۸ مارت؛ دونیا قادین گونو موبارک
قیسا شعرلر (۱۲)
فریبا مرتضایی
(۱)
گئدیرسن …
نئیله‌ییم ؛
ال تَرپَدیم آرخاندان
الیم گلمیر آخی!
ییخیلان اوره‌ییمدن کئچیرسن
ائوی تیکیلمیش!
(۲)
سئومک
ائولی اینسانلارین سوچو دئییل
بلکه ده
بوشلوغودور دولو اوره‌کلرین..
سانمایین اوره‌ییم دولودور
ساده‌جه ائویم قالابالیقدیر!
دردیم ده بودور.
(۳)
بو گون-
سلام وئردیکلریم
صاباح-
اوز چئویردیلر مندن
دایان
سن ده هرکسلشمه!
(۴)
سون باهاری سئویرم،
آمما قیش گلسین!
قیشدا، بورنومون اوجو بئله قیزارار –
اوتانارام!
آمما سندن نه گیزلین؛
بو صحنه‌نی یاشاماق ایسته‌رم
سنینله قارلارین اوستونده یئریییم
یاواش-یاواش، ال-اله
بیردن دؤنوب اوزومه باخاسان
من اوتانام، سن گوله‌سن
سونرا بورنومون اوجون توتوب سیخاسان
اوره ییم دؤزمور…
گل ائویمیزه دؤنک، سن دونارسان !
بو اَن گؤزل دویغو
اَن گؤزل ائوه ساری دؤنوشدور…
(۵)
بیر بولود اولایدیم
داملا- داملا دولایدیم
سسلی- سسلی یاغایدیم
سن گلن یول‌لارین
توزون, توپراغین آلایدیم…
5 پاسخ
سلام عزیز خانیم مرتضایی ۸ مارت/ بین‌الخالق قادین بایرامینیز موبارک اولسون.
ائلمین مؤحترم و مئهربان شاعیره سی عزیز خانیم مرتضایی۸ مارت؛ دونیا قادین گونون تبریک دئییرم سیزه گؤزل گونلر آرزو ائدیرم
سایین فریبا خانیمدان ان دیرلی، اورک اوخشایان شئعیرلر اوخودوم. ساغ قال
سینلار.
سلام .
آچیقلاما اوچون سونسوز تشکورلر وار اولون .
آچیقلاما:
خانم فریبا مرتضایی‌نین قیسا شعرلرینین ۱۲ینجی حصه‌سیله برابر تاسفله سئویملی شاعریمیز جناب کیان خیاوین‌دا “تبریزه قار یاغیر” عنوانلی بیر قیسا شعری وئریلمیشدیر کی اصلاح اولدو. بو سهو بیزیم – ایشیق سایتی‌نین- طرفیندن اوز وئرمیشدیر. بو واسیطه‌ایله حؤرمتلی کیان خیاو جنابلاریندان، ائله‌جه‌ده خانم مرتضایی‌دن عذر ایسته‌ییریک.
«ایشیق»