(دونیا آنا دیلی گونو و یئنی ایلین(۱۴۰۴) پیشوازینا یازدیم بو غزلی)
نه باش وئریب بو شه‌هردن کؤچور قارانقوش‌لار؟!
اوچور شافاق‌لارا دوغرو چکیر آمان قوشلار؟!
گونشلی گونلریمیز بس هاواخت گلیب چاتاجاق؟!
چؤکوبدو ماوی سَمایه نه‌دن دومان، قوشلار؟!
یاز ائلچیسیدیز آخی، سیز گئدن بو باغچا- باغی
سولوبدو دؤرد فصیلین ده آلیب خزان، قوشلار!
بو قان- قادالی اوفوقده نه‌دن لَلَک اوچوشور؟!
بولود گؤزوندن آخیر داملا-داملا قان، قوشلار!
وَ قاپساییب شه‌هری قاپ- قارا کوبود گئجه‌لر،
سحر آچیلماغینا قالماییب گومان، قوشلار!
اوچوش مرامینی بیزلر اوچون سیز اؤیرتدیز
قاناد- قاناد یولونوب حالیمیز یامان، قوشلار!
دیلیم- دیلیم د…ی…دیلیم، آخ، آنا دیلیم توتولور،
دیلینده تورکو گتیر بوردا وار اومان، قوشلار!
گتیر دیلیندن اؤپوم تورکومون گؤزل چوووشو،
کدرلی‌دیر کوچه‌لر چال، اوخو اوزان قوشلار!
بو یازدا گؤزله‌ییرم گَل گیله‌م، گؤزوم، قاداسی،
شهیدلرین قانینا وئررم آندامان قوشلار!
یوخومدا نورلا چؤره‌ک، بوللوجا چیچک گؤرورم،
گَلین یوزون یوخومو، اویخونو یوزان قوشلار!
