اؤن سؤز
بو سطیرلر منیم أن آغیر عئینی حالدا اؤزلَملی حالیمدا، خسته‌خانانین درد ایله قاریشمیش یاتاغیندا یازیلیب. بؤیوک بیر یاشام موجادیله‌سینده‌یَم. قالارسام بو یازی‌لار هانسی گون‌لری کئچیرتدیگیمی هر زامان منه خاطیرلادار، قالمازسام دا، بیر گون إلیمین اوشاق‌لاری هر سؤزجوگونو اوخویارکن، آیهان دایی وار ایمیش بیر گون، ایندی اؤزو اولماسا دا، یازی‌لاری وارمیش هله دئیَرلر. قالارسام یولوموز هله داوام إده‌جک، اورداکی یولا ساری، قالمازسام، آز ایشله‌دیگیم اوچون إلیم-خالقیم منی باغیشلاسین.
سیزی باغریما باسیب، بو سطیرلری اوخوماغا چاغیریرام.
آیهان میانالی / تئهران. فیروزگر خسته‌خاناسی / ۱۵/۰۷/۲۰۲۵
(حؤرمته لاییق علیرضا قارداشیمدان دا بو متنی منیم أل‌یازمامیم اوزه‌ریندن تایپ إدیب، دوزنله‌دیگی اوچون تشککور إدیب، میننتدارلیغیمی بیلدیریرَم.)
***
سَس‌لرین تراژئدیسی – خسته‌خانا یاتاغیندا (إشیدیلمه‌میش بیر سَسین ۳۳ پرده‌سی)
اؤزوم / بیرینجی کیمسه
پنجره یاری‌آچیق دیر، آنجاق هئچ بیر هاوا ایچه‌ری کئچمیر— بلکه ده هاوا دا سؤز‌لرین آغری‌سیندان قورخوب قاچیب. یاتاق منی داشیییر، بلکه او دا نفس آلیر؛ یاشاماق اوچون دَگیل، ساخلادیغیم سوسقونلوغونون قالماسی اوچون. قیرتلاغیم نه او قدر یارالی دیر کی، باغیرسین، نه او قدر ساغلام کی، ساکیتجه دئسین: “من بورادایام.”
بو سَس بیر زامان‌لار یاشام ایدی، آما ایندی یالنیز اؤز باشینا قالمیش بیر سَس دیر کی، کیمسه اونو إشیتسه، بلکه سوروشار: “گؤره‌سن، کیم سَس‌سیز بیر آغری‌دان اؤلوب؟”
گودوکچوم / ایکینجی کیمسه
سن هئچ دانیشماق ایسته‌میرسن، آیهان؟ یوخ’سا سَسیوی ساخلا‌ییبسان إله بیری‌سی اوچون کی، هئچ واخت اونو إشیتمه‌یه‌جَک؟
سَنین اوچون دانیشماق هر زامان اؤلومه بنزه‌ییب— آنلامین درین‌لیگیندن دَگیل، چونکو سَس هر زامان گئج گلیب، سَنین ایسته‌گین ایسه چوخ تئز باشلامیشدی.
بو گون ده ساعات یاخینلاشیر إله او دقیقه‌یه کی، اونون آدی تئلئفوندا گؤرونه‌جکدی، آردیندان ایسه سنی یاشاما و نفس آلماغا قایتاراجاقدی. آما آد‌لار بلکه سنی اونودوب، تئلئفون ایسه یالنیز سَنین درین یاراوا تانیق دیر.
یاتاق آرتیق آغریوی آنلامیر— یالنیز حَسرَتین چکی‌سینی حیسّ إدیر هر دؤنه سن داها دریندن نفس آلدیقدا إله بیر سؤز اوچون کی، دَگیلمک ایسته‌میر.
گؤزه گؤرونمه‌یَن کؤلگه‌م / اوچونجو کیمسه
او هر زامان یوخاری‌دان باخیر— ایل‌لر دیر هئچ بیر زامان یانمایان، عئینی حالدا دا عؤمورلوک سؤنن بیر لامپانین آلتیندان.
