قیسا شعرلر(۲۲) / فریبا مرتضایی

قیسا شعرلر(۲۲)
فریبا مرتضایی

(۱)
اذن وئر
سنی سس‌سیز دوشونوم!
سنی دینمه‌دن دانیشیم،
باخمادان آغلاییم!
بویور
بو من
بو سس‌سیزلیگیم،
آخان گؤزلریم،
آغزیمدا یوخ اولان دیلیم!
بویور
دیلیم- دیلیم!
بودا سون دوراق؛
گل چییین- چییینه
چاره‌سیزلیگه دایاناق!

(۲)
آی منیم اوشاقلیغیم
هایاندا قالمیسان؟!
گونلرینین آغی ساچیما دوشوب
قاراسی بخت آیناما؛
باخیب- باخیب آغلامیشام.
دیزلریم گلمیر سنه؛
باری،
سن گل منه باشینا دؤندویوم!
یامان داریخمیشام…!

(۳)
سن
من
بیز –
اولمایاندا
اوره‌ییم شاخیر،
بولود تک‌هارایلانیر؛
دولو دولو گؤزلریم-
یاغیشدان اؤنجه آغلاییر.

(۴)
سون باهاردا یازدیم-
توم قارشیلیقسیز دویغولاریمی.
هارادا اولورسان اول،
فصیللره آلدیرما!
سن
منیم ایلک باهاریمسان!

(۵)
سن ده سئویرسن؛
چئویر اوزونو!
سن منیم گولومسن؛
نئجه دئییم
باغدا دئییلسن؟!

Check Also

اینتحار / سمیر کهیه‌اوغلو(عراق)

اینتحار سمیر کهیه‌اوغلو(عراق) قالخ! بیر سیقارا یاندیر کیبریت آراما اؤره‌ییمین آتاشیندان یاخ بیر نفس من ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *