی دؤرد ساعات.
ایرمی دؤرد ساعات بورجوم وار سنه بیلیرم
اللرینی آچسان اؤده‌یه‌جه‌یم.
باشماق‌لاریمین دابانینی چکیرم
ان جیلیز بیر خسته بؤجک
باش بارماغیمین اوجوندا ازیلیر
ائینا‌لی اته‌یینده.
چیراق- چیراق یانیر اییده آغاج‌لاری
و سن اللرینی آچمیش دوروبسان
بیر ایرمی دؤرد ساعاتین ماوی چاغیندا.
باخ، سئودییین او ان جیلیز خسته بؤجک
زیبیل قاب‌لارینا ساری یوکسه‌لیر
زیبیل گؤزلرینه دولور
ساچ‌لارینا دولاشیر
دیرناق‌لاری‌نین آراسینا گیریر
بونلا بئله بؤجه‌یین ده اؤز سسی، اؤز سووو وار
زیبیل قاب‌لارینا دوشموش سوسقون‌لوغونا باخما!
سئودییین او ان جیلیز خسته بؤجه‌یی
اؤز یئرینده اوتورموش گؤرورسن ایندی
سئویش- اؤپوشوندن سونرا
ساغوللاشماغا دا بیر جوت الی یوخموش
آغزیندا بیر پارچا قورو دیلی ده.
بوش وئر و باشماق‌لاری‌نین دابانینی چک سن ده
ان جیلیز خسته بؤجک‌لر
ازیلر باش بارماغی‌نین اوجوندا.
گل اییده آغاج‌لاری‌نین چیراق‌لارینی یاندیر
و اللرینی آچ، دور
بیر ایرمی دؤرد ساعاتین ماوی چاغیندا
ائینا‌لی اته‌یینده!
آغلاما، بیر آراگون ده بیر آراگون‌دور
قویما بو ایرمی دؤرد ساعات
دقیقه- دقیقه بیتسین!…
۸)
قولاق آس، ائشیدیرسنمی؟
سس تانری‌سی
تانری سسی‌یله چاغیریر سنی!
قولاق آس!
من سنی تانریم دئیه چاغیریرام، ائشیدیرسنمی؟
نییه گؤی‌لر داها ماوی اولمورلار؟
یوخسا کیچیک آدین تانری دئییلدیمی؟
من بولودلارلا سئوگی گؤزتچیسی‌یم
بیرر اولدوزلارلا سندن دانیشیرام
بیرر اولدوزلارین سس- سووو منده.
قولاق آس!
سنسیز یئراوزو کولئرا خسته‌لییینه دوشموش
و کولئرا ایللری‌نین سئوگی‌سی یاشانیر منده هله ده.
گئجه‌لری آیلا سندن دانیشیرام
گوندوزلری گونشله
سونرا ائپیدئمی اولور بو خسته‌لیک وارلیغا.
قولاق آس!
دیللیکن دیلسیز اوخول‌لاریمیزدا
جیزلیغی چیخان کؤرپه سئرچه‌جیک‌لرین
قافلان هنیرتی‌لرینی ائشیدیرسنمی؟
یوخسا آلتی یاشلی بیر قیزجیغازین
دپرم دوواری آلتیندا آناسینی چاغیردیغینی؟
قولاق آس!
پنجره‌نده حزین یاغش‌لار سسینی تانیییرسانمی؟
و پنجره هئره‌سینده باشی قانادی آلتیندا قالان قوش ملرتی‌سینی؟
آرتیق او توغرول قانادی قورودولوب؛
قوی آتلاز تیکینتی‌لرین دئکورو بزکلی اولسون!
سن پنجره‌نی اؤرتورسن
قاپی‌لاری باغلاییرسان
سوسوب سوسدورورسان منی
قانادلاریمی قورودوب قویورسان کیتاب‌خانانا؛
بو دیکتاتورلار ایشی‌دیر
دیکتاتورلار کیمسه‌نی ائشیتمزلر
منسه سنی چاغیریرام هله ده دیللیکن دیلسیز.
قولاق آس!
شاللاغین سسینی ائشیدیرسنمی؟
شاللاق وار شاللاق وار آخی!
شاللاق وار دئییرلر تانری شاللاغی
شاللاق وار سئوگی شاللاغی سالومه‌نین الینده
شاللاق وار تورین آتی‌نین بئل- بوخونونا ائنیر
و شاللاق وار بیزیم ائنسیز ائنچه‌میزده
دیکتاتورلوق شاللاغی!
قولاق آس!
نییه قاپاتماق ایسترسن
سووخامیزا قالمیش بو تئلئفون‌لاری؟
اونسوز دا من سندن سنه روح کیمی دانیشماقدایام؛
سندن یاااار
سنه یاااار
شیکایتیم ده یوخ آخی
نه دئییم؟!…
1392/ ۶/ ۵ (۲۰۱۳)
