اؤلوم آسوده باهار اؤلکه‌سی‌دیر
کبری میرحسینی
(«آننا آقایی»*نین روحونا سونولور…)
بیر زامانلار تکجه خزان کوله‌ییندن
قوپوردو یارپاق‌لار
قیریلیردی بوداق‌لار.
قیریلارکن بیتیردی هرنه
و بیتیشیردی کؤزمک باغلانمیش یارالار
و باشلانیردی یئنی بیر حیات.
ایندی هئچ نه اؤز یئرینده دئییل؛
نه ایناندیغین فصیل‌لر،
نه گووه‌ندییین اوره‌ک‌لر.
گؤرورسن بنؤوشه یومولمادان
اله‌نیر توم تومورجوق‌لار
نه بارلانماغا اومیدین قالیر
نه آنیلماغا.
یازین اولینده
گؤزونده بره‌لیر بیر هاچا
و همن همن
قیریلدیغینی گؤرورسن ان بارلی چاغیندا؛
هر نه ال اله وئریر سوی قیریما
اوره‌یی‌نین قیزغین حالیندا
اؤلو توزو قونور سئوگی دولو اورکلره،
تکجه چیچک‌لر دئییل
اوزولور آغاجدان بوداق‌لار.
آغلار گولر چاغیندا
توش گلیرسن کوله‌یه،
قیریلیرسان یاشیللانماغا باشلادیغین حالدا
یومولورسان آچیلاندا.
هر گلیشین بیر گئدیشی وارسا!
چیچک‌لرین شاختایا دوشوب یانماسی
ان یارالی گئدیش‌دیر؛
ان نیسیگل‌لی قیرغین…
*: «آننا آقایی»؛ غربت اؤلکه‌ده کرونا ویروسا یولوخدوغوندان حیاتینی ایتیرن طب اؤیرنجیسی
یک پاسخ
دوستومون گوزل قیزی ، آننانین اولومو حاقدا آتاسینا بو بیر بندی یازا بیلدیم
شیرین ناغیل ایمیش او نغمه دئمه
یوخسا ظالیمادا روا گورمزلر
چالین چارپاز داغ چکیلدی سینه مه
بس دئییردی گولو قونچه درمزلر!!