گؤز – گؤزه باغلادی ایکی اوره‌یی،
چکیلدی هر گؤزده مین بیر منظره.
پاییزدا آچیلدی باهار چیچه‌یی،
لال دینمز دانیشدی اوره‌ک‌لر خیلی
بیری آجیقلی‌دی، بیری گیلئیلی!

اوره‌ک‌لر تیتره‌دی اسدی یارپاق تک،
مین سیرری آچدیلار بیرجه باخیشدا؛
آخدیقجا گؤز یاشی محبت دئمک،
گؤرسندی گؤزلره مین بیر ناخیشدا؛
لال دینمز دانیشدی اوره‌ک‌لر خیلی
بیری آجیقلی‌دی، بیری گیلئیلی!

گئجه‌نین ساچینا دوزولموش اولدوز
خوروزون بانیی‌لا سوزولوب ایتدی؛
زلیخا میثاللی آغ بیلکلی قیز
اؤرتوب پنجره‌نی باش آلیب گئتدی؛
لال دینمز دانیشدی اوره‌ک‌لر خیلی
بیری آجیقلی‌دی، بیری گیلئیلی!