حق چای کیمی دریایه آخیب یول تاپاجاقدیر
داش آتماق‌ایله کیمسه اونو چؤندره بیلمز
دونیادا قارانلیقلار اگر جمع اولا باهم
بیر خیرداجا شمعین ایشیغین سؤندوره بیلمز
گؤرکملی اوستاد شاعر «یداله مفتون امینی» عؤمرونون ۹۶نجی ایلینده آذر آیی‌نین ۱۰نجی گونو یاشادیغی تهران شهرینده حیاتلا ابدیلیک وداعلاشدی. عائله‌سی‌نین خبر آژانسلارینا وئردییی معلومات اساسیندا، تاسفله اوستاد مفتون اوره‌ک انفارکتی سببیندن حیاتینی ایتیرمیشدیر.
1305نجی ایلین خرداد آیی‌نین ۲۱ده (سیجیللیسینده ۱۰ بهمن ۱۳۰۲ یازیلیبدیر) «جیغاتی(زرینه‌رود)» چایی‌نین کناریندا یئرلشن «سایین قالا»نین «هولاسو» کندینده دونیایا گؤز آچان «یداله امینی» ایلک و اورتا تحصیلاتینی تبریزین «تمدن»، «رشدیه» و «فردوسی» مدرسه‌لرینده، عالی تحصیلاتینی ایسه تهران دانیشگاهی‌نین حقوق فاکولته‌سینده بیتیرمیش، ۱۳۲۸دن ۱۳۵۹نجی ایله‌دک محکمه حقوقشناسی کیمی فعالیت ائتمیش، ۳۱ ایلدن سونرا تقاعده چیخمیشدیر.
اوستاد «مفتون امینی»نین ایلک شعری ۱۳۲۰نجی ایل فارس دیلینده «راهنمای زندگی» مجله‌سینده و ایلک شعر مجموعه‌سی ایسه ۱۳۳۶نجی ایل «دریاچه» آدیندا «بانک بازرگانی» طرفیندن نشر ائدیلیب، آنجاق اونو اؤلکه مقیاسیندا بیر تعهدلی شاعر کیمی تانیتدیران «شمس» انتشاراتی طرفیندن ۱۳۴۴نجی ایل یاییلان «کولاک» عنوانلی شعر مجموعه‌سی اولوبدور. اوستاد مفتون بو کیتابین نشری ایله یاناشی تبریز ضیالی‌لاری او جومله‌دن: صمد بهرنگی، بهروز دهقانی، علیرضا نابدل، حسن روزپیکر، بهروز دولت‌آبادی، غلامحسین فرنود، علی اکبر ترابی، غلامحسین ساعدی و … دیگرلری ایله یاخین دوستلوق و امکداشلیق علاقه‌سی یاراتمیش و «آدینه مهد آزادی» هفته‌لییینده «مفتون» و «م. ا. آذرنگ» امضالاریلا شعرلرینی و تورک شاعری ناظیم حکمت و آذربایجان شاعرلری علی‌آغا کورچایلی و علیرضا نابدل‌دن فارس دیلینه ائتدییی ترجمه‌لرینی نشر ائتمیشدیر.
اوستاد مفتونون حیات و یارادیجیلیغیندا قیرخینجی ایللرین سیاسی – اجتماعی آب و هواسی‌نین دانیلماز تاثیری اولموشدور. بئله کی اونون یارادیجیلیق دؤرورونون دؤنوشلرینی ده همن ایللرین تاثیری کیمی ده‌یرلندیرمک اولار. شعرلری‌نین آنا خطینی سوسیال موضوعلار، گله‌جه‌یه اومید و حاقسیزلیقلارا اعتراض دویغولاری تشکیل ائده‌ن شاعر، سونراکی ایل‌لر: انارستان(۱۳۴۶)، نهنگ یا موج(۱۳۵۷)، فصل پنهان(۱۳۷۰)، یک تاکستان احتمال(۱۳۷۶)، سپیدخوانی روز(۱۳۷۸)، عصرانه در باغ رصدخانه(۱۳۸۳)، بومرنگ(۱۳۸۴)، من و خزان و تو(۱۳۸۵)، شب هزار و دو(۱۳۸۶)، اکنون‌های دور(۱۳۸۷)، از پرسه خیال در اطراف وقت سبز(۱۳۸۹)، جشن واژه‌ها و حسّ‌ها و حال‌ها(۱۳۹۱)، طلایی، خاکستری، رگبار(۱۳۹۳)، گزینه اشعار(۱۳۹۳)، مستقیم تا نرسیده به صبح(۱۳۹۷) شعر مجموعه‌لرینی فارس دیلینده، عاشقلی کروان(۱۳۵۸) و آجی چای(۱۳۹۵) عنوانلی شعر مجموعه‌لرینی ایسه اؤز آنادیلی آذربایجان تورکجه‌سینده نشر ائتمیشدیر.
اوستاد مفتون امینی‌نین شعرلرینی معاصرلرینین اثرلریندن فرقلندیرن آذربایجان مدنیتی و خالق یارادیجیلیغی‌نین اونون دویغولاری و خاطیره‌لرینه دریندن هوپماسی‌دیر. اوسلوب، دوغما اوبرازلار، ایفاده طرزی و سؤز آهنگی مفتون یارادیجیلیغی‌نین اساس تراوتی و شیرینلییی‌دیر. بو جهت‌لر اونون فارسجا شعرلرینه ده اؤز تاثیرینی بوراخمیشدیر و بو دا ایستر ایران مقیاسیندا، ایسترسه آذربایجان ادبی اجتماعیاتی‌نین نظریندن یاندا قالماییبدیر. اوستادین ۷۰ ایل‌لیک ادبی اجتماعی فعالیتینی ده‌یرلندیرمک مقصدیله ۱۳۹۵نجی ایلین خرداد آییندا، «ساهر ادبی-مدنی درنه‌یی» و تحریریه هیاتینده یاخیندان امکداشلیق ائتدییی «آذری فصلنامه‌سی» طرفیندن اوستادین ۹۰ایل‌لیک آد گونو قید ائدیلمیشدیر. بو مراسیمده اوستادین عائله عضولری، یاخین دوستلاری و بیر سیرا آذربایجان یازیچی و شاعرلری اشتراک ائتمیش و اوستاد حاقیندا اؤز اوره‌ک سؤزلرینی سؤیله‌میش‌لر.
بوگون اوستاد مفتون امینی‌نین بارلی بهرلی عؤمور و یارادیجیلیغینا سون نقطه قویولموشدور. بیزیم اوچون بو بیر آغیر ایتگی‌دیر. آشاغیدا آدلاری چکیلن آذربایجان ادبی مدنی درنکلرینین امکداشلاری آدیندان اوستادین ایتگیسینی اونون حؤرمتلی عائله‌سینه، ادبی مدنی اجتماعیاتیمیزا و اوستادی سئوه‌ن بوتون اینسانلارا باشینیز ساغ اولسون! دئییریک و شرفلی خاطیره‌سینی عزیزله‌ییریک.
آذری فصلنامه‌سی
ساهر ادبی- مدنی درنه‌یی
صابر ادبی انجومنی
ادبیات سئونلر گروهو
ایشیق – آذربایجان ادبیات و اینجه صنعت سایتی
۱۱/۰۹/۱۴۰۱
یک پاسخ
روحوشادویولی گئدرگین اولسون.