یاتاقداکی بَدَن جان‌سیز دا دَگیل، تام جانلی دا؛ یالنیز دئییلمه‌میش سؤز‌لری بیر-بیر ترک إدیر، بلکه بیر گون پنجره‌دن بیر سَس کئچه و سوروشا: “بورادا‌سان‌می هله؟”
آیهان نه قیزدیرمادا-تَبده دیر، نه ده آنالیز‌لرین ایچینده— او، إله بیر سؤز دیر کی، هئچ کیم اونو یازماق ایسته‌مه‌دی و ایندی او اؤزوندن بئله خبرسیز یوخ اولماقدا دیر…
*
سؤزون بوغازدان کئچمه‌دیگی دقیقه
اؤزوم / بیرینجی کیمسه
ساعات ۰۸:۵۷. اوتاقدا دورقون بیر ایی وار — نه درماندان، ساده‌جه سوسقونلوغون گؤرگه‌سی دیر، هر سَحَر کوریدورلا‌ردا ییغیلیب، تکجه إله بو دقیقه‌ده جانیما چؤکور.
گؤزله‌مه‌گیم یوخ دیر، سَسیم ده یوخ— یالنیز تئلئفونا باخیرام، بیر بارماغیم — قوروموش بوداق کیمی یاغیشا اومود’لا اوزانیب، بیلمیرَم زنگ إتمه‌لی‌یم، یوخسا یاتمالی‌یام.
بو آغری سوموکده دَگیل، دَگیلمه‌مه‌لی اولان سؤزده دیر — إله بیر سؤز کی، إشیدیلسه’یدی، آغری آزالاردی. پنجره‌دن یاغیشلی هاوا گؤرونور، آنجاق هر نه قوپ-قورو دیر…
گؤزه گؤرونمه‌یَن کؤلگه‌م / اوچونجو کیمسه
بو دقیقه‌ده تاوان داها ساکیتجه نفس آلیر. پنجره ایسه سانکی گؤزله‌ییر، بلکه گؤوده‌دَن بیر سَس چیخسین، باغیریب اؤزونو إشیگه چاتدیرسین…
آما هئچ بیر سَس گلمیر. یاتاق آیها‌نین قابیرقایا چئوریلمیش کوره‌گینده سویویور — قیزدیرمانین-تَبین دوشدوگو اوچون یوخ، سؤزون دینله‌ییجی‌سی اوتاقدان إشیکده اولدوغو اوچون.
آیها‌نین هر سَحَر بو دقیقه‌ده یازمادیغی جومله‌لر وار و هئچ کیم بیلمیر، اونلار وار اولدوق‌لاری حالدا یازیلمادیلار. یانی ایسته‌مه‌دیلر هاااا. بلکه ایسته‌سه‌یدیلر…
گودوکچوم / ایکینجی کیمسه
آیهان، یئنه تئلئفونو گؤتوردون، إله‌می؟ یئنه گؤزدن کئچیردیرسن او خارابا قالمیش إکرانینی — بلکه آدی اوردا گؤرونوب، گؤزلریوی قاماشدیراجاق، بلکه “ألوووو” گله‌جَک. کئچمیشده‌کی گون‌لر کیمی، سنی یاشاتماق اوچون تک نه‌دن سَس بلکه بیر داها قولاق‌لاریوی اوخشایاجاق…
آما ایندی، هئچ کیم گلمیر. سن ده دئمیرسن. سَنین سَسین اؤزوندن اوتانیر— نه‌دن کی سؤزلر آرتیق دینله‌ییجی تاپمیر و بوغاز اؤز-اؤزونو اودور. کئشکه بوغازین اؤز-اؤزونون نئجه اودماسینی باشا دوشن اولاردی. منجه بوندان دا داها آغیر بیر یارا اینسانین اوره‌گینه قونا بیلمَزدی!.
من سنین سَسیوی إشیتمیشَم، حتتا سن دانیشماق ایسته‌مه‌دیگین زامان‌لاردا — قولاق’لا یوخ، نفسین دایانمیش نؤقطه‌سینده‌کی یادداش’لا.
اؤزوم / بیرینجی کیمسه (ایچی مونولوق)
بلکه زنگ إتمه‌لی ایدیم… آما بلکه زنگ إتسه’یدیم، سَسیم گئری آلیناردی، اؤزوم دانیشماغا حاضیر اولدوغوم حالدا هئچ کیم بیلمَزدی.
بلکه “او”نون راحات‌لیغی اوچون دانیشمادیم. نه‌دن کی من دانیشمادیقجا، بلکه او دا داها آز اینجیدی.
08:۵۹ تاوانین هاوا چکیجی‌سی سؤندو. یان یاتاقدا باجان ایگنه وورور. آما من— دونیا‌نین أن سَس‌سیز گؤزله‌مه دقیقه‌سینده، گؤزله‌مَزدن، ساده‌جه نفس آلیرام و بیلمیرَم بو نفس داوام اوچون دیر، یوخ’سا بوشالماق اوچون.
