لعنت اولسون ساواشا و اونو تؤره‌دنلره!/ سحر خیاوی
(شهیدلر «ساسان‌ امیرخانی» ، «علی بیرامی» و باشقا گنج شهیدلریمیزه سونولور)

بنگ…بنگ…بنگ…بنگ…
قونشو باققالدان تزه اویونجاق توفنگلریمیزی آلمیشیق. بو توفنگلر داها سو فیشقیردان اوشاق اویونجاغی دئییل. عسکرلر گؤتورن توفنگلره بنزه‌ییر. اود پوسکورور، شاققیلداییر.
کوچه‌میزده سیمان پاکتلرینین ایچینی کوهنه پالتارلا دولدوروب سنگر قورمیشیق. بیر طرف دوشمان اردوسو، بیر طرف بیز.
بنگ…بنگ…بنگ…بنگ….
آلاو یاغدیریریق بیربیریمیزه.
– هونرین وار چیخ سنگردن ساسان. باشینی تورب کیمی ووروب سالارام.
– صبر ائله الان من بوغازینی نیشان توتارام.
بنگ…بنگ…بنگ…بنگ…
من فیلیملر سایاغی مثلن هله دلیک-دلیک اولونجا مقاومت گؤستریب اؤز دؤره‌مه فیرلانیرام. آنالاریمیز پنجره‌دن باخیب اوره‌کدن گولوشورلر. من یئره ییخیلیرام. باشی کسیلمیش قوش کیمی چابالاییب اؤلورم. آنام گوله-گوله: «قورتاردینیزسا گلین ناهارینیزی یئیین ایگیت عسکرلریمیز. ناهار چاغی آتش بس. سونرا ساواشی داوام ائدرسینیز».
من هله تورپاق اوستونده اوزانمیشام.
ساسان: «بونا باخ. گؤر نئجه ده شهید قیلیغینا گیریب مثلن».
بؤیرومه بیر بالاجا تپیک ووروب: «بیلیرم یالانچی اؤلوبسن علی. اویون بیتدی اوغلان، دور گئدک ناهارا».
من ایسه گوله-گوله دورورام…
گؤز باخدیقجا سونسوز بوجاقسیز چؤللوک‌دور. داغ-دره‌دیر. بوردا دوغروچو سیلاحلار فیشیلداییرلار. گؤز قیرپیمی اونلار اؤلوم قولاغینین دیبیندن کئچیر. بدنینی اوشودور.
باتی مرزینده یئنه پژاک لا آتیشمامیز وار.
آااااخ….لاپدان بوغازیمدا بیر یاندیریجی آغری حیس ائدیرم. الیمی بوغازیما آتارکن فانتاللایان ایستی قان اووجومو دولدورور. ییخیلیرام. یئر باشیما فیرلانیر… کوچه‌میزدیر. آنام پنجره‌دن گو….یوخ…به نه دن اوزونو دویوب آغلاییر؟!! او بیلیر آخی منیم اونون آغلاماسینا داوامیم یوخدو!!
ساسان گوله-گوله: «علی قالخ آیاغا، بیلیرم یالانچی اؤلوبسن» دئییر.
من قالخا بیلمیرم. سویوق تر باسیر اؤزومو. باشی کسیک قوش کیمی چابالاییرام. بلکه دوغروچو اؤلوم بئله‌یمیش؟!! آمما من گنجم هله.آاااخ….آاااخ آنا….کال آرزولاریم…
بیر آن نئچه مئتیرلیکده، گؤزوم ساسانا ساتاشیر. اوره‌ییندن گولله‌له‌نیب. – «قالخ آیاغا….بیلیرم یالاندان اؤلوبسن» دئمک ایسته‌ییرم. اینجاریم یوخدو. الیمی اونا ساری اوزادیرام چاتمیر..‌.
آنا اوغول جنازه‌سینی هؤنکورتو ایله قارشیلاییر. اوشاقلیق اویونلاری گؤزلرینده جانلانیر. گؤردوگونه اینانا بیلمیر. آرزولاری یالان اولوب. -«قالخ آیاغا علی، بیلیرم یالانچی اؤلوبسن، یورغون بالام، چای چؤره‌ک ائوده حاضیردیر» دئمک ایسته‌ییر. سؤزلری بوغازیندا قورویور. سانکی بو دفعه اویون دئییل. علی پرچم اوستونه چکیلمیش تابوتدا اللر اوستونده دالغالانیر. عسکرلیک پالتاریندا شکیلی تابوتون اوستوندن آناسینا گولور.
صاباح مین کوچه‌نین آدینی دا «علی» قویسالار آنانین نیسگیلی ساغالمایاجاق. او قبر ائوینه‌جه ناکام بالاسینا یاناجاق. لعنت اولسون ساواشا و اونو تؤره‌دنلره!
سیاستچی‌لر
ساواشا گئتمزلر
آزدیرلار
و…اوزون عومورلو
آمما…
عسکرلر…
عسکرلر…
غملی قیسا حیکایه‌دیرلر…