باشی بلالی تبریز
یعقوب نامی

سوورولدو زامانین سامانی بئله
بلالی باشینا بلالی تبریز!
کیمسه تاپیلمادی آغلایا سنه
آناسیزیاشایان خالالی تبریز!

زامانلار، طوفانلار، بورانلار، قارلار
هامیسین سیندیریب گوبود دووارلار
اسدیریر باشینی قوجا چینارلار
اللری دیزینده قالالی تبریز!

بیر زامان داغلارین عرشه اوجالمیش
گونشدن باج آلمیش، آی دان باج آلمیش
نه‌دن گنجلیگینده بئله قوجالمیش
آی بنیز، لاچینلی، سونالی تبریز.

ایناملا یاشیرام گله‌جه‌یی من
چیچکلر آچیلیب گوله‌جک چیمن
دوشسه‌ده باشینا هردن بیر آغ دن
قارتال‌دیر یاشایار یارالی تبریز.