آغ ایله قارانین کنتراستی
مرتضی مجدفر
بیرینجی روایت
بؤیوک قارقا، قارا اوزو و دیمدییینین اوستونه ووردوغو آغ ماسکی، قانادلاری ایله دوزلده‌رک، او بیریسی بالاجا و آز یاشلی اولان قارقایا دئدی: «نه دن سن ماسک وورمامیسان؟!»
بالا قارقا: «تکجه قورخاقلار ماسک وورارلار»، دئدی.
بؤیوک قارقا جاواب اولاراق، دئدی: «آنجاق منی یوز ایل قاباق اؤلومدن قورتاران، ائله بو ماسک اولدو. او زامان ایندی کی کیمی دئییل‌دی. ماسک‌لاری اویان- بویاندان تاپان آغ پارچالارلا دوزلدیردیک. ائله ایندی کی کیمی ده گؤرکمی چوخ گؤز‌ل اولوردو: آغ ماسک ایله قارا قارقالارین بیرلشمه‌سی!»
بالا قارقا، حیرصله سوروشدو: «یوز ایل قاباق؟! اوندا سن وار ایدین‌می؟!»
بؤیوک قارقا دئدی: «پس نئجه کی وار ایدیم… بیرینجی دونیا محاربه‌سی ایللرینده، هر یئری بوروین آنفلوانزا ناخوشلوغونو دئییرم. تخمینا یوز ایل کئچیر او زاماندان!»
بالا قارقا، یئنه حیرصله‌نه‌رک دئدی: «آخی سن نئجه وار ایدین او زامان؟ نئچه یاشین وارمی سنین مگر؟!»
بؤیوک قارقا، کیچیک قارقانی اونا ساری گلدییینه گؤره، هده‌له‌یه‌رک، دئدی: «بیر آز علمی کیتاب اوخو جاوان دوستوم! قارقالار ایکی یوز ایله یاخین عؤمور سورورلر. منیم ایندی یوز اوتوز بئش یاشیم واردیر. بیز تجربه‌لریمیزله یاشاییریق! ماسکین یوخدورسا، وئریم خدمتینیزه؟!»
ایکینجی روایت
بالاجا قارقا، قارا اوزو و بوتون دیمدییینین اوستونو، آغ ماسک ایله بورویه‌ره‌ک، ایکی آیاقلاری ایله هوپبولا- هوپبولا، آستا – آستا پارکدا بویاندان، اویانا اوچان بؤیوک قارقایا دئدی: «نه دن سن ماسک وورمامیسان؟!»
بؤیوک قارقا جاواب اولاراق، دئدی: «آللاه رحمتینه گئدن آتامدان ائشیتدیییمه گوره، ایندی من ۱۳۵ یاشیندا اولمالییام!»
بالا قارقا، حیرصله دئدی: «یاخشی؟ نئیله‌یک ایندی؟ بونون ماسک ووروب، وورماماغا نه دخلی وار؟!»
بؤیوک قارقا، اوزه‌ل بیر غرورلا دئدی: «ائشیتمه‌میسن قارقالار ۲۰۰ ایل عومور سورورلر؟ پس بئله‌لیکله منیم ۱۳۵ یاشا چاتدیغیمین معناسی بو دور کی من بیرینجی دونیا محاربه‌سی ایللرینده، بوتون دونیانی بوروین آنفلوانزا ناخوشلوغونو گوررکن، ماسک وورمادان و قانادلاریمی مرتب اولاراق سو و صابین‌لا یومادان، دیری قالمیشام!»
بالا قارقا دئدی: «سیز قوجا قارقالارین الیندن هارایا قاچمالییق؟ هاردان بللی‌دیر سنین ۱۳۵ یاشین وار؟! عزیزیم! قوجامانیم! بیر نئچه یئنی کیتاب اوخو، تدقیق‌لره ده بیر باش وور. قارقالارین D.N.A لری‌نین اوستونده آپاریلان یئنی تدقیق‌لر اساسیندا، قارقالار لاپ چوخو ۲۵ یا خود ۳۰ ایل عؤمور ائدیرلر. بئله‌لیکله منیم آلتی یاشیم اولسا، سنین ده داش چاتلاسا، لاپ چوخو ۲۵ یاشین اولاجاقدیر عزیزیم! داها قارقالارین ۲۰۰ ایل یاشادیقلاری، افسانه کیمی بیر زاددیر… ماسکینیز یوخدورسا، وئریم خدمتیینیزه؟!»
یک پاسخ
مجدفر جنابلاری،
دیرلی و متفاوت بیر یازی ایدی. من بیندیم. قلمینه ساغلیق.