آذربایجانلی شاعر و ترجمه‌چی کرونا سببیندن حیاتینی ایتیردی
چوخ تاسفله، یاییلان خبرلر اساسیندا آذربایجانلی شاعر و ترجمه‌چی «احمد واحدی» (آیدین روشن) کرونا سببیندن حیاتینی ایتیرمیشدیر.
1352نجی ایل تبریز شهرینده دونیایا گؤز آچمیش و تحصیلاتینی تهرانین علامه طباطبایی دانشگاهیندا «ژورنالیسم» ساحه‌سینده بیتیرن آیدین روشن، فروردین آیی‌نین ۱۶سیندا کرونا ویروسا یولوخدوغوندان تبریزین امام رضا خسته‌خاناسیندا حیاتینی ایتیرمیشدیر.
آیدین روشن‌ین ادبی فعالیتی داها آرتیق تورک مدرن شعری‌نین فارس دیلینه ترجمه‌سی اولموش، عینی حالدا اونون اؤزونونده شعرلری «اورتاق سوچ‌لار» آدیندا نشر ائدیلمیشدیر. آیدین روشن امکداشی «میرندا میناس»لا برابر:
1- «تنهایی تقسیم نمی‌شود» (تورکیه‌نین مدرن شعریندن سئچمه‌لر)،
2- «برای عاشق شدن دیر است برای مردن زود» (تورکیه‌نین مدرن شعریندن سئچمه‌لر)
3- «آلا تورکا» (تورکیه‌نین مدرن شعریندن سئچمه‌لر)،
4- «پرنده چهار بال» (فاضل حسنو داغلارجانین چارپارالاریندان سئچمه‌لر)
5- «ژنرال جنگ‌های سیب‌زمینی» (رسول یونانین تورکو شعرلریندن ترجمه‌لر)،
6- «خشونت دیپلماتیک: اسرار تاریک قتل جمال خاشقجی»
7- «آلمالاردا دیش ایزی» (بلند اجویت‌ین لیریک شعرلری)،
8- «رامیز روشن‌ین سئچیلمیش شعرلریندن ترجمه‌لر»
کیتابلارینی نشر ائتمیشدیر.
«ایشیق» – آذربایجان ادبیات و اینجه‌صنعت سایتی- امکداشلاری آدیندان باجاریقلی شاعر و ترجمه‌چی «احمد واحدی» (آیدین روشن)نین ایتگیسینی ادبی جمعیتیمیزه، شاعرین حؤرمتلی عائله‌سینه، دوست و تانیش‌لارینا باش ساغلیغی وئره‌رک، خاطیره‌سینی عزیزله‌ییریک.
«ایشیق» – آذربایجان ادبیات و اینجه‌صنعت سایتی-
۱۶/۰۱/۱۴۰۰
یک پاسخ
چوخ آجی خبر ،الله رحمت ائله سین و حؤرمتلی عاییله سینه بؤیوک دؤزوم وئرسین روحو شاد آدی یادی قالارقی ?