«اَکیز تایی»نین تورشمزه‌لری (15)
آی قارداش! منیم جدّیمین سو دا الی یوخدی؟
چئویرن: رقیه کبیری
ترجمه: رقیه کبیری
رقیه کبیری
00:00
00:00

دئدیم بس اینترنتین شوخلوغو توتوب. منی ایشیق سایتینین یئرینه آیری بیر مجازخانایا آزدیریب.
امما – ایشیق، آذربایجان ادبیاتی و اینجه صنعت سایتی- باشلیغینی گؤردویومده، دوغرو آدرسه باغلاندیغیمی بیلدیم. گؤزونوز همیشه خوش گون گؤرسون. گؤردویومه اینانماق بیر آزجا چتین ایش ایدی. شکیللر دالبادال دَییشیلیردی. فریبا «خدی» ایله گئدیردی، فرانک گلیردی، فرانک «بنزریش»له گئدیردی، ملیحه گلیردی، ملیحه «اورادا تک کیشی وار»لا گئدیردی، روقییه گلیردی، روقییه «جنس دوم کدام جغرافیا»یلا گئدیردی، روح‌انگیر گلیردی، روح‌انگیز «آتش بازلیق» لا گئدیردی…
قفیلدن، ۱۳۵۷ینجی ایلینده، تلویزیون اداره‌سینین تصروف گونلری یادیما دوشدو. بیردن بیره هر شئی دَییشمیشدی. هر گون گؤردویوموز، ساچلاری کوپ، ۵ سانت اوزانمیش مصنویی کیپریک‌لری ایله خانم آپاریجی، یئرینی وئرمیشدی استرس‌لی، سسی تیتره‌ین جوان بیر کیشی‌یه. بیرینجی دفعه‌ایدی تلویزیوندان بئله بیر اتفاق گؤرونوردو. ایندی دئیه‌سن روزگار ترسه دولانمیشدی. ایشیق سایتیندا بونجا قادینی بیر یئرده گؤرونجه، دئدیم بس یازیچی، شاعیر قادینلار ایشیق سایتینی تصروف ائدیبلر!!!
ندنسه بو قادینلارین شکیللرینی گلدی- گئدر حالیندا گؤردویومده ایچیم قاینادی. چکه بیلمه‌دیم. توکدن دیرناغا قیسقانجلیغا بوروندوم: «پس منیم شکیلیم هانی؟». آز قالا ایشیق سایتینین مودورونه زنگ آچیب، دئییم: « آی قارداش! منیم جدّیمین سو دا الی یوخدی؟ اکیز تایی قادین دئییل؟ یوخسا اکیز تایی‌نین یازیلارینی قادین حاقلاری، ۸ مارس اوچون لاییق بیر یازی حسابلامیسیز؟»
هر حالدا اؤزومو ساخلادیم. اما ندنسه قیسقانجلیق من ده او قدر انرژی هدره وئرمیشدی کی، آجیمدان اوره‌ییم کئچینیردی. قالخیب، اکیز تایی یازیسین یازمادان اوّل زیتون یاغی‌ایلا، ساریسی زعفران رنگینه چالار، ایکی مارکدار یومورتانی بدنه وورودوم. سونرا بیر دولو لیوان سوتول چایی دؤرد- بئش دَنه کیشمیش‌له هؤرتولده‌دیب، گیلئیلی- گیلئلی یازماغا باشلادیم. یازی قورتولاندان سونرا اؤز اؤزومه دئدیم: « من ده او چیندیر قئییش‌لرده‌نم هاااا…شکیلیم ایشیق سایتینین گلدی- گئدرلرینین ایچینده اولماسادا اولماسین، آلـلاه بو قلمی منه چوخ گؤرمه‌سین. شکیل دی داااا، بیر آن گلر، بیر آن دا گئدر…»
۹۲.۱۲.۱۶

.

اشتراک گذاری در print
چاپ
اوخوماق زامانی: < 1 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
باشقا اثرلری
«اَکیز تایی»نین تورشمزه‌لری (15)

آی قارداش! منیم جدّیمین سو دا الی یوخدی؟

رقیه کبیری
www.ishiq.net

آذربایجان ادبیات و اینجه‌صنعت سایتی