دونيا شاعيري، ناظيم حيكمت

حسن ايلديريم

حسن ایلدیریم

«من بير اينسان،
من تورك شاعيري ناظيم حيكمت
من تپه‌دن ديرناغا اينسان،
تپه‌دن ديرناغا موباريزه، حسرت،
و اوميددن عيبارت».

دونياميزين بؤيوك شاعيري، آزادليق، صولح، عدالت و سئوگي نغمه‎كاري؛ موباريزه‎سي و صنعتي‎له اسطوره‎لشن ناظيم حيكمت, تورك خالقي‎نين دونيا مدنييتي‎نه بخش ائتدييي اؤلمز صنعت‎كاردير.

اوْنون شئعري ميللي ديرلردن مايالانـيب, ميللي بوْيالارا بوْيانسا دا, آنجاق اينسانليغين, بديعي- مدني ديرلرينه اساس‎لانير. اولو شاعيرين ياراديجيليق سوزگجيندن كئچن شخصي تجروبه‎لري, ياشانتي‎لاري عومومي‎لشميش, و بشري‎لشميش بير دونيا دويومو, دونيا  گؤرومو سوييه‎سينه يوكسلير. و يئني- يئني مضمونلار و فوْرمالاردا شئعيرلشير. پيئس‎لره, روْمانلارا, منظومه‎لره چئوريلير. اوْنون قلميندن سوزولن موختليف بيچيملي صنعت اثرلري ايلدن-ايله كئچيركن, ديلدن- ديله چئوريلير. پيئس‎لري صحنه‎لشير, روْمان و داستانلاري فيلمه چكيلير و شئعرلري ماهني‎لاشاراق، دونياميزي صنعت ايشيغينا بورويور. بئله حالدا اوْ تكجه بير خالقين دئييل,بلکه بوتون دونيانـين, بوتون اينسانليغين دوْغما شاعير اوْغلو, اوئلمز صنعتكاري‎دير.

ناظيم حيكمت «كرم كيمي» يانسا دا, آمما او كول اوْلمايـيب, بلكه ابدي بير ايشيق منبعينه دؤنوب, دونياميزين گونو- گوندن قارالماسينا باخماياراق, اوْ بو قاتي قارانليقدا داها گور, داها ايشيقلي ساچماقدادير. اوْنون صنعت يانغي‎سي اوره‎ييميزده آليشير, روحوموزون قارانليق‎لارينا ايشيق توتور، ايچ اوزوموزو نورلا، شفق‎له بزه‎يير، بيز ده ياشاماق، سئومك هوسيني داها دا آرتـيرير. ناظيمين اثرلرينده‎كي  آيدين‎لاديجي، تاثيرائديجي، جان‎وئريجي بو سئحيرلي قووّه، اوْنون ياشاديغي حياتـيندان دوْغوب تؤره‎نير. اوْنون ياشايـيشيندان قايناق‎لانـير. اوْ اؤزو اثرلري‎‎نين باش قهرماني‎دير. ناظيم زينداندان گؤندرديگي بير مكتوبوندا يازير:

«اوچ جور ياشاماق وار، بيرينجي- ياشاديغي‌نـين فرقينده بئله اوْلماماق، يعني ياشاديغينـي، ياشاماق دئييلن مفهومو بوتون عظمتيله درك ائتمه‌دن ياشاماق، يعني اينسان‌لارين بؤيوك اكثرييتي كيمي … ايكينجي‌سي-‌هارادا اوْلورسان،‌هانسي شراييط‌ده وار اوْلورسان اوْل، ياشاماق بير سعادت‌دير سنين اوچون. دوشونمك، اوْخوماق, سئومك، دؤيوشمك، گؤرمك، ائشيتمك، چاليشماق، ايشكنجه گؤرمك، نيفرت ائتمك، بير سؤزله بوتون بو مادي و معنوي شئي‌لر سعادت‌دير سنين اوچون. يعني موستقيل و آزاد ياشاماق دئييلن شئي نه گؤزل‌دير. بونو هرآن و هر شراييط‌ده درك ائده‌سن. اوچونجو- ياشاماق ساده‌جه بير وظيفه‌دير سنين اوچون، بعضن اؤلمك نئجه بير وظيفه اوْلورسا، ياشاماق دا ائله بير وظيفه‌دير. وئريلميش بير سؤزو يـئرينه يـئتيرمك كيمي. منيم اوچون ياشاماق مفهومو ايستر حبس‌ده اوْلوم، يا اوْلمايـيم. ايستر سئوگيليمين الي اليم‌ده آي ايشيغينـي سئير ائديم، ايستر حبس‌خانادا اوْتاغيمين تاوانـينـي, ياشاماق بير سعادت‌دير. حتّا منه ائله گلير كي، تورك ادبيياتـيندا «ياشاماق نه گؤزل شئي‌دير» دئين ايلك شاعير بنده‌نيزدير».