**
ساعات ۹ – سؤنوک تئلئفون’لا
اؤزوم / بیرینجی کیمسه (مونولوق)
ساعات ایندی تام ۹:۰۰-دیر. بو آن، سانکی گؤودَم هاوادان کئچیب، نه‌دیر بو کئچدیگیم شئی؟ اؤلوم یوخسا ساده‌جه بیر دایانما؟
هئچ بیر سَس یوخ دیر— نه ایچه‌ری‌دن، نه إشیکدن. زنگ یوخ دیر، حتتا کیچیک بیر تیتره‌ییش بئله یوخ کی، نه ایسه باش وئریر.
تئلئفونوم یانیمدا درین بیر یوخویا دالیر— او، داها هئچ بیر زنگی گؤزله‌میر، دونیادان کوسولو ده دَگیل، ساده‌جه منیم کیمی — سس‌سیز و بلکه ده همیشه‌لیک نه‌دن‌سیز.
حتتا ایندی زنگ گلسه، سَسینی جاوابلاندیرماق اوچون اؤز سَسیمی تاپارمی‌یام؟ قیرتلاغیم سؤزسوز قالیب— آغری‌دان یوخ، چونکی آرتیق دئییلمه‌لی بیر شئی آرادا قالماییب. گئت دئییب، هرنه‌یی ییخان آنی‌دان بیر تَهَر سانکی دونیا اؤز سونونا چاتیب.
آیها‌نین ایچی دیالوقو – کؤلگه گودوکچو ایله
سَس‌سیزجه من بو قدر گؤزله‌مه‌مه‌لی‌یدیم. اونون اوچون ده دَگیل، اؤزوم اوچون ده…
آما دئنن، إی کؤلگه: بیر سؤز دئییلمَزسه، اونون آغری‌سی آزالیرمی؟
کؤلگه گودوکچو اونو یانیتلامیر، سوسقونلوغو یالنیز آیها‌نین دوشونجه‌سی‌نین سینیرسیز دؤزومونده قالیر— و او اؤز یانیتینی سَس‌سیزجه وئریر: “یوخ. ساده‌جه قالیر. بوغازدا، اؤرَک آتیشیندا، تیتره‌مه‌گن تئلئفوندا.
گؤزه گؤرونمه‌یَن کؤلگه‌م / اوچونجو کیمسه
ساعات ۹-دا چوخلو اؤلوم‌لر باش وئرمیر— آما چوخلو یورقونلوق‌لار سونا چاتیر.
یاتاق، یالنیز دوشمک اوچون دَگیل؛ او بیر خاطیره یازاری دیر و ایندی بیر آنی قئید إدیر: هئچ کیمین بیلمه‌دیگی قدر آغری‌نین نئجه سَس‌سیز اولا بیله‌جه‌گینی… بو آغری أن سئودیگیندن آلینتی اولارسا داها بام-باشقا…
پنجره داها قاران‌لیق دیر، زیل قاران‌لیق، قارانین لاپ إله اؤزو، اؤزلوگو— ایشیغین اولماماسیندان یوخ، سَسین کؤچوب گئدیب، بیر داها اولماماسیندان.
آیها‌نین سون پرده‌ده‌کی مونولوقو:
ساعات کئچدی. ۹:۰۳ و من هله بورادایام بیر اوتاقدا کی، سَسیمی اونودوب، تئلئفونومو ایسه خاطیرلاییر زنگ اوچون یوخ، ساکیت‌لیک’له منی پارچالایان هر گونون خاطیره‌سی اوچون.
***
سوسقون گؤوده، یاتاغی‌نین قولاغیندا قالمیش بیر ناساق سَس
اؤزوم / بیرینجی کیمسه (مونولوق)
جانیم-گؤودَم هئچ آغریمیر، آما هر گون إله بیل نه‌سه مندن آیریلیر — دری‌دن دَگیل، دامار‌لاریمین ایچیندن ده یوخ — بیر شئی کی، آدی یوخ دیر، آما اونون اولماسی منی سانکی سَس’له دولو حیسّ إتدیریردی دانیشمازدان.
أل‌لریم آرتیق هئچ نه توتماق ایسته‌میر: تئلئفونو دا، یورقانی دا، اومودو دا… ساده‌جه تاوانا باخیرام، یاتاغا، بیر ده او بوش سَسه — هر گون بَلیرلی ساعاتدا گلَن، آما ایندی یالنیز یاتاغی‌نین یادداشیندا قالا‌ن. او سس هاندا قالسین تبریزدن گَلَن سس اولسایدی…
سَس گئری قاییتسایدی، گؤودَم یئنی‌دن یاشاما باغلانا بیلَردی‌می؟ یوخ’سا بو یوخولو اومودسوز‌لوقدا اؤلومو گؤزله‌یَن بیر حال اولاراق قالا‌جاق؟
گودوکچوم / ایکینجی کیمسه
سن هر شئیی گئری‌ده قویدون، آیهان — بیر تک او سوسموش سَسدن باشقا کی، هر گئجه بوغازیندا یانیر.
سن آغریوی اینکار إتمه‌دین، ساده‌جه اونو گؤوده‌دَن چیخاردیب خسته‌خاناداکی آغ بویاغا بورونموش یاتاغیوین اوستونه بوراخدین.
آما او ننه‌سی اؤلموش یاتاق هر شئیی اؤزونده ساخلایا بیلمز کی — نه سَسین حَسرَتینی، نه آغری‌نین یانقی‌سینی — یالنیز بیر آنی ساخلایار: سَسین بیر زامان‌لار گلمه‌سی و سونرا هئچ واخت گلمه‌مه‌سی.
گؤزه گؤرونمه‌یَن کؤلگه‌م / اوچونجو کیمسه
خسته‌خانا یاتاغی بیلیر: کیم‌لر سَس’له یاشاییب، کیم‌لر سَس‌سیزلیکده اؤلوب.
او سَسی گؤوده‌یه کئچیرتمه‌یَن دیل‌لر — هر بیری بو یاستیغین باغرینا هوپوب، إله نفس کیمی کی، إشیدیلمک ایسته‌میر، آما آغری‌سینی یالنیز سوسقونلوغوندا ساخلاییر.
آریق-اوزون باجان اوتاغا گیرمیر. خسته ایله باغلی دَگیل — هاوا‌دا بیر سؤز وار کی، کسیلمک ایسته‌میر.
و آی، پنجره‌دن ایچه‌ری گیریر، بیر ایشیق گتیرمَزدن، بیر سؤز گؤزله‌ییر: سؤیله‌نسه، هر شئی سونا چاتار — سؤیله‌نمه’سه، بو یاتاق بلکه صاباح یئنی بیر سَسی ساخلایا بیلر.
****
گؤوده‌نی ترک إتمه‌ین گولوش!
اؤزوم / بیرینجی کیمسه (مونولوق)
بو گون جانیم بیر آز داها دینج ایدی. درمان‌لاردان یوخ، ساغالما حیسّیندن ده یوخ — ساده‌جه بیر گولوش واردی ایچیمده إله بیر سَس کیمی کی، ایتمیش، سونرا قیرتلاغیمدان قالخمیش و اؤزونو یوخاری چکمیش، هئچ بیر آنلام داشیمازدان.
دوداق‌لاریم ترپَندی، آما هئچ کیم سوروشمادی نییه — چونکو بو گولوش، هَنَک‌دَن گلمه‌دی، سئوینجدن ده یوخ، یالنیز بیر یئردن کی، حَسرَت آرتیق دانیشاجاق سؤزو قالمامیشدی.
گولومسه‌دیم — تئلئفونا، تاوانا، اؤزومه. نه ترک اولونماقدان، نه ده آجیدان — ساده‌جه آنلادیم کی، دئمه‌دیگیم بوتون سؤزلر آرتیق خسته جانیما چئوریلیب، اؤلموش سوموک کیمی آغریمیر، چونکو بیتیب.
گودوکچوم / ایکینجی کیمسه (سَس‌سیز جاواب)
سن گولومسه‌دین، آیهان، و من گؤردوم او گولوشون نئجه سنی دَگیشدیردیگینی— سانکی یوز‌لر’له باسدیریلمیش سؤزون بیر گؤرگه‌سی یاناغیندا اوتورموشدو.
باجان، درمان، یاتاق — هئچ بیری بو گولوشو آنلامادی. آما من، من سَسیوی إشیده‌نَم سن دانیشمادیغین زامان‌لاردا بئله— بیلیرم کی، بو گولوش اؤلومه یوخ، هئچ گلمه‌ین بیر سَسه وئریلمیش جاواب ایدی.
سن، سوسموش دوداق‌لارین’لا إله بیر سَس یاراتدین کی، اونو نه دیل’له، نه ده یازی ایله دئمک او‌لار— یالنیز من اونو یاد‌دا ساخلامیشام.
