«هانی او آخار- باخارلی،
ذیروه‌سی قارلی،
یاشیل اته‌یی چشمه‌لی-چایلی اولو داغلار؟»
دریندن کؤکس اؤتوروب، گؤز قاماشدیران گونَشدن، -سُوروشدو جسور قارتال.
چیمچه‌شیردی قوخوموش- لئهلی باتلاقلاردان
ایرگَنیردی شوبهه‌لی باخیشلاردان
داریخیردی قانادلارینی باغلایان قانداللاردان
آلتون شهپرینی اَسدیریب، قاققاناق چکدی قارقالارین قورولتایینا،
گولدو آیاق ایزیندن، اوزونده ایینه آتماغا یئر قالمایان،
مین‌لر کره فتح اولونموش، تاپتالانمیش تپه‌جیک‌لره،
قاققاناق چکدی آزاجیق موردارلارا سئوینن بؤر- بؤجک‌لره،
شیره قوخوسونا اوچوشان کور میلچک‌لره.
ایتی باخیشلاری، آیاق دَیمه‌میش قارلی- قیروولو ذیروه‌لره دیم-دیک باخدی،
ذیروه‌نین دوز باشینی توشلادی،
نئجه ده خوش خوشلادی!
دئمیشدی او دَلی‌قانلی فیلوسوف:
«سنین طالعین میلچک قووماق دئییل»*
*نیچه: سرنوشت تو مگس تاراندن نیست.
