(۱): میرواری
دنیز قابیغینی
تانینمادان ازدیلر
ایچیندن
بیر میرواری دوغولدو؛
دونیانین گؤزلری قاماشدی
گؤزللییینه!
(۲): شیرینلییین آدی
سن، حیاتیمین مایاسی‌سان؛
قاریشدیغین هر بیر شئیه
یئنی بیر تام وئریرسن:
بئینیمه قاریشدیقدا
اوزومده گولوشه چئوریلیرسن،
نفسیمه قاریشدیقدا
جانیمی آلیشدیریرسان.
اوره‌ییم ایسه
دئمه‌یه گلمز!:
سن قاپیسین دؤینده
آددیملارینین سسی ایله دؤیونور،
اللرینده‌کی قیزیل گول‌له سئوینیر.
سن، حیاتیمین دادی،
سن، شیرینلییین آدی.
(۳): سحره کیمی…
گئجه‌نین قاتی قارانلیغینی
سحره کیمی کوره‌ییمده داشییرام؛
ظولمت کؤرپولرین
بیر بیر آشیرام،
آلتیندان کئچنده
گؤزلریم بیر- بیرینه «بویور!» دئییر،
مفتیل‌لرین یاراسی
اووجومدا قان آغلاییر.
آیاقلاریم یورغونلوقدان
یئره لای لا چالیر
یوللار قایچیلانیر؛
سحر، قیلینجی الینده
منی گؤزله‌ییر.
