آجی‌یا چئوریلن شیرین خاطیره‌لریم
مسعود آذر
سئویملی سعیده‌نین عزیز خاطیره‌سینه
لچه‌یی حیات رنگلی، قوجاغی آرزو دولو،
پاییز آچان چیچه‌ییم، بیر باهار گونو سولدو.
سیندی قولوم- بوداغیم، سؤندو یانار اوجاغیم،
گولوم دوشن تورپاغا گؤزلریم بولاغ اولدو.
باکی‌یا گله‌لی
شیرین خاطیره‌لریم آجیدی؛
داها باکی‌یا گلمک ایسته‌میرم،
داها باکینی گؤرمک ایسته‌میرم،
دوغروسو، سنسیز
سنسیزلیگی اینانماق ایسته‌مزدیم.
باکی‌دا،
اسگی خاطیره‌لری یاشاییم دئیه؛
بیر باش گئتدیم “کارگوووا”یا،
دولاندیغیمیز آنلاری
یئنی‌دن یاشادیم.
اوردا
دوداقلارینا روژ ووران قیزلا دا راستلاشدیم،
چتیرلی قادین‌لا دا،
بو دؤنه دونوخوب، قالمیشدی قادین!،
سانکی-
قیزلار اونا ساریشیب شکیل چکنده
حرارتلی فیگورلانان قادین دئییلدی او.
سویوق- سویوق دایانمیشدی!
بلکه،
اودا آجی‌یان خاطیره‌لرینده دونموشدو!
عطرینی دویماق رؤیاسی ایله
ساحیله دوغرو یؤنه‌لیرم؛
بوشالیبدیر عطریندن ساحیل،
یالنیز
نئفت قوخوسو اسیر رؤیالاریما.
گؤزلریم اؤنونده
سویوقدان دونموش بیر بالیقچی هئیکلی دورو
و بیر ده
تیلوووندان آسیلمیش
نئفت بویالی قارا بیر بوز پارچاسی…
هر یئر سویوق،
هر یئر قارا.
قارالیب خاطیره‌لریمده‌کی باکی دا.
مزار داشین دا قارادی-
شه‌وه ساچلارین کیمی،
قارالار ایچینده آختاریرام او شن گونلری.
نه حاییف کی
نه او گونلر یاشاییر
نه‌ده او شنلیک‌لر.
یالنیز قارالیق یاغیر گونلریمیزه
و سویوقلوق میدان اوخویور بیزه…
باکی‌یا گله‌لی
شیرین خاطیره‌لریم آجیدی؛
قارانلیق‌لار ایسلاتدی دویغولاریمی
و گؤزلرینین قاراسیندان
اوره‌ییمه دامدی
ییر قیزجیغازین بیاض گولوشلری.
نه بیلیم
بلکه قایتاردی منی باکی‌یا
او بیاض گولوش‌لر هر یاز!
بلکه قایتاردی منی
شیرین خاطیره‌لریمه او قیزجیغاز!
یاز- ۹۴
