هر کسین ایکی واختی واردیر. یعنی هر کسین واختیندان قوللانماق بیچیمی ایستر-ایسته‌مز ایکی جور اولور. بیرینجیسی ایله‌نیب لذت آلا بیله‌جک واختلاری، ایکینجیسی جیددی ایش یاپماق اوچون چتینلیک‌له ده اولسا یئترینجه امک وئریب نه‌لرسه ائتدییی ائیلم یا دا فیکیر اوزه‌رینه ائتدییی هر شئی.
مکتب، داها یوخاری قاتمانلاردا اؤیره‌نیم یا ائییتیم، یا دا گلیردن اؤترو گؤردویو ایشی چیخساق، بللی بیر سورج یا دا سوره‌دن سونرا (بو آدامین اؤیرنجی یا ایشچی اولماسینا گؤره ده‌ییشیر البت) اؤزونه قالان بوتؤو واخت، باشدا سؤیله‌دیییم اوزه‌ره یا ایلنجه و لذت کیمی ایشلره، دویغولارا، قایغیلارا صرف اولور یا دا کی بیلدیییمیز داها جیددی، بئیین‌سی، زور امک ایسته‌ین چتین بیلدیییمیز ائیلم یا اولقولار اوزه‌رینده کئچیریلیر. بو، ایکینجیسینی، یعنی زور و چتین بیلدیییمیز گئنل آنلامدا دئییرم ایشلر، اینساندان اینسانا چتینلیک باخیمیندان دئییرم بلکه ده‌ییشکن اولا بیله.
اؤرنک وئریرم: کیتاب اوخوماق، هانسی‌سا تیکینتینین ایلکین تیکی ائتودلارینی کاغیذ اوزه‌رینده چالیشماق، جیددی رسم یاپیتی اوزه‌رینده رنگلرله فیرچالارلا ایش یاپماق، یا دا آتیرام، هانسی‌سا تئاتر اثری‌نین نئجه پیئسلشمه‌سینی چالیشمالار گئرچکدن چوخ چتین ایشلردیرلر؛ آنجاق کیمسه بونو بیراز یا دا بایا اؤزونده آسانلاشدیرمیش اولا بیلر. بو، باشقا مسئله‌دیر.
آنجاق سؤزوم اودور کی، اینسان اوغلو بو جیددی ایشلری یاپماق اوچون ده بللی سوره ایلنجه‌لی ایشلر یاپمالی‌دیر. گؤوده روحی ایله برابر بللی سوره یاتمادان بیر ایش گؤره بیلمه‌دییی کیمی، ائله او اوزانتی‌دا بللی سوره بوش ایشلر ائتمه‌دن بدنی روح ایله بیرگه جیددی ایش یاپاجاق کاپاسیته‌یه گلمیر. هردن دئییریک کی، واختیمی لاپ بوشوبوشونا خرجله‌دیم. اصلینده بئله دئییل؛ هر کسین اؤزو بیلدییی چتین ائیلملی یا بئیین‌سی یا دا هر نه ائده بیلمه‌سی اوچون بیلدیییمیز کئچیردییی او بوش واختلار اونا عیلاج(درمان) کیمی گلیر. گؤوده‌نی ابچ-دیش چتین ایش یاپماغا حاضیر ائدیر. بونون بیلینجینه واردیقدان سونرا آرتیق گؤوده‌نیزی ده روحونوزو دا دوشونور اولورسونوز. بعضن هر ایکیسینین گؤیلونو آلماق اوچون تپ-تزه قیزیل یا دا یئشیل رنگلی بیر چای دمله‌ییب جانیزا سونورسونوز. یا دا قهوه‌چی‌سینیزسه هر کسین هله فرقینه وارمادیغی بیر یؤنتمله بول کؤپوکلوسوندن جانیزا قوللوق ائدیب اونو واختلی-واخت‌سیز اؤدوللندیریرسینیز. بونلار هر کسه چوخ ساده گله بیله بلکه؛ آنجاق بیز بیلمه‌یه‌رک بونون آکسینی بیر عؤمور بیر هئچ اوغرونا غرورلا یاپدیق، حالا دا چوخوموز یاپماقدادیر نه یازیق. گئرچکدن ده عؤمور اینسانا وئریلمیش ان بؤیوک و دیرلی اؤدولدور. شاعیر آتا‌اول بهرام‌اوغلو سؤز قونوموز باره‌ده نه گؤزل دئمیش:
