اللریندن باشلاندی هرشئی/ حسین مصری

اللریندن باشلاندی هرشئی
حسین مصری

اللریندن باشلاندی هرشئی؛
سوکوت ابدی‌لیک
بیر یووا سالدی
دوداغلاریمدا.
گؤزلریم
آلیجی قوش اولدو
بیرجه توپا بولودا.
باخیشلاریم دوندو
اللرینین اوجالیغیندا.

اللریندن باشلاندی هرشئی؛
آیاقلاریم گئدیش اوچون یوخ،
دیره‌ک اولدولار
گؤوده‌می‌ساخلاماغا.
ییخیلمادیم من،
یاشادیم اؤلومو
کوچه – کوچه،
خییابان – خییابان،
ائو – ائو،
قاپی – قاپی.

اللریندن باشلاندی هرشئی؛
اووندورا بیلمه‌دی
قوش اوره‌ییم
الویداع هیچقیریقلارینی؛
یایغین بیر کوله‌‌یه وئردی
پاییزین سون گونلرینده.
هله ده گؤزلریم،
هله ده گؤزلریم
بولودا دولور
پاپراقلار تیتره‌ینده،
آغاجلار اسنده.

Check Also

قاییتماز اولدو/ بهروز دولت‌آبادی(چای اوغلو)

قاییتماز اولدو بهروز دولت‌آبادی(چای اوغلو) چوخ صفالی، چالیشقان، آزادلیق وورغونو ده‌یرلی دوستوم «سیفی»یه اتحاف. نئجه ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *