nami
باشی بلالی تبریز
یعقوب نامی

سوورولدو زامانين ساماني بئله
بلالي باشينا بلالي تبريز!
كيمسه تاپيلمادي آغلايا سنه
آناسيزياشايان خالالي تبريز!

زامانلار، طوفانلار، بورانلار، قارلار
هاميسين سینديريب گوبود دووارلار
اسديرير باشيني قوجا چينارلار
اللري ديزينده قالالي تبريز!

بير زامان داغلارين عرشه اوجالميش
گونشدن باج آلميش، آي دان باج آلميش
نه‌دن گنجليگینده بئله قوجالميش
آي بنيز، لاچينلي، سونالي تبريز.

ايناملا ياشيرام گله‌جه‌يي من
چيچكلر آچيليب گوله‌جك چیمن
دوشسه‌ده باشينا هردن بير آغ دن
قارتال‌دير ياشايار يارالي تبريز.