اذنی اولماسی …
ک. توخولسکی- چئویرن: س. حاتملوی
کوتله‌وی ایشسیزلییین قورخونج جهتلریندن بیری ده، ایشله‌مک حاقی‌نین بیر «لطف» کیمی گؤرونمه‌سی‌دیر. ساواشلاردا اولدوغو کیمی: هر کیمین کی یئمگه کره‌سی وار، سیرتیق اولور.
ایشچیلرین و حتی بئله کارمندلرین بیر آرایا گلمه حاقی گونو- گوندن اریییب و او قدر آزالمیش کی، ایش صاحیبلری ایله معاش باغلاماق اوچون آپاردیقلاری دانیشیقلاردا، اونلارین مؤوقعی گونو- گوندن ضعیفله‌دییینه گؤره، «امک حاقی» سؤزو ایش صاحیبلرینه بیر فیرتانا تهلکه‌سی آنلامیندا گلیر …
فابریکالاردا دا اتمسفر هئچ یاخشی دئییل. البته ایش صاحیبلری هر زامان اولدوغو کیمی نیققیلداییب دئییرلر: “قابلیتسیز ایشچیلری باشیمیزدان ائله‌مه‌یه ایمکانیمیز یوخدور. آخی بو گون بئله ایسته‌دیییمیز آدامی ایشدن آتا بیلمیریک کی …”
نگران اولمایین: اودا اولاجاقدیر. سونوندا داهادا آز معاش ایله ایشله‌مک، بئله ایش اؤزلویونده اینجی‌لردن و آلماسلاردان دوزه‌نیلمیش و ایشچیلرین باشینا قویولموش بیر تاج کیمی اولاجاقدیر.
“ایشدن آتدیغینیز او قاپیچی، آزی ۳۰ ایل سیزین قاپی‌نین قاباغیندا دورموشدور …” ایشچیلرین نوماینده‌سی سون زامانلاردا کافه Josty نین صاحابی‌نین گؤندردییی آداما دئمیشدیر.
کافه صاحابی‌نین گؤندردییی آدام:
– “اؤزلویونده بو آز بیر شئی دئییل. ۳۰ ایل بیر آدامین کافه Josty نین قاباغیندا قاپیچی کیمی دورماغا …”
البته او جومله‌سینی تاماملامامیشدیر. تاماملاسایدی، اوندا «اذنی اولماسی» سؤزونو ده قطعیاً دئیه‌جکدیر. یانی ” کافه Josty نین قاباغیندا قاپیچی کیمی دورماغا اذنی اولماسی …”
اونوتمایین:
معاش باغلاماق و امک حاقی اوچون آپاریلان دانیشیقلار زامانی، بیری سیزه «شرف»دن، «اخلاق»دان و «سنت لردن قاینایان وظیفه»لردن دانیشسا، بیلین کی او سیزین باشینیزا بؤرک قویماق ایسته‌ییر.
ایضاح:
کورت توخولسکی میلادی ۱۸۹۰- جی ایلده برلین شهرینده دونیایا گؤز آچمیشدیر. شاعیر، یازیچی، ژورنالیست و ادبیات تنقیدچیسی توخولسکی، جمهوریت اوچون ساواشان و ائله جه ده وایمار جمهوریتی‌نین باشاریلی ضیالیلریندن بیری اولموشدور.
معاصیر دؤرده آلمان اؤلکه‌سینده ۱۹۱۸دن ۱۹۳۳- جی ایله کیمی دوام ائده‌ن سیاسی دؤنم، وایمار (Weimar) جمهوریتی آدلانیر. بو دؤرده بیرینجی دفعه اولاراق اؤلکه ده پالامنته دایانان بیر دموکراتیک سیستم یارانمیشدیر. نوامبر انقلابی آدلانان خالق آیاقلانماسیندان سونرا، وایمار شهرینده چاغریلان بیر بؤیوک توپلانتی‌دان سونرا کی گلیشمه‌لرده، اساس قانون یازیلیب و اؤلکه، فدرال جمهوریتی اعلان ائدیلمیشدیر. آدولف هیتلرین ۱۹۳۳- جی ایلده اقتدارا گلمه سی ایله بو جمهوریتین، عؤمری سونا چاتمیشدیر.
۱۹۲۴ جی ایلدن پاریسده و ۱۹۲۹جی ایلدن سونرا سوئدده یاشایان توخولسکی، ۱۹۳۵- جی ایلده بو اؤلکه‌ده دونیایا گؤز یومموشدور. او آلماندا یاشادیغی ایللرده، یورولمادان میلیتاریزمی و دادگستری‌نین ناسیونال سوسیالیزم ایله گیزلی باغلانتیلارینی و بئله‌لیکله فاشیزمه زمین حاضیرلامانی افشا ائده‌ن ایره‌لیجی انسانلاریندان بیری اولموشدور.
ترجمه ائدیلمیش یازی ( zu dürfen) 2012- جی ایل فدرال آلماندا نشر اولونان و یازیچی‌نین ساتیریک یازیلارینی احتوا ائده‌ن کتابیندان آلینمیشدیر (Kurt Tucholsky-Das Grosse Lesebuch- Herausgegeben von Axel Ruckaberle).یازی ۲۰- جی عصرین اوللرینده آلمان اؤلکه‌سینده حاکیم اولان شرطلری لاغا قویماق اوچون یازیلیبدی. س.ح
کورت توخولسکی‌نین اثرلریندن، آشاغیداکیلار فارس دیلینه ترجمه و نشر ائدیلیبدیر:
۱۳۸۵ – بعضی‌ها هیچ‌وقت نمی‌فهمن، محمدحسین عضدانلو، نشر افراز.
۱۳۸۸ – خرده فرمایش‌های جناب ِ پتر پانتز، علی عبداللهی، نشر افراز.
۱۳۸۹ – قصر گریپسهُلم، ترجمه: محمدرضا قلیچ خانی، نشرافراز.
