دویورسان‌می؟!..
ساچلاریمدا کولک اسیر،
ببه‌نک دوغور اللریم،
سس‌سیزدیر دیلیم،
دیلیم آناسیزدیر.
من یارالی اویغولاریمی کؤکله‌ییرم اومود تئلینه
تون به تون دوشسون گئجه کابوسلاری
آجی آغلاییر هر سئکانسی
آخی گؤزلریم دادسیزدیر…
دار گلیبمیش آغزیمدا دیلیم
یاپراقلی سؤزلریم لای-لای هاواسی چالیر
چای جوشدورور،
گیزلری چالیر، آت چاپیر
چاغیر گلسین صولح بویالی ماهنیلاری
قولاقلاریم رنگ‌سیزدیر…
کول بویالی آرزیلاریم اینقلاب دادیر
آرزیلاریم اینقلابدادیر
سانجیلارین یئنی دوغولموش بوداغی
هوسله‌نیر یاشیلی-
هوسله‌نیر تورونجو،
بیر قوجاق باهاری
کؤنلوم سن‌سیزدیر
دیلیم آناسیزدیر…
