بیر گون آتا-آنام‌لا
چیخدیق شهردن کنار-
دولانماغا، گزمه‌یه،
طبیعتی سئیر ائدیب
قوجاغینا گیرمه‌یه.
گیردیک آغاج‌لا دولو
یاشیل اوت-آلاغلیغا؛
گونش یئمک وئریردی
چمنلره، یارپاغا.
گؤیرتی گؤرکمیندن
قوشلار سسه گلیردی،
بیر-بیری‌یله سئویشیب
اؤپوشوردو، گولوردو.
گاه بیر دووشان قاچیردی
گاه قوش قاناد آچیردی،
گؤلدن قورباغا قالخیب
قورولداییب اوچوردو.
بیردن یاغیش باشلادی
یارپاقلار آلقیشلادی،
گؤل گؤیدن گوللـه‌لندی
بالیقلار سیلکه‌لندی.
سیغیرچین سو ایچیردی،
قالخیب شام آغاجیندا
گؤزون یوموب چیمیردی.
حاجی‌لئیلک آغ باجی
گزمیردی هر آغاجی.
بیر دسته چؤل اؤرده‌یی
یئمیشدی قورد اوره‌یی؛
اووچو گؤزوندن کنار
ائدیردیلر های-هارای.
قامیشلارین باشیندا
بیر قوش ککیل باشیندا
داراققون آدلانیردی
تک‌لیک‌دن اودلانیردی.
یولغونلار چیچکله‌نیب
هر بویادان رنگ آلیب
سپیلمیشدی هر یانا
گؤز اولموشدو جئیرانا؛
جنّت ایدی اوشاقلار
ائشیتمکله کیم آنلار!؟
بیردن یاغیش کسیلدی
گؤی‌قورشاغی قورولدو؛
گؤلون سویو یوسونلو
پلمه‌لرله دولو‌یدو،-
ائله‌بیل کی، شوشه‌دی.
چاغیردیم دئدیم آتا
«بو یاشیللیق هارادی؟»
دئدی:
«بورا مئشه‌دی»
یک پاسخ
سلام چوخ گؤزل قلمیز یازار اولسون