هر گون سیننیم یوخاری گئدیردی. یاواش- یاواش اللینی رد ائلیردیم. ننه باجیمین هفته‌ده اوچ دؤنه ائلچی گئتمک‌لری‌نین هئچ ثمری یوخودو. هارا گئدیردیک منی گؤرجک بیری دئییردی: «منیم قیزیم درس اوخویاجاق؛ هله اره گئتمک ایسته‌میر.» او بیری دئییردی: «سن چوخ یاخجی اوغلانسان؛ دوزدو بیرآز سیننین یوخاری‌دی. اؤز آرامیزدی، بیرآز دا قیافه‌دن دالیسان؛ امما منیم باجیم خارجی اؤلکه‌یه گئتمک خیالیندادیر.» باشقاسی دئییردی: «قیزیم جوان، خوش‌تیپ، باربی پوللو اوغلان آختاریر؛ سنین نه قیافن وار، نه پولون.» آخیردا باجیم مسجیددن چئری چپ انداز بیر دول آرواد تاپمیشدی، اودا دئییردی: «بیر آیاجا اون‌بئش کیلو وزنینی آزات؛ گئت او فیل بورنونا اوخشار بورنووی وئر عمل ائله‌سینلر. ۱۳۹۶ سکه، ۱۵۰ متر آپارتمان ولیعصرده، بیردانا باغ باسمینجدا و بالاجا بیر اللی آتمیش میلیونولوق ماشین کبینیمه سال، توی خرجین، اون قلم بؤیوک وسیله‌لری قبول ائله، اوندا گله‌رم».
بو احوالاتی ائشیدندن سونرا ائولنمه‌گین خئیریندن کئچدیم. بیر داش آتدان، بیر داش اوستن قویوب، تاماه دیشیمی چکدیم. بیر ایکی ایلده بو جور کئچدی. بیر گون مترودا گئدیردیم، گؤردوم باشی فئر جوان بیر اوغلان چینینده کوله، بتر زیلله‌نیب منه. گؤزون، گؤزومدن گؤتورمور. آز قالیردیم یاپیشام یاخاسیندان دئیم: «هن بالا، اوزومده آی بیتیب؟» بو حالدا جوان اوغلان ال تلفونون جیبیندن چیخارتدی. بیر نفره زنگ ائله‌دی، دئدی: «سیا! سن دیین آدامی تاپمیشام، سن اؤله‌ًسن یئر اوزون دولانسایدین بئله‌سین تاپانمازدین. دوز ائله بیل آران قوتان میمونودو. باور ائله، اؤتورسن میمونلارین ایچینه چتین آییرا بیلرسن.» من بتر قیزاردیم، بوزاردیم اؤزو- اؤزومه دئییردیم: اللهُ اکبر! گؤره‌سن بو نه ایشدی من راست گلدیم!» سونرا اؤز-اؤزومه تسکین‌لیک وئردیم: «بیه منی دئمیر. بیر آز دؤز گؤره‌ک نجور اولور. والاهی اگر منی دئسه دوروب انگین قیزدیراجاغام.» دئییردیم به، مترونون مسافرلری هامیسی منه باخیر! جوان اوغلان صؤحبتین قورتاردی، تلفونو بوکوب قویدو جیبینه. کوله‌نی چیینینده یئربه‌یئر ائله‌دی؛ بیر آز منه یاخینلاشدی، دئدی: «باغیشلایین، بیر دیقه خدمتیزده اولابیللم؟» نه آلدیم، نه ساتدیم، دئدیم: «میمون دده‌ندی!»
