چئویرن: صدیار وظیفه (ائل‌اوغلو)
ترجمه: صدیار وظیفه (ائل‌اوغلو)
صدیار وظیفه (ائل‌اوغلو)

eloghlu
آرخادا قالان ایل‌لر
صدیار وظیفه(ائل‌اوغلو)

اونودولماز ایللرین‌ده، اونودولماز حادثه‌لری، اونودولماز گونلری اولورموش. هئچ ده بئله بلمزدیم کی، اؤتن گونلردن اوزاقلاشدیقجا، او گونلرین سئوینجینه ده – کدرینه ده، یالنیز و یالنیز آغلایا بیلرسن.

 دونیاسینی دگیشدیکده، سندن آیریلان بیر دوستون بئله قوش اولوب گئتمه‌سی، اورییندن گئتمه‌ین سیزی بیر گؤینرتی کیمی، دامارلاریندا دولان با دولان گزیشر، سیزی بیر حسرت کیمی، سنینله عؤمور بویو یاشایار. چوخ – چوخ سئودیگین بیر کیمسه دونیاسینی دگیشسه‌ده ،عؤمور بویو سنینله یاشایان بیر عزیز و دگیشیلمز وارلیقدیر.

شعیر دونیامیزا گلدیگیمدن بری ،بیر چوخ اونودولماز شاعیر و یازارلاریمیزلا یاخیندان دوستلوق ائدیب ، ادبی محفیللریمیزده اونلارلا اونودولماز آنلار  و گونلر یاشامیشام. ائله جه ده، یاشاییشیمدا اونلارلا باغلی هئچ واخت ایزی ایتمه‌ین خاطیره‌لریم و گونلریم اولوبدور .

 ایندی اللی یاشیما واردیقدا، ” آرخادا قالان ایللر  ” آدلی  کیتابیمین واراقلاریندا، او زامانلار تئز- تئز گؤروشوب یارارلاندیغیم و بیر دگرلی دوست کیمی دونیالارینی اؤیرندیگیم او اینسانلارین آدلارینی قلمه آلسام، محبتیمیزدن اوزاقلاشمیش اولارام دئیه، لیسته‌لرینی خاطیرلاماقدان واز کئچمه‌لی اولورام، بونا گؤره کی، اونلارین آدلارینا سون واراقلاردا گلن یازیلاردا تئز- تئز توش گلجه‌ییک.

 آمما، عؤمورومده بیر کره ده اولورسا اولسون ،اوزونو گؤرمه‌دیگیم دوستلاریمین آراسیندا بیر شاعیر دوستوم دا اولوب کی ،او منیم حیاتیمی شعیرله اوج- اوجا دویونلویه بیلمیش و صنعت یولاریندا ایلک بلدچیلریمدن داهادا اؤتگمی اولموشدور.

حاییف کی ،هئچ واخت اونون اؤزونو یاخیندان گؤره بیلمه‌دیم. آمما، چوخ واختلار اونون کؤیرک و شاعیرانه دویغولاریله یاشادیم. دئیه بیلرم کی، مزاریما آپاراجاغیم داهادا آغیر نیسگیللریمین بیری ده ائله گؤروشونه حسرت قالدیغیم او مؤحتشم دوستومون اؤلومودور.

 بیز اوزون ایللر بویو دوستلوق ائتدیک، آمما بیر- بیریمیزین یالنیز شکیللریله تانیش اولدوق، بو دا، یاشاییشیمدا نادر دوستلوقلاریمین بیری ایدی.

 بو آجی طالعین بیر دائمی شیرینلیگی ده وار ایدی.اینانیرام کی،حتّا اؤلوم ده بیزی بیر- بیریمیزدن آییرا بیلمز. بونا گؤره کی، بیز شاعیرانه مراجعتلریمیزله بیری-بیریمیزین دویغولارینی یاشاماغی باجاردیق. سؤزون داها دوغروسونو دئسه‌م ، بیز، بیری – بیریمیزی گؤرمه‌دن، بیر- بیریله اوست- اوسته دوشن  ایپک دویغولارین و هله ده منی یاشادان دالغین دوشونجه‌لرین قلم دوستلاری اولدوق.