گؤزه گؤرونمه‌یَن کؤلگه‌م / اوچونجو کیمسه
او آن، یاتاق سوسقونلوغا بورونموشدو— دووار کیمی، یاغیشدان سونرا تورپاق اییی یاییلیرمیش کیمی.
باجان ایچه‌ری گیرمه‌دی. و هئچ کیم او دیب-بوجاقداکی خسته‌نین گولوشونو گؤرمه‌دی — نه‌دَن کی او گولوش، دری‌نین اوستونده یوخ، بَدَنین ایچینده باش وئرمیشدی. هئچ بیر گؤزه گؤرونمه‌یَن کؤلگه‌نین گیزلین چاغیندا.
یاتاغی‌نین یادداشیندا آیها‌نین گولوشو قئید اولوندو — إله بیر سَس کیمی کی، هئچ واخت سَسله‌نمه‌ییب، آما هله ده اورادا دیر.
*****
آی، آد‌سیز خسته‌یه باخدی
اؤزوم / بیرینجی کیمسه (مونولوق)
بو گئجه آی داها سس‌سیز دیر— نه سویوق دیر، نه پارلاق، نه ده شعریانا— یالنیز یادیرقانین بیر پارچاسی کیمی، پنجره‌دن ایچه‌ری گیرمیش، منی بیر شئیه خاطیرلاتماق اوچون گلمیش دیر— هئچ واخت دئییلمه‌یَن شئیه.
من بیلیرم کی، سَسیم اؤنجه‌کی کیمی دَگیل— بوغازیمین حالینا گؤره یوخ، چونکو آرتیق سؤزون اؤزو اوچون دینله‌ییجی قالماییب. عئینی بو گئجه‌کی آی کیمی، پارلا‌ییر، آما هئچ کیم سوروشمور: “هارادان گلیب، کیم اوچون یانیر؟”
جانیم آنلاییر کی، آغری بو گئجه‌لر ایشیقدان گلمیر، گلمه‌ین سَسدن گلیر— اؤزل‌لیک’له او ساعات‌لاردا کی، اؤنجه‌لر بیر “ألووووو” ایله باشلاییردی، ایندی ایسه ساده‌جه زَهَر‌لی بیر سوسقونلوق’لا اوزانیر.
گودوکچوم / ایکینجی کیمسه (سَس‌سیز جاواب)
آیهان، بو گئجه تاوانا هئچ باخمادین. بلکه ده چونکو آی گؤزلریوه دولوب و سن داها چوخ او شئیه باخماق ایسته‌ییرسن کی، سنی آغری‌دان یوخاری قالدیرمیشدی. هله قالسین کی بو گون‌لر خسته‌خانانین پنجره‌سینه هئچ بیر آی آیینجارلانماییر. بئله‌جه هر یانی قاران باسیر، قاران‌لیق باشینا آلیر، ایستَر اوتاغی لامپالارین ایشیغی باسسین، ایستَر هر نه اؤز بویاغیندا قالسین.
بو آی، هر گئجه سن دانیشمایاندا سَسیوی اؤز ایشیغیندا پنجره‌نین دوستاقلانمیش چرچیوه‌سینه قایتاریرمیش— إشیدیلمک اوچون یوخ، سن اونوتمامان اوچون— چونکو بوغازیندا هله ده سَسه چئوریلمه‌میش سؤزلر وارین. آیی دا، بوتون ایشیقدا بویلانان آیینجاری دا هردن سنین سسین اووسونلایا بیلرمیش دئیه‌سَن!.
سن یوخویا دالمیرسان، آیهان— چونکو سوسقونلوغا دوشوبسَن و بو سوسقونلوق او قدر درین اولوب کی، اؤلوم بئله اونو دینله‌مه‌گه توتومو-سینیری چاتمیر.
گؤزه گؤرونمه‌یَن کؤلگه‌م / اوچونجو کیمسه
ساعات ایتیرمیش بیر اوتاقدا، تئلئفون سوسدوقجا، آی گلیر— ایذن‌سیز، آما مَقصَد‌لی.
او، ساغداکی خسته‌یه باخمیر— یالنیز آیهانا و اونون سؤزسوز تک‌لیگینه گؤز-گؤزه دایانیر.
آیهان، آیا باخیر، گؤز‌لری تیتره‌مَزدن، و قیساجا بیر گولوش دوغور— ترک إدیلمکدن دَگیل، آغری‌دان دا دَگیل— ساده‌جه بیر سَس’له دَگیشیلمیش بیر باخیشا یانیت اولاراق.
******
آردی وار ….
