کئشگه بو مثلی بئله دئیه‌ایدیلر: «هرزادین تزه‌سی، دوستون، کوچه‌لرین، خاطیره‌لرین، حتتا یئلین ده کؤهنه‌سی…».
اوزون ایللردن سونرا دوغولدوغوم شهرده، دوغولدوغوم کوچه‌یه- «عباسی خیاوانینین آخرینده، سیاواندا وزیرآباد دربندی»-نه گئتدیم. کوچه‌نین آدینی ده‌ییشمیشدیلر. دربنده گیره‌ن یئرده، بیر ده کوچه‌نین اورتاسینداکی «قیرخ‌پیلله چشمه‌لری» دولدورموشدولار. بعضن کؤهنه ائولری سؤکوب یئرینه تزه دام- داش تیکمیشدیلر؛ «حاج‌علی»‌نین یئکه حیه‌طینی آپارتمان ائله‌میشدیلر؛ «قانا فاطماسی»‌نین باغیندا اوچ -دؤرد آغاج گؤرونوردو.
دربندی اوچ- دؤرد دفعه آشاغا، یوخاری‌یا گئتدیم قاییتدیم. «جئیران صادیق»‌ین حیطینه یئتیشنده آیاقلاریم سوستالدی. کئشگه او قاپی آچیق اولایدی، بیر ده او پیلله‌لردن او حیه‌طه باخایدیم. چوخ اویان- بویانا باخدیم. «علی‌خان» کوچه‌ده دئییلدی؛ «پوتا رسول» کیمسه ایله ساواشمیردی؛ «تخته بؤیوک‌آغا» گیلین ائولری خارابا قالمیشدی؛ محله‌میزین لوتوسو «ایوب‌پتی» تریلی تصادوفونده عؤمرونو سیزه وئرمیشدی.
«آجی» زیر- زیبیل ایله دولو ایدی. «کؤهنه قبریستان»ی پارک ائله‌میشدیلر. «ساری‌داغ»، «ولیعصر»ی کوره‌ک‌لرینده داشیماقدان زیق- زیغا دوشموشدو. کوچه‌دن باشقا، بو بویا- باشا چاتدیغیم یئرده، کیمسه منی تانیمیردی. خاطیره‌لر بیر به بیر گؤزومون اؤنونده صف چکیردیلر. منسه حئیرتلره دالیردیم. بیردن بیره قدیمی بیر تانیشا راست گلدیم. کوچه‌ده سرین بیرمئح اسدی، دوز اوشاقلیق گونلری کیمی جانیما دولدو…
کئشگه بو مثلی بئله دئیه‌ایدیلر: «هرزادین تزه‌سی، دوستون، کوچه‌لرین، خاطیره‌لرین، حتتا یئلین ده کؤهنه‌سی…».