من او واختلارین بیر گنج و چیلغین شاعیری اولسامدا، او مئهریبان دوست، منیم معنوی آتام اولماقلا برابر، حقیقی آتام “حاج اسماعیل” دان دا ایکی ایل بؤیوک ایدی . من چوخ گنج ایکن اونون “من صولحه سس وئریرم ” آدلی شعرینی ازبردن اوخویاردیم.( اونون من صولحه سس وئریرم شعری، ایکینجی دونیا ساواشیندان سونرا دونیانین بیر چوخ دیللرینه ترجومه اولونموشدو ،دونیا صولح جمعییتلری طرفیندن گئنیش صورتده قارشیلانمیش و سئویلن شعرلردن اولموشدور.) او، اؤلکه‌دن اؤلکه‌یه مکتوبلاشدیغیم و بعضن ده تئلفونلا قونوشا بیلدیگیم،شاعیر، چوخدان دونیاسینی دگیشن اؤلمز شاعیریمیز خسین حسین‌زاده ( حسین عارف ) ایدی.

 بوتون ادبیات عالیملرینین دئدیکلرینه گؤره، او تپه‌دن – دیرناغا قده‌ر بیر شاعیر ایدی. یارادیجیلیق ایللرینده اونا آذربایجانین دیری” صمد وورغون”و دئیه‌ن عالیملر، حسین عارف‌ین سئحیرلی صنعت دونیاسینی آراشدیردیقدا ، اونو آذربایجانین تایسیز شاعیرلریندن بیری بیلمیشلر.

اؤتن اون ایللیک‌لرده حسین عارف‌له بیرگه آرامیزدا اولان ادبی علاقه‌لری ائشیدیب– بیلن تانیشلار، بو خصوص‌دا اولان خاطیره‌لریمی یازیب درج ائتمگی مندن دؤنه- دؤنه ایسته‌میشلر. من ایسه، دوستلاریمین بو یئرلی دیلکلرینی باشقا آرخایینلیقلارا تاپشیریب، بو خصوصدا هله‌ده اؤنملی بیر یازی حاضیرلامامیشدیم. او دونیاسینی دگیشیبسه‌ده، من اونو اورگینده یاشادان میلیونلاردان بیری تک، اونون شاعیرانه دویغولاریله یاشاییر و چوخ جهتلردن حیاتی اؤزوم اوچون معنالاندیریرام.

عزیز دوستومون خاطره‌سینی عزیزله‌یرک، منی حسین عارف یارادیجیلیغینا وورغون ائدن “تبریزیم” آدلی شعیرینی، سیزه‌ده تقدیم ائدیرم. بو شعیر ۱۳۵۶ – نجی گونش ایلی بهمن آیی‌نین ۲۹دا باشلانان تبریز قیامی موناسیبتینه ایشاره‌لرله، آزادلیق بئشیگی اولان تبریزه و اوندا اوز وئرن تاریخی قهرمانلیقلاری شعیر دیلی‌له وورغولایاراق، یازیلمیشدی:

تبریزیم

نه موددتدیر گئنیش سینه‌ن

دولوب تلاشلا تبریزیم

بوغما یاریدا سسینی

باشلادین باشلا تبریزیم

×××

هاوایا باخ دان سؤکولور

گؤیدن یئره نور تؤکولور

یاز بویلانیر، گونش گولور

اویناما قیشلا، تبریزیم.

×××

آچ قولونو، قانادینی ،

باتیرما حاققین آدینی،

اؤز خیلاصکار ائولادینی،

اؤزون آلقیشلا، تبریزیم.

×××

یانما اودا دیری- دیری،

شرقین قوجا جنگاوری

پارچالا پاسلی زنجیری

ده‌بیلقه، داشلا، تبریزیم.

×××

دولا اوفوقو قولونا،

شفق چیلنسین یولونا،

میلیون قیزینا، اوغلونا،

سئوینج باغیشلا ، تبریزیم.

×××

ساوالانی چیسگین آلیب،

قارتال قایادا مات قالیب

جاوان حسین قوجالیب

یاش اؤتور یاشلا، تبریزیم.

×××

آنالارین آلنیندا تر

آیریلیق اؤلومدن بتر

ال وئریب گؤروشمک ایستر

قارداش- قارداشلا تبریزیم

×××

آپار اوره‌یین عارفی

آرخان دیره‌یین عارفی

چاغیر حسین عارفی

گلر جان باشلا ، تبریزیم.

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

آرخادا قالان ایل‌لر/ صدیار وظیفه(ائل‌اوغلو)

صدیار وظیفه (ائل‌اوغلو)
www.ishiq.net

آذربایجان ادبیات و اینجه‌صنعت سایتی

آرخادا قالان ایل‌لر/ صدیار وظیفه(ائل‌اوغلو)

صدیار وظیفه (ائل‌اوغلو)
www.ishiq.net

آذربایجان ادبیات و اینجه‌صنعت سایتی

آرخادا قالان ایل‌لر/ صدیار وظیفه(ائل‌اوغلو)

صدیار وظیفه (ائل‌اوغلو)
www.ishiq.net

آذربایجان ادبیات و اینجه‌صنعت سایتی