قیسا شعرلر(۲۱)/ فریبا مرتضایی

قیسا شعرلر(۲۱)
فریبا مرتضایی

(۱)
بو اوزون گئجه‌ده
سنسیزلیک
منی اؤلدوره‌جک
بیر آه یوللا چیلله‌لیک
باشیما چکیب یاتیم

(۲)
چیچکلر
خزانا دوغرو آچارلار
او یاز دا کی سن یوخسان؛
یوروملا اینانمادیغیم یوخونو!

(۳)
سن یوخسان
یاناقلاریمین قیریشیندان
آجی بیر چای آخیر
بیر قندیله
آغزیمین دادین آلدادیرام
بو آجینی
شیرین-شیرین باشا چکیرم
بو منیم اوره‌ک یازیمدیر
منی شیرین چاغیر.

(۴)
اینانجیمی،
سنه اولان سئوگیمی
یاهالتدین یار!
نئجه دایانیم –
گؤزلرینین محرابینا
وفا قیلیم؟!

(۵)
سنه اولان سئوگیم
اوره‌ییمدن
بوغازیما یول آچیب؛
خیمیر – خیمیر
باخیشیما دا یول تاپیب
گؤزومده بیر دام سؤز ییغیشیب؛
گل دام اوسته!
سنه سؤیله‌میشدیم
قدملرین
گؤزوم اوسته!

(۶)
آغیردیر یالقیزلیق
نه اوره‌ییم چکیر، نه دیزلریم؛
گئدیشیمی‌ائشیت،
سس وئر!
کیم اؤز آرخاسیندان سو سپر؟!
من سپدیم؛
سنه ساری دؤندوم،
چاره‌سیزلیگیمی‌دورولاییب
اوره‌ییمین بندی
اورایا سردیم.

(۷)
قوپ
بو حیاتدان گولوم!
گل
آغاج اولمادان
اوزون- اوزون اؤلک!

(۸)
سول بیله‌ییمی‌کسیب
گؤزلریمین پرده‌سینی
اینتیظار چکن یوللارینا تیکه‌جه‌یم؛
آی نه گؤزه‌ل!
اؤزوم کسیب،
اؤزوم بیچه‌جه‌یم ،
زامانسیز , حئسابسیز سئوه‌جه‌یم
بیر ساعات نه‌دیر کی….

(۹)
بؤیوک سئوگی‌لر
کیچیک ائولرده یاشانار؛
گول باخیشلار
تورپاقلی آستانالارا تیکیلر؛
آددیملارینا قوربان اولوم
گل گوروشک!
ایکی اوتاق بیر دهلیز یئتر،
گؤی‌ده‌لن ده نه گزیرسن؟!

(۱۰)
گؤزلریمین پرده‌سی
باشینداکی یایلیقدان‌دیر؛
ساچینین بیر تئلینیه باخماق اوچون
ایپک یولون توتموشام.

Check Also

«هاشیم ترلان»ین ایتگیسینین اوچونجو ایل دؤنومو(اؤزه‌ل سسلی صحیفه- دینله‌یین!)

«هاشیم ترلان»ین ایتگیسینین اوچونجو ایل دؤنومو(اؤزه‌ل سسلی صحیفه) آبان آیی‌نین ۲۵ ادبی جمعیتیمیزده میللی و ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *