داشلار / علی جوادپور
یئرلرده بو قدر داش اولماز آخی؛
گؤیلردن یاغیرمیش نه واختسا بلکه!
بولودلار چاخناشیب داش یوکلریله،
داش، شیمشک شاخیرمیش نه واختسا بلکه!
قوشلار دیمدییینده داش داشیییرمیش،
آداملار عؤمرونو، داش یاشیییرمیش،
داش؛ داشی سیندیریب، داش؛ داشی یارمیش
داش، ائولر ییخیرمیش نه واختسا بلکه!
بورا، داغ-داش دئییل؛ داشلار داغی‌دیر،
بو داشلار تورپاغین داش یاشماغی‌دیر،
داشلار شیکسته‌دیر، داشلار آغی‌دیر
یاندیریب یاخیرمیش نه واختسا بلکه!
دئییرلر: دونیانین داش عصری اولوب،
انسانلار داشلارین اسیری اولوب،
دئملی چؤره‌ک‌لر داش‌لا یوغرولوب –
داشلاردان چیخیرمیش، نه واختسا بلکه!
داش کیمی یاتماق دا او واختدان قالیب،
باشلارا دوشمک اوچون داشلار چوخالیب،
داشلار، تکجه داش یوخ، گؤز یاشی اولوب-
اوزلردن آخیرمیش نه واختسا بلکه!
آتوما تاپشیردی داشلار دونیانی،
هله ده شوشه‌ده بو دئوین جانی،
انسان طالعینه قادانی- قانی
اؤز الی دوغورموش نه واختسا بلکه!…
یک پاسخ
یاشاسین ار اوغول، شاعیر علی جاوادچور، چاغداش ادبیاتیمیزین لنگری!!