(۱)
گؤزلرین
ایشگه آرخ‌لاری اؤزونده بوغور،
و بوغازین
دومانی، ناله‌دن قوپاریر.
گئجه‌نین سونودور، نازلیم!،
چوخداندیر
گؤرسه‌نیر ایشیق
و ایتیب، باتمادادیر قارانلیق.
آددیملارینین سسی آستادان گلسه‌ده،
باتیریر زامانین قولاقلارینی.
(۲)
دونن گئجه
قار آلتیندا آرامجاسینا دایانان
یالقیز بیر “نارون” آغاجینی-
گؤردوم یوخودا؛
سانکی
بیر الکتریک آغاجی یاراتمیشدیر-
آی ایشیغی اوندان.
من
یئنه ده اینتظاردایدیم…
سن گلیب کئچدین دایانمادان،
من‌ایسه
قار اوستونده‌کی ایاق ایزلرینی-
ایزله‌دیم کؤلگه به کؤلگه…
یوخودان داشلاندیم؛
نارون آغاجی چیچک آچمیشدی.
(۳)
آغاج
یوخوسونو کولک اوغورلادیغیندان
تورپاغین قوینوندا اینله‌ییر؛
پنجره
دومانلی سمانین سیرداشی اولدوغوندان
یاغیشی آغلاییر؛
من
حسرت‌دن بیر کؤینک تیکیرم سنه
ایچه‌ری ائوده؛
سن
هاراسیندا دایانیبیسان بو فیرتینانین؟!
(۴)
نه اولسون کی، بیر ائوین چیراغی سؤندو؟!
ایشیقلاندی باشقالارینین ائولری.
آنجاق
سیخیلدی اوره‌ییم
وحشی بیر قوش کیمی
قانادلانیب گئتدیگین زامان.
من قالدیم
و کدره بورونموش بیر یووا،
و دئییلمه‌میش ناغیل‌لار.
