بیر شانجان، بیر آسلان- (بیر یئنی کیتابا اؤتری بیر باخیش)
مرتضی مجدفر

 بو گونلر حؤرمتلی یازیچی، تدقیقاتچی و آذربایجان ادبیات و اینجه صنعت خادمی «عبدالعلی مجازی» طرفیندن، بیر محتشم کیتاب ائلیمیزه تقدیم اولموشدور. بو کیتاب تورکجه، فارسجا یازیلمیش ۶۵۰ صحیفه‌لیک بیر منوگرافی دیر. مؤلف اؤز اثرینده گونئی ماحالی‌نین فولکلور و ادبیاتینی گئنیش و اطرافلی آیدینلادیر. او آنا یوردو «شانجان» کندینه اولان علاقه‌نی، بو کیتابین آدلانماسیندا دا اونوتمور و کیتابی نین آدینی « شانجان (فولکلور و ادبیات)- بر اساس مونوگرافی منطقۀ گونئی» قویور. دئمک دوز دور کی کیتاب عمومیتله گونئی ماحالینا عایید دیر، آنجاق یازیچی نین شانجانلی اولدوغونا گؤره، کیتابین بیر چوخ صحیفه‌لری شانجان حاققیندا دیر.

کیتابدا گونئی ماحالی حاققیندا هر نه‌یی گؤرمک و اوخوماق ممکن دور. ایللر بویو ادبی مجلسلرده آسلان آدی ایله اؤزونو تانیتدیران و حؤرمته لاییق قوجامان تدقیقاتچی، یازیچی و شاعریمیز عبدالعلی مجازی، بو کیتابدا شانجانین آدینی دیللره سالیب، گؤیلره قاوزاییب و سسلندیرمیشدی، دئمک ایندی هامی گونئی‌لیلر، بیرلیکده دئیه بیلرلر:« بیر شانجان، بیر آسلان!»

بو کیتاب فولکلور و ادبیات حاققیندا ایشله‌ینلره بیر اؤرنگ اولا بیلر. مؤلف، کیتابینی اون ایکی بؤلومه تقسیم ائدیب‌دیر. بؤلوملردن قاباق دا نئچه مقدمه‌نی و ایضاحی گؤروروک. دکتر حسین محمدزاده صدیق. ح.م. گونئیلی، رحیم کاویان مقدمه یازانلارین بیر نئچه‌سی دیرلر. سونرا اون ایکی بؤلوم بئله بؤلونور:

۱. گونئی منطقه‌سیندن جغرافی و اقتصادی بیر تحقیق.

۲. آذربایجان، گونئی و شانجان فولکلوروندان اؤرنک. بو بؤلوم چوخ اطرافلی دیر و بوتون فولکلور و دب‌لریمیزی آراشدیریر و نمونه‌لر وئریر.

۳. شانجانین اجتماعی و طبیعی جغرافیاسیندان بیر تحقیق. بو بؤلومده، مؤلف شانجانین وجه تسمیه‌سی، کوچه‌لری، آبیده‌لری، یئر آدلاری، آغاجلاری، عمومی ایشلری و پئشه‌لری، ائل طبابتی، ساخلامالاری، اؤلچولری، هفته بازار گونلری و… حاقدا، فارسجا- تورکجه مقاله‌لرده بیر چوخ معلومات وئریر. بو بؤلوم، کیتابین دؤرددن بیرینی تشکیل ائدیر.

۴. شانجان و شانجانلی‌لارا اختصاص وئریلن شعرلر. بو بؤلومده شاعرین اؤز یئرلیلرینه سؤیله‌دیگی شعرلرله اوز- اوزه دوروروق.

۵. مؤلفین عمومی شعرلری.

۶. دوستلارلا دانیشیقلار. بو بؤلومده شاعرین مشاعره‌لری وئریلمیشدیر.

۷. گونئی ادبیات تاریخیندن اؤرنک. مؤلفین دگرلی ایشلریندن بیری، بو بؤلوم دور. بورادا او گونئی ماحالی‌نین قدرتلی یازیچی، شاعر و محقق‌لری او جمله‌دن پروفسور زهتابی، عاشیق قشم، عبدالکریم منظوری خامنه، پروفسور مبارز علیزاده، حسین محمدخانی، رحیم کاویان، عاشیق احد ملکی علیشاه و… ترجمه حاللاری و اثرلریندن نمونه لر وئریر.

۸. شانجانین معاصر هنر وادبیات تاریخیندن نمونه. بو بؤلومده، مؤلف اؤز کندینده بویا- باشا چاتان بیر چوخ چاغداش ادبیات و اینجه صنعت خادملری و فعال‌لاری حاققیندا معلومات وئریر و اونلارین ایشلریندن نمونه‌لر گتیریر.

۹. غمنامه. بو بؤلومده، عبدالعلی مجازینی، شاعرلیک پالتاریندا گؤروروک. او بورادا اؤلوب، آرامیزدان کؤچن شاعر- یازیچی‌لار، هم‌ده اونلا گزیب – دولاشان وطنداشلارین اؤلومونده دئدیگی شعرلردن نمونه‌لر و محرم عزادارلیغی حاققیندا ایضاح‌لار وئریر. بیر ده بیر چوخ باشقا شاعرلرین غملی شعرلریندن اؤرنگ‌لر گؤستریر.

۱۰. منابع و ماخذ.

۱۱. آدلار (فهرست اعلام)

۱۲. شکیل‌لر.

بو کیتاب مین نسخه‌ده، تهرانداکی اندیشه‌نو انتشاراتی توسطیله، اون‌بئش‌مین تومن قیمتله بوراخیلمیشدیر.  کیتابی اَلده ائتمک اوچون ۶۶۴۲۷۳۷۱-۰۲۱ و ۰۹۱۲۳۸۷۵۹۰۶ نمره‌لری ایله تماس توتماق اولار.

آسلان شعر آدی ایله تانینان عبدالعلی مجازی‌نین بو کیتابی، اوخومالی، ورق وورمالی و گزمه‌لی بیر کیتاب دیر. بو کیتاب دوز دورکی قالین‌دیر، آنجاق منه قالان دا اولاجاقدیر. آذربایجانیمیزین دؤرد بیر یانیندا یاشایان هوسکارلار، اؤز اوره‌ک سؤزلرینی بیریئره ییغیب، دیگر آذربایجانلی‌لارا چاتدیرماقدا، مجازی‌نین کیتابینی اوخویوب، اوندان اؤرنک‌لر آلا بیلرلر.

ایکی ایل سونرا، عبدالعلی مجازی ۸۰ یاشیندا اولاجاقدیر. من ایکی ایل قاباقدان، اونون ۸۰ ایللیگینی آلقیشلاییرام و اومید ائدیرم او ، ایللر بویو یاشاسین و یئنه ده یازیب- یاراتسین.