سوسری‌ایله میلچک، زهله‌می تؤکن یارادیقلاردان ساییلیر. سوسری‌دن قورخمارام، چیمچه‌شه‌رم. آیاقلاریندا بیر تُن میکرب داشیدیغی میلچک‌دن ده ایره‌نه‌رم. هله قالسین کی یاپیشقان پاییز میلچه‌یی اولسون.
“گوناه اؤلنده‌دیر، اؤلدورنده یوخ، دئمیش‌لر آتا- بابالاریمیز.” بو گونه جان بو سؤز دفعه‌لر‌جه قولاغیما توخونسایدی دا، فلسفه‌سینه فیکیر وئرمه‌میشدیم. اما دونن اینسانین باشقا اوزونو اؤزومده گؤردویومده، بو سؤزون ترسه‌سینین فلسفه‌سی منه آیدینلاشدی. حتی هیتلرین آدام یاندیران کوره‌لرینین قورولدوغونون ندن‌لرینی دونن یاخشی دوشونه بیلدیم.
آیین سون گونو اولدوغونا گؤره، دؤولت نوکرلرینین مزدلرینی هله حسابلارینا تؤکمدیکلرینه گؤره، ائودن چیخاندا اؤز- اؤزومه «یئمه‌لی گؤی، بیرده سود آلمالی‌یام» دئدیم. تره‌وز- مئیوه ساتان دوکانیندا حال- هاوام دییشدی سانکی!
او قدر دادلی مئیوه، یام- یاشیل گؤی- گؤیرتی، یاش پوسته‌نی گؤردویومده، بو گونون جاوانلاری دئمیشکن منی « جوّ توتدو». دوکان صاحیبی‌ایله دانیشا- دانیشا بیر نئچه نایلون کیسه‌نی دوزموشدوم دیجیتال تره‌زینین کنارینا. – اینانین کیسه‌لری دولدورمامیشدیم هااااا…. قوربان پایی کیمی، هر کیسه‌نین دیبینه ایکی- اوچ دَنه مئیوه آتمیشدیم.
ایش گلدی حساب- کیتابا. بانک کارتیمی چیخارتدیم. شاخ اسکناس کیمی دوکانچینین الینه وئردیم. ایکی دفعه کارتی چکدی. حسابیم پارانی دوکانچینین حسابینا بوراخمادی. بیردن بیره یادیما دوشدو کی، حسابیمدا اییرمی یئددی مین دن آرتیق پارا قالماییب. اوتانا- اوتانا دوکانچی‌یا:«پوسته قالسین، او بیری‌لری حئسابلا» دئدیم. دوکانچی ایکی آیاغین تپدی بیر باشماغا:« حاجی خانیم،آپار! آی باشی گلیب حسابلارسان» اوندان اصرار، مندن ایکراه! ایکی آیاغیمی تپدیم بیر باشماغا، اوتانجاغیمدان پؤرته- پؤرته، ایلاه- بیلاه آپارمارام، دئدیم. چهرایی رنگینده، اوزومه گولن پوسته‌لری دوکانچی‌یا قایتاراندا، اؤز- اؤزومه توختاخلیق وئردیم:«جهنمه، گوراااا، یاش پوسته یئمه‌سَخ اولمه‌ریخ کی! ساغلیخ اولوسون»
سود دن واز کئچمک اولماز. رنگ- به رنگ داوالارین زهرینی گئنه بو اینک سودویله، چین‌دن گلمیش توز سودونون قاریشیمی آلیر. اولمایاندا، معده‌مین آجیشماسینا دایانا بیلمیرم. یولومون اوستونده کی سوپرمارکتدن بیر پاکات سود آلدیغیمدان سونرا کیفیمده‌کی بئش مین پولدان اوچ مین بئش یوز تومن قالدی. سوپرچی قالان ایکی یوز اللی تومن یئرینه، همیشه‌کی کیمی بیر دَنه نانی شوکولات آتدی سود نایلونونا.
آرغین- یورغون اؤزومو ائوه سالدیم. کیسه‌لری بوشالدیب- بوشالدمامیش قولاغیمین دیبینده بیر میلچک ویزیلدادی. سایمادیم. ائله بیل میلچه‌یین توتماجاسی توتموشدو. آز قالیردی ایت میلچه‌یی کیمی گؤزومه گیرسین. نه بیلیم بلکه ده آج ایدی. آشپازخانانین پنجره‌سینی آچدیم، اوچوب، گئتسین. اوچوب گئتمک یئرینه ایکی‌لشدیلر. قولاغیمین دیبیندن، گؤزومون اؤنوندن جت کیمی ویزیلدایاراق اوچوب کئچیردیلر. دوغروسو اوچلشمه‌لریندن قورخدوم. ایکیسینین ویزیلتی‌سینا دؤزوموم یوخ‌ایدی، اوندا قالسین اوچلوک قوروب، اوچسونلار.
هله گؤی ساتان دوکانچینین اصرارلی سسی قولاغیمدایدی. پؤرتموش یاناقلاریمین حیرصی سویومامیشدی قفیلدن یادیما دوشدو کی، مین مصیبت‌ایله بیر آی قاباقدان واخت آلدیغیم قلب دوکتورونا گئتمه‌یه بئله پارام قالمامییب. اؤزومدن ده آجیقلی‌ایدیم، مزدوموزو گئجیکدیرن ایش یئریمدن ده. میلچک‌لرین ویزیلتی‌سی بیر یاندان؛ پولسوزلوغون حرصی‌ده اوسته‌لیک گلدی. بوتون آجیغیمی، اؤفکه‌می میلچک اؤلدوره‌نین دسته‌سینه ییغیب، بیر ثانیه‌جیک میز اوستونده اوتوران پاییر میلچه‌یینی ائله تاپدالادیم کی، لئشی میز اوستونه یاییلدی. اؤز ایشیمدن اورییم بولاندی. دئمک منیم ده اؤلدورمک قابلیتیم واریمیش. دئییرم گؤره‌سن بئله شقاوت‌له بیر میلچه‌یی اؤلدورن من، باشاق یارادیقلاری دا اؤلدوره بیلرمیشم؟!
۱۳۹۲.۸.۱
