(۱)
حیات سوفره‌سینی سریرم:
چوره‌ک،
سو،
و نفس.
چؤره‌ک باهالاشدی
سو ایسه قورودو
و یئنه‌ده
دوستاقلاندی قفسده نفس.
آرزی دولو
چارپینتیلی بیر اوره‌ک:
کاش اولمایایدی قفس.
(۲)
آچیرام پنجره‌نی
عطرینی آلماق اوچون؛
آنجاق
پاییز کولکی چیرپیر پنجره‌نی،
سانکی
ایستی بیر قوجاق آختاریر
شاختالی قیش قورخوسوندان.
پاییز
من
یارپاق یاغیشی
و
انتظار …
(۳)
آی ایشیغی
سحره‌جن
“گئجه قوخولو” چیچگ‌له سیرداشدیر.
من‌له سن
گونشین دوغوشونو گؤزله‌ییریک؛
آچیلاجاق سحر،
آچیلاجاق
دان یئری‌نین آغ بایراغی‌لا.
(۴)
ترسه حیات
ترسه هاوا
و ترسه انسانلار،
نه آجی بیر حقیقتدیر بو !
سانکی
دایانماق ایسته‌میر بو شوم قاتار
چییین‌لریندن قالخیر یالان
و یاتیر اوزونده
یاواشجاسینا اؤلدورمک اوچون منی،
آنجاق بیلمیر کی من
ایللردیر لحظه‌لرین آرخاسینجا قاچیرام.
(۵)
زامان یوخو کئفلیسی‌دیر
و من
اؤز دؤوره‌مه دولانیب
سنه دوگونله‌ییرم خیالیمی،
امینم
گونشلی بیر گونده
چاتاجاغیق بیر- بیریمیزه
یادین گؤزوندن اوزاق
زامانین گؤزوندن اوزاق.
