{دون گئجه
یوخو، باشیما دوشموشدو
تانریم، دلی اولماغیمدان قورخموشدو؛
بیر ماسانی پایلاشدیق
خیسین – خیسین چایلاشدیق؛ }
سوردوم: تانریم دئه هارداسان،
کؤیوندن خبرین وارمی؟!
بو ائوجیکدن، بو کومادان،
کویوندن خبرین وارمی؟!
سحرینده دان بوغولور،
گونش، چیخمادان بوغولور،
نئچه نئچه جان بوغولور،
هاییندان خبرین وارمی؟!
حیات اوچور کوچه‌لردن،
سئوینج کؤچور کوچه‌لردن،
اؤلوم کئچیر کوچه‌لردن،
ساییندان خبرین وارمی؟!
لاخ چیخیر یومورتالارین،
کیفسه‌میش گون‌اورتالارین؛
قان آغلاییر یوخون- وارین
واییندان خبرین وارمی؟!
بیت دوشوب کورکونه نه‌دن؟!
اود دوشوب بؤرکونه نه‌دن؟!
اؤزو سفیل، یاددان گلن-
داییندان خبرین وارمی؟!
{باخدیم گؤزلرینه، باخدیم،
دویدوم دولوخسوندوغونو؛
گؤزلریندن اوخویوردوم
فالانین لاخ اولدوغونو.}
دی – ۱۴۰۱
