اوزاقلاردا دئییلم سئوگیلیم
بولودلاردا گَزسه ده هاوالی باشیم
یئر اوزونده‌دیر آیاقلاریم
آخی «من تورپاق قیزییام»،- دئمیشدیم.
قارینجالار اؤزوندن بؤیوک دَنه‌لر داشیدیغی کیمی،
سیرتیمدا داشییرام آغیر یئر کوره‌سینی،
سَرت دونیا اوزوندن سیغینمیشام شعر دفتریمین سیجاق بوجاغینا
یارالاریمی ساریییرام چیچک قوخولو ایپک مندیلی ایله.
او قَدَر یورغونام کی؛
کهف کؤهولونون یولداشلاری کیمی
بوتون دونیانی باشیمدان آتماغیم،
اوچ‌یوز ایل یاتماغیم گلیر
قورخورام آما…
قورخورام یاتدیغیمدا ظالیم زامانین آغیر تَکَرلری کئچر اوستومدن
یئتیم قالار اوخونمامیش کیتابلاریم
یاریمچیق قالار دئییلمه‌میش سؤزلریم
اودور کی کیرپیک‌لریمین آراسینا سامان چؤپو قویورام،
بو ایکی گونلوک دونیادا،
یومولماسین گؤزلریم
اونسوز دا اوزون- اوزون مین ایللر یوخولایاجاییق،
بئزه‌جه‌ییک یوخولاماقدان، اوره‌ییمیز بولاناجاق.
یادیندادیرمی؟
دئمیشدین: هر اینسان چاپا حاضیرلانان بیر کیتاب‌دیر
سهولرله دولو،
رئداکته لازیم‌دیر اینسانا
هله دوزه‌لیش ائتمه‌لی سهولریم وار بوللوجا…
اؤزللیک‌له مین اوزلو آداملاری تانیماقدا چوووخ سویروشوب آیاغیم!
سهولرله دولو کیتاب یوز کره چاپ اولسون بئله، کیمه نه فایداسی وار؟!
درد اهلی اولاجاقسان بیر عؤمور هر آتدیغین آددیمیندان حساب چکسن
آمما الینی جیبینه قویوب وئییل ده گزه بیلرسن هئچ زادی وئجینه آلمادان،
الکتریک آغاجلاریندا،
ساختا گولوشلریندن اینسان قانی دامان،
اینسانلاری ایشیلدایان پوتونلاری آلتیندا دگرسیز بیر بؤجک سانان،
اؤزلرینی اوره‌ک یاندیران تانیدیب، اوره‌کلری یاندیران،
ائو تیکن تانیتدیریب، ائولر ییخان، اللری بیر کاسادا جلّادلارلا قان ایچن،
بیرگه یئییب، آیری سی…ن بَی‌لر کیمی!
دئمیشدین: دورو اول، آیدین اول بولاقلار سایاق
او اوجالیقدا گؤی، سنه باش اَیه‌جک
اؤزونو سنده گؤرمه‌یه آیاقلارینا ائنه‌جک
گوندوزلر گونش، گئجه‌لر آی- اولدوز، سنده یویوناجاق، اوزونو اؤپه‌جک.
چارپاشیق سیناقلاریندان باش اوجا چیخماق چتین اولسا دا،
سنین درین سئوگینه لاییق بیری اولماق اوچون دورولماغا،
دورّ(dürr) اولماغا چالیشیرام سئوگیلیم!