یاشادیقلاریمدان اؤیرندیییم بیر شئی وار:
یاشادین‌می، دوْیارجاسینا یاشایاجاق‌سان بیر شئیی
سئوگیلین یورغون قالمالی اؤپولمک‌دن
سن یورغون دوشمه‌لی‌سن قوخلاماق‌دان بیر چیچه‌یی
اینسان ساعاتلارجا باخا بیلر گؤی اوزونه
دنیزه ساعاتلارجا باخا بیلر، بیر قوشا، بیر اوشاغا
یاشاماق یئر اوزونده، اونون‌لا قاریشماق‌دیر
قوپماز کؤکلر سالماق‌دیر اورایا
قوجاقلادین می برک-برک قوجاق‌لایاجاق‌سان آرخاداشینی
دؤیوشه تام عضله‌نله، گؤودنله، حیرصین‌له گیره‌جک‌سن
و اوزاندین می بیر کز سیم‌سیجاق قوملارا
بیر قوم دانه‌سی کیمی، بیر یارپاق کیمی،
بیر داش کیمی دینله‌نه‌جک‌سن
اینسان بوتون گؤزل موزیک‌لری دینلمه‌لی ائده‌بیلدییی قدر
هم ده تام من‌لییی سسلرله هاوالارلا دولارجاسینا
اینسان بالیق کیمی دالمالی ایچینه حیاتین
ییر قایادان زومرود بیر دنیزه دالارجاسینا
اوزاق اؤلکه‌لر چکمه‌لی سنی، تانیمادیغین انسانلار
بوتون کیتابلاری اوخوماق، بوتون حیاتلاری تانیماق
آرزوسویلا یانمالی‌سان
دَییشمه‌مه‌لی‌سن هئچ بیر شئی‌له بیر بارداق سو ایچمه‌نین سعادتینی
فقط نه‌قده‌ر سئوینج وارسا یاشاماق اؤزلمی‌یله
دولمالی‌سان
و قده‌ری ده یاشامالی‌سان، ناموسلا، بوتون منلییینله
چونکو آجی‌لار دا، سئوینجلر کیمی یئتیشکین ائدیر اینسانی
قانین قاریشمالی حیاتین بؤیوک دولاشیمینا
دولاشمالی داماریندا حیاتین سون‌سوز تازه قانی
یاشادیقلاریمدان اؤیرندیییم بیر شئی وار:
یاشادین می بؤیوک یاشایاجاق‌سان،
ایرماقلارا، گؤیه، بوتون وارلیغا قاریشاجاق‌سان
چونکو عؤمور دئدیییمیز شئی
حیاتا سونولموش بیر ارمغان‌دیر
و حیات، سونولموش بیر ارمغان‌دیر اینسانا
ایسته‌دیم شعردن بیر پارچا گتیرم آنجاق او قدر ده‌یرلی و گؤزل ایدی کی، هانکیسینی پوزاجاغیما قرار وئره بیلمه‌دیم یاخشی کی. بیر ده بیر گؤزل شعر اوخومانین فایداسیندان باشقا کیمه نه زیانی اولا بیلر کی!
سؤزومون جانی بو ایدی کی، باشدا سؤیله‌مه‌یه چالیشدیغیم همن ایلنجه‌لی و سرخوش بولدوغوموز ایشلرین کؤکونده جیددی و زحمت ایسته‌ین ده‌یرلی ایشلر یاتیر.
هانسی‌سا سرگی‌ده واختیمیزی لذتلی کئچیریریک‌سه، واختیله هانسی‌سا صنعتکار همن سرگینین یارانا بیلمه‌سینده بایا جیددی ایشلر گؤروب چتین واختینی خرجله‌ییبدی دئمک کی. بو گونون ایله‌نه‌جک ماجرالارینا نه واختسا ده‌یرلی کیملر جیددی امک وئریبلر دئمک کی. او اوزدن هئچ واخت ایلندییینیزه گؤره اؤزونوزو سوچلو سایمایین. همن ایلنجه آلتلری اؤز اؤنجه‌کی اؤنجول سولاله‌نیزین وئریلری‌دیر. بو اولماسا بئله گؤزه‌لیم طبیعتین جانلیلارا باغیشی‌دیر. ایسته‌دییینیز قده‌ر ایلنمه‌یه لذت آلماغا چالیشین کی، بلکه همن لذت آلتلرینین بیر چوخونون یارادیجی‌سی ائله سیز اؤزونوز اولدونوز.