ناظيم دوْغرودان دا دئديگي كيمي، سئوه- سئوه، دؤيوشه- دؤيوشه، يارادا- يارادا ياشادي. وطني‎نين، دونيانـين قورتولوش و گؤزللشمه‎سي نامينه دؤيوشدو، آغير گونلره، زيندانلارا دؤزدو، بير اينسان كيمي ياشادي. خالقي‎نـين، اينسانليغين آغري آجي‎لاريني، حسرت و اوميدلريني اؤزونونكولشديردي، اوْنلاري ياشادي، ناظيم ميللي چرچيوه‎ده، اؤزونو محدودلاشديرمادي. اوْ اوزونو بوتون بشرييته توتدو، دونيا ادبيياتـيني، باشقا خالقلارين فوْلكلوْرونو، دريندن اؤيرندي، منيمسه‎دي. اوْنلاردان بارلاندي و اؤز ياراديجيليغيندا باجاريقلا اوْنلاردان ايستيفاده ائتدي. ناظيم صنعتي‎نين ان قاباريق خوصوصييتي، اوْنون بشري‎ليگي، اينساني‎ليگي‎دير. اوْ ميللي اوْلدوغو قدر ده، بئين‎الميلل‎دير. اوْنون اثرلري هئچ بير ميللي محدودييت تانيمير. آنجاق ناظيم شئعريني تورك خالقي‎نين ديلي، ادبيياتي حياتي ايله ائله قاينايـيب، قاريشيب كي، تورك ديليني ناظيم‎سيز و ناظيمي ده تورك ديلي‎سيز تصوّور ائتمك بئله مومكون دئييل.

ناظيم يازير:
«شئعريمين كؤكو يوردومون توْرپاغيندادير. آمما بوداق‌لارينـي بوتون توْرپاق‌لارا … اوْ توْرپاق‎لار اوستونده قورولموش مدنييت‌لره, بوتون دونياميزا اوزاتماق، ايسته‌ديم. اينسان اوْغلو‌هارادا، نه زامان و‌هانسي ديل‌ده اوْلورسا، اوْلسون، اوره‌ييمه، بئينيمه اويغون بير شئعر سؤيله‌ميش‌سه، اوْنون سؤيله‌ييشينده‌كي اوستاليغي، اينجه‌لمه‌يه اوْندان بير شئي‌لر اؤيرنمه‌يه چاليشديم، تكجه اؤز ادبيياتـيميزين دئييل، شرق، قرب ادبيياتـي‌نـين بوتون اوستادلارينـي اؤزومه اوستاد سانديم».

ناظيم حيكمت شئعري، دويغو ايله- دوشونجه‌نين بير- بيرينه توْخونماسي، بديعي تصويرلرله حيات حقيقت‌لري‌نين بير يئره قوْووشدوغو، بير- بيريني تامام‌لاديغي بديعي بير وارليق‌دير. شئعرلري‌نين تخيّول گوجو نه‎قدر گوجلو و توتارلي‌ديرسا بير اوْ قدر ده عئيني و حياتي‌دير. بو شئعرلر ساده اوْلدوقلاري حال‌دا درين‌ و اوْوسونلودورلار. اوْنلار هر اوْخونوشدا تزه گؤرونن، سؤزون حقيقي معناسيندا صنعت اثرلري‌دير. بو اثرلرده اينسان‌لا- طبيعت، تاريخ‌له- جاميعه، دونن‌له- ساباه، اوسطوره ايله- حقيقت بير- بيريني عوض ائده‌رك، سئحيرلي صنعت نومونه‌سي كيمي‌ اوْخوجونون داخيلي عالمينده يـئني‌دن جانلانماغا باشلايـير. بونلار دونيانـين سسي، نفسييندن تؤره‌نميش، اينسان قلبينده عكس- صدا دوْغورموش، سوْنرا سؤزلرده، دئييم‌لرده ده شئعرلشميش دويغو دوشونجه‌لرين، بيليك و زحمتين محصولودور.

