سحر تئزدن یوخودان قالخماق عادتیمدی. سحرین یئلی اوزومه دَیمه‌سه، آخشاماجان اسنمه‌ییم گلَر. یئریم‌دن قالخماقدا یادیما دوشدو پست باجه‌سینه گئدیب، بیر نئچه کتاب پست ائله‌مه‌لییم. تلم- تله‌سیک گئیینیب، تاکسی‌ایله محله‌میزده‌کی پست دفترینه ساری یوللاندیم. ایللردی رادیونو اویان- بویانا گئدیب- گلنده تاکسی‌دا دینله‌یه‌رم. بو سحر رادیونون گونشی لاتین امریکادان دوغولموشدو. آنجاق قیسسا موج‌دا، یوخسا اورتا موج‌دا بیلمه‌دیم. سؤز- صحبت، وطنی ادبیاتدان دئییل، جادویی رئالیزمدن گئدیردی. لاتین آمریکانین تانینمیش یازارلارینین بیریسیندن، خولیو کورتاساردان دانیشیردی وطنی رادیو.
سایین آپاریجی جنابلاری، کورتاسارین یئنی- یئتمه یاشلاریندان بری ادبیاتدان پول قازاندیغیندان دئییردی. آپاریجی بیردن بیرده ائله شیرین – شیرین اونا کلمه حسابی پول وئرردیلر دئدی کی، قاباق صندلده اوتوران قوجا کیشی دیله گلدی:
– آلـلاه سنی آتووا چوخ گؤرمه‌سین بالا!
شوفر اونون سؤزونون آردینی توتدو:
– آلـلاه وئرنده، وئرسین بئله قوچ اوغوللار!
اورییمده دئدیم: آغ گونه چیخدین کورتاسار!
قوجا کیشی‌نین دردی دئشیلمیشدی:
– گئجه- گونوز جانیم چیخدی، اوخوتدوم. ایندی گلیب اوتوروب اوره‌ییمین باشیندا. سنین داشین دوشسون منیم اوغلومون باشینا. ائله ۱۴ یاشیندا یوللاسایدیم پول قازانماغا، ایندی اوره‌ییمین باشیندا اوتومازدی.
منیم ده قولاغیم ائله آخمیشدی آپاریجی جنابلارین سؤزونه ، بیرآن گؤردوم، تاکسی پست دفترینی اؤتوب، کئچدی.
لهله‌یه- لهله‌یه پست دفترینه یئتیشدیم. کتابلاری پاکاتا قویوب، چکی حسابی پست پولونو وئرنده، ایرانسل ساتیش رئکلامینی گؤردوم. دئدیم بورایا قدر گلمیشکن، قوی بیر ایرانسل ده من آلیم داااا. قوهوم قونشونون یانیندا قیزارماق بسدی. ایندی یئددی‌دن یئتمیشه، هامینین ایکی سیم کارتی، ایکی موبایلی وار. قوی سیم کارتی آلیم، آلـلاه موبایلین دا یئتیرر.
پست ایشچیسینین وئردییی نومره‌لری آلت- اوست ائله‌دیییم‌دن بیر نئچه دقیقه سووشدو. من هله نومره سئچه بیلمه‌میشدیم. ایشچی:
– خانیم سئچدین؟- دئدی.
اؤزومو توتوب، دئدیم:
– نه اولار یئددی مین تومن‌لیک سیم کارت اولاندا، جنس گرک اوره‌یینه یاتسین، سونرا آلاسان.
ایشچی عصبی حالدا دوروب، منه باخیردی. نومره‌لرین هئچ بیریسی اوره‌ییمه یاتمادی. سونوندا گؤزومو یومدوم. الیمی نومره‌لرین بیریسینین اوستونه قویدوم. گؤزومو آچدیغیمدا پست ایشچیسینی گؤردوم، منه باخا- باخا هویوخوب قالمیشدی. آدیمی، سوی آدیمی یازیب، امضالادیم. یئددی مین تومنی شستینن پیشخوانین اوستونه قویاندا، ایشچی:
– خانیم بارماغیوی استامپا باتیر، باس امضاوون آلتینا!- دئدی.
سیم کارتی گؤتوروب ائشییه چیخاندا، ایشچی بیرداها منی چاغیردی:
– خانیم آدرسیوی یازمامیسان آخی. ائو آدرسی، ایشین وار ، ایشیوی ده یاز، آدرسین ده!
ائو آدرسین یازدیم. ایشیمی یازیچی یازاندا، بیر دن بیره تاکسی‌دا ائشیتدیییم سؤزلر یادیما دوشدو. یازیچی سؤزونو قارالاییب، خورتدان ادبیاتینین چالیشقانییام، یازدیم.
ایشچی یئنه ده هویوخموش منه باخدی:
– خانیم اؤزوو سریمیسن یا منی؟ بو نه دی یازدین؟
– دئدین ایشیوین آدین یاز، منده یازدیم داااااا،- دئییب،
ایشچینین دئیینمه‌سینی سایمادان، ائشیه چیخدیم. بیر آز تمیز هاوا آلیم دئیه، پیادا ائوه ساری یوللاندیم. آدیملایا- آدیملایا، بئش پارایا دَیمز کلمه‌لریمی، سانجی وئریب، دوغدوغوم حکایه‌لریمی دوشونوردوم.
۹۲.۴.۲۹
