https://ishiq.net/wp-content/uploads/2024/01/bashqasi.mp3
سسلندیرن: رؤیا نوایی
ایلین تزه‌لنمه گونلرینه یاخین ایدی. هاوا ایلیقلاشیب، یئر، آغیر یوخودان آییلان آدام کیمی، بیرآز سرسَم، بیرآز مورگولو، بیرآز سرخوش، آمما دلیجه سئوینجلی ایدی.
بازارین هر یئریندن بایرام اییسی گلیردی. قادین شوشه تونگ‌لرده چالیغلایان قیرمیزی بالیقلاری، یاشیل بئللرینه تزه گلین‌لر کیمی قیرمیزی روبان باغلانمیش سبزه‌لری، یئدی‌سین سور-ساتینی و اونلاردان علاوه آداملارین اوزلرینه قونان سببسیز سئوینجی چوخ سئویردی. بازار بایراما یاخینلاشدیقجا قالابالیق‌لاشیردی.
همیشه موشتریسی اولدوقلاری تانیش پالتار ساتان دوکانیندا، قادین گئیمک اوچون نئچه سئچدییی پالتار الینده پرو اوتاغینا کئچدی. گنج قیزینا ” سنین ده نظرینی سوروشماق اوچون چاغیراجام”- دئدی.
قیز “اولسون آنا‌جان”،- دئییب مهریبانجا گولومسوندو.
قادین داریسقال پرو اوتاغینین قاپیسینی آچیب، اورا گیریب قاپینی اؤرتدو.
ایلک اؤنجه اؤز یاشینا لاپ اویغون بیلدییی یَشمی رنگده دونو گئیمک ایسته‌دی. بیر آندا گؤزو آینادا اؤزوندن باشقا بیر گنج قیزا ساتاشدی. شکلی آینایا دوشَن قیز، حتمن آرخاسینددیر ساندی. کیچیک قیزی یاشدا اولاردی. اوزو نئجه ده تانیش ایدی. آمما اونو هارادا گؤردویونو خاطیرلامیردی.
قادین اونو آینادا گؤررکن دیکسیندی.
– باغیشلایین خانیم…. سان کی سیز پرو اوتاغیندایمیشسیز… من….من… یانیلمیشام. سن آللاه باغیشلایین…اوتاقدان چیخماق ایسته‌دیکده آیناداکی قیز محبتلی گؤزلرینی اورتا یاشلی قادینین گؤزونه تیکدی، اهمالجا قولوندان یاپیشدی:
– یوخ… یانیلماییبسیز. من بورادا سیزه اَینیزه اَن یاراشان، اویغون پالتار سئچمه‌یه کؤمک ائده‌جم.
قادین بیربیر پالتارلاری گئییردی. آینادا کی قیز:
“نه‌دن بو قدر توتقون رنگ‌لر سئچیرسینیز جانیم؟! بو روحیه‌نیزه هئچ یاخشی دئییل. سیزین یاشینیزا اویغون، گؤزل و بویاسی اوره‌ک اوخشایان پالتارلار وار.
سونرا آینادان قادینا نئچه خوش بویاسی اولان دون، کُت دامن، تونیک- شالوار اوزاتدی. ” گؤرون بونلار نئجه‌ده آلدیغینیز گیله‌نار ناخیشلی سرویسینیزله یاراشاجاق”. قادین تعجوبلندی. او قیز اونون گیله‌نار ناخیشلی سرویس آلدیغینی هاردان بیلیردی گوره‌سن؟!
قادین پالتارلاری قیزدان آلماق اوچون،آرخاسینا دؤنمک یئرینه کاریخیب، آینایا ساری ال اوزاتدی، اللری آینانین درین‌لیگینه کئچدی!! آمان آللاه او قیز آینادایدی سانکی!!
دیکسیندی. اوره‌یی ایچینه دوشدو. سئحیرلی آینالار دونیاسی باره‌ده رومانلار اوخوموشدو، فیلیم‌لر گؤرموشدو. آیناداکی قیز اونو دا، آینالار دونیاسینا چکمه‌سیندن قورخدو. چوووخ قورخدو…
عجله‌لی قیز اؤنردییی دونون بیرینی گؤتوروب، پالتارلارینی گئیینیب، مانتوسونو اَینینه چکدی، چانتاسینی گؤتوروب، پرو اوتاغیندان چیخدی.
پالتار ساتانا:
” ساغ اولون. اوتاغا گؤندردیگینیز خانیم‌قیز، منه یاخشی سئچیم ائتمکده چوخ کؤمک اولدو. داها قیزیمی چاغیرماق دا لازیم اولمادی”،- دئدی.
– من گوندردیگیم خانیم‌قیز؟! هانسی قیز؟! ساتیجی شاشیریب قالمیشدی!
سیز بورادا اولان زامان هئچ بیر خانیم بورایا گلمه‌ییب. یالنیز نئچه قیز- گلین ائله ویترین اؤنوندن باخیب، سوووشوبلار”. قیزی دا ساتیجی‌نین سؤزونو تصدیقله‌دی.
قادین اونلارا ثبوت ائتمک اوچون، بیر ده عجله‌لی چیخدیغیندا، اونوتدوغو پالتارلاری گتیرمک اوچون بیر داها پرو اوتاغینین قاپیسینی آچدی. اوتاق بوم- بوش ایدی. آینادا کیمسه یوخ ایدی!!
خیالیندان کئچیب بلکه، داها بیر سؤز دئمه‌دی. پالتارین پولونو حسابلاشیب پاساژین زالینا چیخدیلار.
قادین اوره‌یینده چوخ هورکموشدو آمما عاغلینی ایتیرمه‌یه اتهاملانماسین دئیه، داها قیزینا، کئچن ماجرانین اوستونو وورمادی.
آمما ائله فیکیرده قالمیشدی، آینادا کی گنج قیزین مهربان اوزو، سیجاق سسی بیر آن بئله گؤزو اؤنوندن ایتمیردی.
آخشام یوخودا، اؤزونو سونسوز- بوجاقسیز قارانلیق بیر چؤللوکده گؤردو… سوسوزلوغوندان دیلی آغزیندا کَسسه‌یه چؤنموشدو. اوره‌یینی دهشت بوروسه ده بیر پیالا سو ایچمک اوچون بوتون وارلیغینی وئرمه‌یه حاضیر ایدی. شاشقین دؤرد بیر یانا باخدیقدا، اوزاقدان دَوه زینقیرووسو سسی ائشیتدی. قولاق یاپیرتدی. قدملرینی اورا طرفه یئیینلتدی، اوردا بیر سو قویوسو، قیراغیندا دا قرقره‌یه باغلانمامیش بیر وئدره گؤرونوردو. قویونون نئچه مئتیرلیگینده دَوه کَروانی گئدیردی.
قویویا باخدی. زیل قارانلیق رغمینه قویونون ایچی ایشیقلیقدان پار- پار پاریلداییردی. عجله‌لی وئدره‌نی قویویا سالدی. عجبا!! همن آیناداکی گنج قیزین، مهربان، گولومسه‌ین جسدی قویونون تکینده ایدی!! قادین هؤوشنه‌لی دالی آتیلدی. هؤنکورتو سسینه اؤزو اویاندی. قان-تر ایچینده ایدی. اوره‌یی گوپ- گوپ گوپبولده‌ییردی. دیلی آغزیندا کسسک کیمی قوروموشدو. بوغازی آجیییب قاشینیردی.
نئچه واختدان بَری تکرار-تکرار بو یوخونو گؤروردو.
او، آینادا کی گنج قیزی تانیمیشدی!!
