عرض ائله‌ییم اوغلومون بو گون بتر توپ اویناماق گؤیلونه دوشموشدو، آمما توپون پارکینگ‌دن گؤتورن، ناراحاتلیغدان آغیز بورونو اییلدی.بالامین توپو یئلسیزیدی. دئدیم:
– افروز آنان اؤلمه‌ییب کی هاوا تولومبامیزی گتیر، آنان اونا ائله یئل وورسون کی یئره وورسان یئر جیریلسین؛ بالامسان!
خیلاصه، تولومبانی گتیردی. من گوجلو گوجومله ائله یئل دولدورورام توپون قارنینا، دئییرسن بس کیمین قانین آلیرام. اوغلوم هئی دئییر:
– آنا، سن آللاه بسدیر؛ واللاه داها هاوا یئری یوخدو.
مگر من ال چکیرم! ائله زور با زوروملا یئل وورورام کی! توپ شیشدی…شیشدی…گؤزونوز پیس گون گؤرمه‌سین، بیردن بیره نارنجک کیمی پا….اااارت آچیلدی، داغیلدی؛ تیکه‌لری هر یئره سپیلدی. منیم جیریق‌ یاخام قالدی، اوغلومون الی. ظولوم- ظولوم نئجه آغلاییردی! آمما من کی افروز خانیم اولام یئنه بو «ای‌کی‌یو‌سان» بئینیم دانق ائله‌دی. بتر فلسفی نتیجه‌لره ال تاپدیم. یانی، اصولن بؤیوک اختراعلارین هامیسی کیچیک شئیلردن باشلانیر. «نیوتون» آلما توشمه‌سیندن جاذبه کشفینه یئتیشیر؛ «رایت» قارداشلاری قوشون اوچماسیندان طیاره کشفینه یئتیشیبلر و اونلارجا بئله اختراعلار….
من ده فلسفه علاقه‌لی اولدوغوما ائله بئله لاپ چوخورلارا گئدیرم. همشه و هر بیر اولایا فلسفی باخیرام. آمما او فلسفی نتیجه بویودو کی آداملار «توپ» کیمیدیلر. اونلاری گرک ظرفیتلری قده‌ر شیشیرده‌سن. چوخ شیشیرتسن توپ کیمی پارتلاییب، پَرَم- پَرَم اولارلار. البته افروزون بو زمینه‌ده تجروبه‌لری ده وار. مثلن بیر نئچه‌سین حدسیز شیشیردیب، اوندان او آدامین ظرفیتی اولماییب بئش آچیلان کیمی افروزون ائله اؤز اوزونه پارتلاییب کی قدیم برنودا ائله آچیلماز.
دئین یوخ، آی بالا سنی خیالات گؤتوروب آخی، نه امپراطوربازلیغی؟!! علم- تکنولوژی و اونونلا یاناشی ادبیات، دونیادا ائله سرعتله قاباغا گئدیرکی، آدامین باشی گیجه‌لیر. واللاه هئچ دونیادا نوبل آلانلار، آدلی اؤدول‌لر آپارانلار سن ادّعادا اولماییبلار. سن یئین پو….و – باغیشلایین بالی- یئمه‌ییبلر. نه اؤزلرین امپراطور؛ پیغمبر، امام آدلاییبلار؛ نه ده کی بو ایذینی بیرینه وئریبلر اونلاری بو کذایی لقب‌لرله آدلاسین. چونکو مُریدپرورلیک تاسوفلر دالی قالمیش فرهنگ‌لرده چوخ اولور و یئنه تاسوفلر بیزلرده…
بوردا «نیچه»نین بیر سؤزو یادیما دوشدو. دئییر:
– «آداملاردان بُت دوزلتمه‌یین. بو هم اؤزونوزه و هم اونلارا خیانت‌دیر. بیر زامان آللاه اولارلار، آمما آللاهلیق باجارمازلار؛ نهایتده سیز جانا گلیب اؤز الینیزله دوزلتدیگینیز بُت‌ا، کافر اولارسیز»….
نور قبرینه یاغسین آی کیشی، نه ده‌یرلی سؤزلر دئییبسن!
ایندی افروز داها الینین دالین داغلاییب هئچ ظرفیتسیز کیمسه‌نی آرتیق شیشیرتمییه‌جک کی سونرادا اؤز اوزونه پارتلاسین. سیز بیل مصصبوز، سیز ده هر کسه ده‌یریجه قیمت وئرین! اللاه ائله‌مه‌میش پارتلاماسین. بو پارتلاماق چوخ چتین اولورهاااا. ضررلی، هزینه‌لی…
میللتی چوخ شیشیرتمه‌یین لوطفن! داها پارتلامایینجا یئلین آلا بیلمزسیز. قادانیزی آلیم، مندن دئمک…!