بیز دیری‌لر
سولماز‌ جمالی

شاملارین سئیرک ایشیقلاری سارالیب قیزاریر. تهرانین ایستی‌سینین جیرلاماسیندا، گونش تام تپه‌دن شاخیب گور ایشیق تئللرینی چیلرکن اینسانلار قارا، بوْزومتول پالتارا بوکولوب یاواش _یاواش کله _کؤتورلو تورپاقلیغا آیاق باسیب آخیشیب گلیرلر. تورپاقلار، داشلار گونشین سارسیدیجی ایستیسیندن اود توتوب یانیر. ایستی یئل اینسانلارین آللاشمیش دریلریندن کئچیب ایچلرینه هوپور. چئوره‌ده سوله‌نن ایتلرین هردن_بیر هوروشمه سسی اینسانلاری دیکسیندیریر. چوخلارینین قاشی چاتیق، ساققالی اوزون، آیاق اوسته تر تؤکه_تؤکه بئیین‌لرینده قایناشان آجیلیق‌لارا فیکیرلشیب گؤز یاشلارینا بوغولورلار. آرادا، سس‌سیزلیک مزارلیغی چولغاسا دا ییغینجاق، گئت_گئده چوخالیر؛ آغلاشما سسی دالغالانیردی. دوست، تانیش اؤلونون یاخینلارینا باش ساغلیغی وئریب اونلارا اوره‌ک_دیره‌ک اولورلار.
گنج‌لر کیمسه‌نی سایماییب گؤزلردن ایراق یان دؤوره‌‌ده هرله‌نیب کئفه باخیرلار. مرثیه‌چی‌لرین زویولتولو سس‌لری مزارلیغا دولموشدو.
مزارلیغا سانکی اؤلوم توزو سپیلمیشدی. ندنی بللی اولان بیر دییشمه و چئویرمه باش وئرمیشدی حیات‌لاریندا. قفیل اجل چوخلارینین حیاتینا اؤلوم قاپیلارین آچمیشدی. قانی قارالدان، کؤنلو بولاندیران، عاغلا سیغماز اولای‌لار هر زامان قفیلدن قاپینی دؤیوردو.
هر مزارین باشیندا نئچه قادین اوز_گؤزلرین جیزیب دیزلرینه دؤیورلر؛ تورپاق‌دان اووج-اووج گؤتوروب باشلارینا تؤکورلر. قادینلاردان بیری مات_مات باخیر، الی چنه‌سینده باشین بوللایاراق اوز_گؤزونو تورشودور؛ گؤزلویون چانتاسیندان چیخاریب گؤزلرینی گیزله‌دیر. بعضی‌لرینین اوز_گؤزونده چیرتیق چالاراق گؤبک آتماقلاری گؤرسه‌نیر. آدام‌لاردان نئچه‌سی قیمیشیر‌لار . قبرین باش طرفینده جاوان اوغلانین شکیلینین هر ایکی طرفینده قارا شاملار یاناراق اریییب تورپاق اوسته تؤکولور.
باجیسین‌ین یاریمجانینی اللر اوسته اوزادیب بیر اؤلو کیمی اورادان اوزاقلاشدیریرلار. اونلاری قورخو چولغامیشدی. بیر آندا حیاتلارینی قارا کؤلگه بورویوب، سئوینج‌لری، گولوشلری یوخ اولموشدو. توکلری بیز_بیز اولوردو، نفس‌لری کسیلیردی. کئچمیش گونلرین قارانلیغیندا نفس‌سیز قالیب چابالاییردی‌لار. بیر ایشیق، اومید ایشیغی، بیر اودوملوق تزه هاوا آردینجا وورنوخوردولار. اوره‌ک‌لری آلوولانیب قیغیلجیم تؤکوردو.
اؤزونو قبیر اوسته سره‌ن آناسینین قولوندان توتوب سیلکه‌له‌ییرلر؛ قادین دیکسینیب گؤزلرین آچیر؛ اوزو ساپ_ساری،گؤزلری قیپ قیرمیزی، ساچلاری داغینیق، چادراسی توز – تورپاق ایدی. باشی یونگولواری گیجه‌للنیردی. بئینینده هرله‌نن سؤزلری قیریق_قیریق دیله گتیریب خئیلک آغلاییب سیزلامیشدی.
حولقوموندا گونلرین ییغیلدیغی دردی گوجله اودور؛ چادراسینی دارتیب اوزونو اؤرتور، بوغازیندان خیریلتیلی بیر سس چیخیر:
_کئشگه دده_بابا یوردوموزا گئری دؤنموش اولسئیدوق
سسی یاواش،کؤورک و تیترک ایدی.
بیر آندا آغلاشما سسی اوجالیر، قادینلار چیغیریشاراق دیزلرینه دؤیوب ساچلارین یولورلار.