ناظيم حيكمت چوْخ يؤنلو بير صنعتكار ايدي. اوْ سينماچي، دراماتوْرگ، يازيچي، مطبوعات‎چي، شاعير و هم ده رسسام ايدي.‌هابئله موسيقي‎ني، باشقا صنعت نؤولريني ياخشي دويان آنلايان و سئون شاعير ايدي. باجاريقلي صنعتكار، موختليف صنعت ساحه‎لرينده ديرلي اثرلر ياراديب‎دير. اوْ هر بير صنعت نؤوونون فوْرما، مضمون اؤزونه مخصوص‎لوغونو قوْرويوب ساخلاياراق, عئيني حالدا ال‎وئريشلي شراييط‎ده شئعرينده موختليف صنعت نؤولرينه منسوب اوْلان ايفاده طرزي، دئييم يؤنو، فوْرما خوصوصييت‎لريندن بهره‎لنرك، موختليف مضمونلو، رنگارنگ فوْرمالي اؤلمز شئعرلر ياراتميشدير.

ناظيمي اوْخوماق، اؤيرنمك، باشا دوشمك اؤزو ده بير سعادت‌دير. ناظيمين شئعري, شاعيرده يئني شئعر ياراتماغا و اينساندا يـئني اينسان اوْياتماغا قادير اوْلان سوْلماز و ابدي ياشار بير صنعت نومونه‌سي‌دير!

دعوت
دؤردنالا گليب اوزاق آسييادان
آغ‌دنيزه بير مايدان باشي كيمي اوزانان
بـو ممـلكت بيزيم.

بيلك‌لر قانلي، ديش‌لر كيليدلي، آياق‌لار چيلپاق
و ايپك خالي‌يا بنزه‌ين بو توْرپاق،
بو جهننم، بو جننت بيزيم.

باغلانسين يادين قاپي‌سي، آچيلماسين بير داها
يوْخ اوْلسون اينسانين، اينسانا نؤكرلييي، قوللوغو
بـو دعـوت بيــزيـم.

ياشاماق! بير آغاج كيمي تك و آزاد
و بير مئشه کيمي قارداش‌جاسينا؛
بو حسرت بيزيم!

شهر، آخشام و سن
چيريل- چيلپاق قوْينومدا سينيز
شهر، آخشام و سن
اوزومه ساچيلير آيدين‌ليغيميز
و بير ده ساچلارينـيزين قوْخوسو.
كيمين اوره‌يي‌دير چيرپينان
نفس‌لريميزين اوستوندهٍ تاپ- تاپ چيرپينان سس‌لر
سنين‌مي، شهرين‌مي، آخشامين‌مي،
يوْخسا منيم‌مي؟
آخشام‌هارادا بيتر،‌هارادان باشلانـير شهر
شهر‌هارادا بيتر، سن‌هارادان باشلانـيرسان
من‌هارادا بيتيب،‌هارادان باشلانـيرام؟

دنيزين اوستونده آلا بولوت
اوزونده گوموش گمي
ايچينده ساري باليق
ديبينده ماوي يوْسون

ساحيلده بير چيلپاق آدام
دوروب دوشونور.
بولوت‌مو اوْلوم،
گمي‌مي يوْخسا،
باليق‌مي اوْلوم،
يوْسون‌مو يوْخسا؟ …

نه اوْ، نه اوْ، نه اوْ،
دنيز اوْلمالي، اوغلوم،
بولوديلا، گمي‌سيله، باليغي‌لا، يوْسونويلا