بیلمیرم مئشه اکبر ایله شیمشک‌ین شوخلوغو واریدی، یوخسا آرالاریندا ناموسی بیر مسئله اولموشدو کی شیمشک اونا گؤز وئریردی ایشیق وئرمیردی.
یارپاقلارین سارالیب- سولان واقتی ایدی. یئری، گؤیو خزل آلمیشدی آغزینا. قارا بولودلار کندین سماسیندا جوولان ائدیردی. گؤی، گورهاگور گورولداییردی. کند آدامی قار- یاغیشدان، سویوقدان آماندا قالسین دئیه، ائو- ائشیگین دام- باجاسینی برکیدیردیلر. قارا قارقالار شیرین- شیرین گل- گئت‌ده ایدی‌لر. قلمه‌لرین اوستونه سانکی بیر قارا پرده چکیلمیشدی. قارقا الیندن یئر یوخ ایدی.
بئله بیر حالدا، قضادان مئشه اکبره دامدا بیر بااالاجا شیمشک توخونموشدو. اوزو اوسته یئره سریلیب، قاپ- قارا قارالمیشدی. دئدیک به نه اولدو! بیز هله اؤزوموزه گلمه‌میشدیک، مئشه اکبرین اوشاقلاری ال به ال عمی‌لری «اسدول»ون نئیسانی ایله اونو خسته‌خانایا یئتیرمیشدیلر.
یازیق باهاراجا خسته‌خانادا قالدی. بئش – اون گون بوندان قاباق خبر گلدی کی، مئشه اکبر صاباح خسته‌خانادان چیخاجاق. کند اهلی سئوینجک تؤکولدوک خسته خانایا. صلم- صلوات‌لا مئشه اکبری خسته خانادان چیخاریب، گتیردیک ائوه.
دوز ائله بیل ایندیی‌دی با! خسته‌خانانین حیطینده آغاجلار تزه گول آچمیشدیلار. نارین- نارین باهار یاغیشی یاغیردی. یاز هاواسی آدامی کئفلندیریردی. هردن‌ده بیر، گؤی گورولداییردی. ناهارا یاخین مئشه اکبر آخسایا-آخسایا خسته‌خانادان ائشیگه چیخدی. آرواد- اوشاغی‌نین سئوینجدن اوچماغا قانادی یوخ‌ایدی؛ گؤزلری گولوردو. یول اوزونو یاغیش بترله‌دی. گؤیون شاققیلتیسی دا چوخالدی. شیمشک شاخدیقجا، مئشه اکبرین آز قالیردی اؤدو آغزیندان گلسین. دیلی توتولموش کیمی ایدی. دوستلار مئشه اکبری لاغا قویوب، زارافاتجاسینا گولوردولر. آذان‌دان بیر ساعات قاباق، هله قاش قارالمامیشدی. مئشه اکبرگیلین قاپیلارینا یئتیشدیک. بویوک اوغلو «ضرغام» قوربانلیق حاضیرلامیشدی. یاغلی، یئکه، بوینوزلو بیر قوچ ایدی.
مئشه اکبر ماشیندان یئنمک همان «قولو قصاب» بوینوزلو قوچون آرخاسینی یئره ووروب، بیر آندا باشینی بدنیندن آییردی. هله اؤپوش- گؤروش قورتارمامیشدی، مئشه اکبر آستانادان ایچری گیرمه‌میشدی، گؤی بتردن بیر نعره چکیب، گورولداماغا باشلادی. قلینج توخونماسیندان اود قالخان کیمی، بیر گؤز قیرپیمیندا شیمشک شاخدی. بیرده باخیب گؤردوک مئشه اکبر یئره سریلیب. سن دئمه ائله شیمشک‌ین ایلک چاخیشی مئشه‌اکبره آمان وئرمه‌ییب، یئنی‌دن اونو ووروبدو. آرواد- اوشاغین ناله- شیونی ایچینده واختی فوتا وئرمه‌دن مئشه اکبری خسته‌خانادان گتیردیگیمیز همن نئیسان‌لا، اونو یئنی‌دن خسته خانایا قایتاردیق. آنجاق مئشه اکبر بو دفعه جان قورتارا بیلمه‌دی. بئش اون گون چکمه‌دی الی دونیادان اوزولدو.
خرداد آیی‌نین ایگیرمی اوچو ایدی. مئشه اکبری تورپاغا باسدیرماق اوچون کنده گتیردیک. اونون شانسیندان، او گون ده سئللمه یاغیش یاغماق هاواسی واریدی. جنازه‌نی پاشیرخانادان قبریستانلیغا آپارینجا، هاوانین اوزو بوزاردی. نم هاردان بیر شیمشک تاپیلدی. قیلینج کیمی شاخدی. کند آدامی قورخودان آغینا- بوزونا باخمادان تابوتی یئره آتیب، توو دابانا، پاشیرخانایا دوغرو قاچماغا باشلادی‌لار. اؤلو یئرده…، قبیرقازان قبیرده…، میللت پاشیرخانادا…، قارا قارقالار پاشیرخانانین دامیندا…، هامی شمشک‌ین قورخوسوندان یئرینده دونوب قالمیشدی‌لار. شیمشک ایسه گؤزله‌ییر مئشه اکبر ترپنسین، یا ترپتسینلر، تزه‌دن قیلینجینی چکسین، مئشه اکبرین اؤلوسونون ده آخیرینا چیخسین….
یاغیش کسمه‌ینجه کیمسه جرعت ائله‌مه‌دی جنازه‌یه یاخینلاشسین.
کند اهلی هله ده باشا دوشمه‌ییب «مئشه اکبر» ایله «شیمشک»ین آراسیندا اولان عداوت و دوشمنچیلیک نه‌دن ایره‌لی گلمیشدی! گؤره‌سن آرالاریندا ناموسی بیر مسئله اولموشدو کی، «شیمشک» اونا گوز وئریردی، ایشیق وئرمیردی؟!..
هله ده وار هرواخت یاغیش یاغسا، شیمشک شاخسا، قارقالاردان باشقا کیمسه جرعت ائله‌مز مئشه اکبرین قبرینه یاخینلاشسین…

اردیبهشت ۱۴۰۴