بیر آن دیسکیندی روحوم
سن قاپی‌دان گیرنده!
طغیان پوسگوردو روحوم
سن قاپی‌دان گیرنده!
دوشدو منه آددیمی،
روحوم گؤر نه شاددیمی؛
بلکه سئوگی داددیمی
سن قاپی‌دان گیرنده!
گؤزلر درین دوپ – دورو،
باخیش سووال، قاش سورو؛
دئدیم: آللاه سن قورو!
سن قاپی‌دان گیرنده!
بیر شیمشک تک، شهاب تک
بیلدیم بیرده دؤنه‌جک
سنله سئویب سئویلمک
سن قاپی‌دان گیرنده!
«سید جلیل» آزدی، یاز
بئله گؤزه‌ل بئله ناز؛
گؤردوم گلیر جانلی یاز
سن قاپی‌دان گیرنده!
۱۰/۰۱/۱۳۹۷
