غزه؛
اورتالیقدا قالمیش یئتیم اوشاق
بیری ساچلارینی تومارلایار
اونو باشینا قاپاز چالار.
سحرلری قورشون بانی‌لا آچیلار «گون» اوزونه
گئجه‌لری هؤوشنه ایچینده قاپانار گوندوزونه.
انسانلاری سئور تورپاغینی،
تورپاق دا اؤیله‌جه-
هرگون دوغمالارینی باغرینا باسار اینجه- اینجه.
غزه؛
قیزجیغازلاری گلینجیک نه‌دی بیلمز
اوشاقلاری ائوجیک نه‌دی بیلمز
بوردا رؤیالار دا تئز اری‌یر
بوردا خیاللاری توستو-دومان بورویر.
سماسیندا دورنالار یوخ
دمیر قاغایی‌لار اوچار،
اوچار
اوچار
اوچار.
قارا قانجیل بولودلاریندان اؤلوم یوکلو دولو یاغار،
گؤی اوزونون قاپی‌لاری دا اوزونه باغلانار.
غزه؛
اورتالیقدا قالمیش یئتیم اوشاق
بیری ساچلارینی تومارلایار
اونو باشینا قاپاز چالار.
مهر ۱۴۰۲- موغان