ایکی قادینین یاردیمی ایله آناسینین آریق بیله‌ییندن یاپیشیب آیاغا قالدیریرلار. قادین ییرغالانا_ییرغالانا قیزارمیش بورنونو چکه_چکه مزارلیقدان اوزاقلاشدیریلیر. دایانیر چؤنوب مزارا زیلله‌نیر؛ باخیشلاری اوْ مزاردا ایلیشیب قالیر، سانکی سون باخیشلاری‌لا مزاردا یاتان بالاسینی باغرینا باسیر. آیاقلاری او مزارلیقدا پرچیملنمیش کیمی‌ایدی.
آتاسی هامیدان اوزاق بیر کونجده آیاقلارینی قاتلاییب، باشینی سینه‌سینه اه‌ییب، گؤزوندن دوشن داملا_داملا گؤز یاشی الینده اوخودوغو خیردا کیتابین هر بیر کلمه‌سین یووور. رنگی_روفو آغ_آپباق ،باتیق اووودلاری اودقونارکن داها دا باتیردی. کیشی‌لردن بیری اونا یاخینلاشیب الینی اوزادیب دیرسه‌یینه توخونور.
هر مزارین یان دؤوره‌سینده هرله‌نیب گؤزلرین مزار اوسته مئیوه‌لرله دولو سینی‌لره تیکن آداملار داواملی قوردالانیب قرارسیز باخیشلاری‌لا مراسیمین سونونو گودوردولر. پاریلدایان گؤزلر سادالاییر مئیوه‌لری.
گؤزلری‌له یان_دؤوره‌سینه نظر سالیر. الینین آرخاسی ایله آلنینا گلمیش سویوق تری سیلیر. یانیندا مورگو ووران بالاجا اوغلان اوشاغینین دوز قاباغیندا چؤمبه‌لیر؛ بؤیرونو دومسوکله‌ییر. بیرآز گئری قانریلیب مزارا نظر سالاراق پیچیلداییر: سینی‌نی توتدولار تئز توربانی گتی، افل اولما
گؤزلرین بره‌لدیر.
کیشی‌لردن نئچه‌سی ییغینجاقدان اوزاقلاشیب عئینی آندا حیرصلی_حیرصلی دانیشماغا باشلاییرلار
_یاستاما ییغیلدی؟
_بو مئیوه‌لری نه‌ینن آلیبلار؟
_شامی هانسی پولنان وئره‌جک‌لر؟
کیشی‌لردن بیری چییین‌لرینی قالدیریب ائندیریر. گرگینلیک بوروموشدو اونلاری.
مئیوه سینی‌لرین گؤتوروب پایلاماق ایسته‌ییرلر. بیر آندا گؤزله‌نیلمه‌دن زیریلتی قوپور، قیرغین دوشور، نئچه یاندان قاچاقاچ سسی دویولور،توز_تورپاق گؤیه قالخیر، سینی یه شیغیییب جومان آداملاردا قالیر شاشقین گؤزلر. سینی دئوریلیب مئیوه‌لر یئره تؤکولوب تورپاق اوسته دیغیرلانیر. آداملار کیشی، قادین اوشاق بیر_بیرینه قاریشیب چئویکلیکله بورون پره‌لری تیتره‌یرک مئیوه‌لری توربالارینا دولدورورلار. بیر گؤز قیرپیمیندا سینی‌لر بوشالیر. اللرینده کی باشقا دولو توربالاری یئره قویوب آیاقلارینا سؤیکه‌ییرلر.
بایاقدان هوروشن ایتلر جینقیرتی‌لارینی چیخارتماییب دونوخورلار.
موتورو گازلاییر. آرخایینچیلیقلا توربالاری اورتالارینا قویوب قاققاناق چالیب گولورلر. مئیوه‌لردن لذتله یئیه‌رک اوردان_ بوردان دانیشا_دانیشا ماشین‌لاری، موتورلاری اؤتوب گئدیرلر‌. توربالاردان بیری زویوب یئره دوشدویو آن دالدا اوتوران کیشی تئز اه‌ییلیب توربانی توتماق ایسته‌ییر. موتورو سوره‌ن کیشی چیغیراراق آرخادا اوتوران دوستونا  باخیر، دهشتله نه‌سه دئمک ایسته‌ییر؛ بیر آندا موتور دئوریلیب گوپبولتوایله یئره چیرپیلیب تاققاتاراقلا سورونور. قارشی‌دان یئیین گلن یوک ماشینی‌لا توققوشوب تهرلری آلتیندا قالیرلار. موتور ازیلیب پارچالانیر. باشلاری ازیلمیش ایکی اینسان باشی کسیلمیش تویوق کیمی چابالاییب جان وئریردیلر. قان اییی بورونلاری دولدورور. قورخموش اینسانلارین اوره‌ک دؤیونتولری،چیغیریشمالاری قولاقلاری جینگیلده‌دیر.
اینسانلار ماشین‌لاریندان ائنیب مئیوه‌لرین سپه‌لندیی یئره جوموب چانتالارین، چادرالارین، پالتارلارینین جیبلرینی دولدورورلار…

۱۵/۰۸/۱۳۹۸

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4