یلدا گئجه‌سی
قارانلیق باشلانیب سکوت سسله‌نیر
قوجامان داغلارین گؤزو قارالیر
ایچینده آغلاییر چشمه‌لر چای‌لار
قارانلیق ایشیقدان ایندی کام آلیر
اولدوزلار یاواشجا یاخینلاشیرلار
گؤز آلتی بیربیره اوغرون باخیرلار
سکوتون سسیندن زاق – زاق اسه‌رک
سوزولوب سرعتله گؤزدن آخیرلار
دنیزین اوستونده قات – قات قارانلیق
دنیزین دالغاسین سوراغلاشیرلار
دالغالار باشینی دؤیور ساحیله
ساحیلدن اومودسوز اوزاقلاشیرلار
مئشه‌دن سس – سمیر قولاغا گلمیر
گؤی دونون سویونوب قارا بورونور
آلیبدیر آرایا بولودلار آیی
دیدیبدیر یاناغین آی دا سورونور
سکوتون نعره‌سی سسله‌نیر بئله
قارانلیق حؤکم ائدیر بو کائیناتا
آلقیشلار،آلقیشلار، قارانلیقلارا
یئتیریب بیزلری بو شن حیاتا
قوشلارین آز قالیر باغری چاتداسین
گؤزلرین تیکیبدیر گؤیلر قیزینا
نه گلیب گؤره‌سن سؤیلردی قوش‌لار
سحرین ائلچیسی دان اولدوزونا
سحرین نسیمی سکوت سسیندن
توتولدو قانادی اسه بیلمه‌دی
آمما کی بیر قوشون حزین نغمه‌سین
قارانلیق نه سکوت کسه بیلمه‌دی
سکوتی سیندیردی قوشون نغمه‌سی
اومودسوز دالغادا اومود چاغلادی
چاغلانمیش گؤره‌رک لای – لای دالغانی
سئوینجک اولاراق بولود آغلادی
بیر قوشون نغمه‌سی بیر داش اولاراق
دوشدو کائیناتین دورموش گؤلونه
دیسکینیب کائینات تاپدی اؤزونو
سؤیله‌دی اورمانا،داغا چؤلونه
گول‌لردن باغلایین دسته – دسته سیز
او قوشون بوینونا چلنگ توخویون
ال اله وئره‌رک بوتون کائینات
او قوشون نغمه‌سین بیرگه اوخویون
قارانلیق گئجه‌نین آردینجا یقین
آیدین بیر سحر وار، پارلاق گونش وار
بو گئجه نه‌قده‌ر اوزون اولسادا
ازلدن اولماییب ظولمت پایدار
ال اله وئره‌رک بوتون کائینات
دان یئری سؤکولدو، سحر آچیلدی
بیرلیکدن یاراندی ایشیق بیر حایات
اوفوقدن یئنه‌ده گونش ساچیلدی
