چانتامدا گئجه وار
دوداقلاریمدا قابیقلانان آغری؛
گئدیره‌م
قونشو کدره قوناق گئدیره‌م،
اللریمده باتان،
گؤزلریمده دوغان گونشله گئدیره‌م؛
هئچ نه یوخ منده
هئچ نه‌یی ده ایسته‌میره‌م
یئتمیش یئددی اوغلو اولان «آغ آنانی» بئله ایسته‌میره‌م…
ماوی ده‌نیز ایدیم
گوُل‌لنمیشَم
آجی یاغیشلاری ایچیره‌م ایندی
جان وئریره‌م هؤرگولَنمیش تورپاقدا
بوشلوق بئشییی‌یَم
سوسقونلوق ایلییی؛
ایسته‌میره‌م
قاتناقلانان یازی ایسته‌میره‌م،
ساختا سئوینجی،
بو قوخونو
دایازلیغی ایسته‌میره‌م.
کَسَه یولدور بو یول، قیسا یول
گئدیره‌م،
قونشو کدره قوناق گئدیره‌م…
