یئنه داش دیبینده گؤیرَدی دیشه،
شاختا دا قورتاردی، قیش دا قورتاردی.
حزین نفسی‌له دئییر بنؤوشه:
آچین قاپی‌‌لاری، گلن باهاردی!
هر بوداق باشیندا بیر دسته گول وار،
گوللرین اوستونده نه گل ها گل وار،
قدیم بابا‌لاردان بئله مثل وار:
«سویوغون، شاختانین، مئیدانی داردی»
آچین قاپی‌‌لاری، گلن باهاردی!
یاستی چمن‌لرده اوتلاییر قوزو،
بولاق‌لار باغرینا باسیب یارپیزی،
دوشون داغ دؤشونده ارییَن بوزو،
هر بیر قارانلیغین دان یئری واردی
آچین قاپی‌‌لاری، گلن باهاردی!
کسمه اومیدینی کسمه باهاردان،
اومیددی قورتاران اینسانی داردان،
دئمه بیرده چیچک بیتهجک هاردان؟
اسنسه کولکدی، یاغانسا قاردی
آچین قاپی‌‌لاری، گلن باهاردی!
«عندلیب»، بو گلن نه خوش قوناغدی،
طبیعت یولونا چیچک‌لر یاغدی؛
هایقیران دره‌دی، کیشنه‌ین داغ‌دی،
دئمه نه های هارای، نه شار ها شاردی
آچین قاپی‌‌لاری، گلن باهاردی!
0 پاسخ
ایلک باهارین گلیشینه اینانیب کیمسه‌نی اینجیتمه‌دن باهار طراوتلی دانیشان شاعیریمیز حؤرمتلی سخاوت بیه یئنی یازین گلیشینی تبریک دئیه‌رک یئنی اوغورلار دیله‌ییرم.