اوشاق دئدی سئوینجک
آناسینا: چوخ شوکور!
آناسی‌سا گؤزوندن
اوره‌یینه یاش تؤکور.
– آنا داها داریخما
وار بیزیم ده باریمیز.
پشمک میلاخ نوغولو
گؤندریبدی تاریمیز.
آنا آنا قارپیزا
باخ! بیر قیرمیز چیخیبدی.
هله باخ بیر باجیما
نارین نئجه سیخیبدی!
باخ بورا بو حالوادی
شیرینلییی گؤرسه‌نیر.
آلمالاری چکنده
باجیم دئدی: آل گمیر!
هله شاختا بابانی
چوخدا گؤزل چکمیشم.
باخ آنا باخ الینده
بیر جوت وئر ال چکمیشم.
ایسته‌میشم اللری
چکدییمی گتیرسین.
تامارزینی بیزلردن
بیردفه‌لیک گؤتورسون.
بو ایل چیلله رسیمده
گئرچک اولسون بیرسی ایل.
باخ چیلله‌لیک چکمیشم،
آنا نولار سن ده گول!
پوسته‌لنمیش دوداقلا
ناغیل سؤیله آی آنا!
شاختا اولسون مهریبان
اوجاغیمیز قوی یانا!
من چکمیشم اوشاقلار
سیز چکمه‌یین، یاشایین.
شیرین عؤمور اوزانسین
دوست- تانیشی آرایین.
اوشاغین آغ سوفرادا
چکدیکلری گولوردو.
اوزده گولن آناسی
دیریلیردی، اؤلوردو.
آخی تانری! نه دئییم
بو ظولمو سن یاراتدین؟
عدالتین هانی به؟
عرصه‌میزی داراتدین.
من بیر آتا، ایشیم یوخ
سیزلاییرام ایچیمده.
سازاق طوفان قوپاریب
ائشییمده، ایچیمده.