جوان اوغلان بیر آز ال- ایاغین ییغیشدیردی، دئدی: «والله اصلن سیزه توهین ائله‌میردیم؛ اجازه وئرین ماجرانی دئییم! منیم تلوزیوندا بیر دوستوم وار برنامه دوزلدر. برنامه‌سینه آپاریجی آختاریر. سن اگر دانیشا بیلسن لاپ او آختاران آدامسان.» تلویزیونون آدین ائشیتمک همین، بیردن گؤزلریم ایشیقلاندی. فوری یوموشالدیم، دئدیم: «منیم ایشیم ائله دانیشماقدی. به میمون ندیر؟» اوغلان دئدی: سیا، ایکی مجری‌دن استفاده ائلیجاق؛ بیری گرک میمون نقشینده دانیشسین. اول ایستیردی بیر نفره میمون پالتاری گئیدیرسین، امما سنه پالتار زاد لازیم دئییل.» بتردن حالیم توتولدو. اوغلان منیم وضعیتمی گؤرمک همین دئدی: «امما هم یاخجی پولو وار، همده فوری معروف اولارسان.» اؤزومو سایمامازلیغا ووردوم. بتر پول لازمیمایدی. گؤزو یومولو قبول ائله‌دیم. مترودان یئندیک. جوان اوغلان منی آپاردی سیانین دفترینه. سیا منی گؤرجک آز قالدی گولمکدن غش ائله‌سین. دوستونا دئدی: «چوخ عجیب‌دی! گده، بو آران قوتانی هاردان تاپیبسان؟ اشی دوز ائله بیل اصیل میمون‌دو.» اوزون توتدو منه دئدی: «باغیشلایین ها! برنامه‌نین نقشین دئییرم.»
نه باشیزی آغریدیم. منله قرارداد باغلادیلار. بیر ایکی آیدا منه ایشین یول یؤندمین اؤیرتدیلر. ایکی آیدان سونرا منی آپاردیلار ائفئر قاباغینا. من آپاریجی میمون اولدوم. برنامه توپ کیمی آچیلدی شهرده. هر یئرده هامی آپاریجی میمونون سؤزلرینه، هر زاددان چوخ قیافسینه گولوردولر. دای من کوچه- باجایا چیخاممیردیم. باشیمی گؤرن مندن امضا آلیردی، شکیل چکدیریردیلر، شاما چاغیریردیلار، هاردا بیر ییغینجاق اولوردو گلیردیلر دالیمجا، آپاریردیلار، گتیریردیلر. قوهوم اقربا منه بتر فحر ائلیردیلر. هرکسین هر هاردا ایشی واریدی بیر تلفونلا ایشین آشیریردیم. لاپ بئله گؤتوم اوسته دوشموشدوم قویماق قازانینا.
هرگون ایش یئرینده منه بیر تلیس مکتوب گلیردی. مکتوبلارین یوزه دوخسانی خانیملاردان اولوردو . بیری یازیردی: «ایرمی بئش یاشیندا قیزام؛ فوق لیسانسیمی تازا آلمیشام؛ آتامین دونیا مالیندان هئچ نه کم کسری یوخدو؛ من سنین فیکیریندن گئجه‌لر سحره‌جه یاتانمیرام. گئجه گوندوز آغلاماق پئشم اولوب.» او بیریسی یازیردی: «سنی منه الله یئتیریب. فقط سن هن دئسن هم اؤزونو هم منی ابدی خوشبخت ائلرسن.» باشقاسی یازیردی: «هرگون گلیرم تلویزیونون اداره‌سینین قاباغیندا ساعاتلار دورورام، هئچ اولماسا سنی بیر دؤنه گؤرم. من باربی‌داندا باربی‌یام . مندن گؤزلین، پوللوسون تاپانماسان. جوانلار مندن اؤتور اؤزلرین اؤلدورورلر، امما من سندن اؤتور اؤلورم .» بیر خانیم دا یازمیشدی: «واللاهی منی آلماسان اؤزومه اوت ووراجاغام»
ایندی منیم مشغولیت‌لریمدن بیری گونده ایکی ساعات خانیملارین شکیل‌لرینه باخیب، مکتوبلارین اوخوماقدی. دوغروسو اؤزوم ده مات قالمیشام ، گؤره‌سن بو قوطونون ایچینده نه وار؟ آران قوتان میمونوندا بئله خوشبخت ائلیر.