– «فیلان کس اوتوز- قیرخ ایلدی شعر یازیر. چوخ یاخشی شاعیردی.»
-« بو عزیز شاعیرین، شعرینین نئچه یاشی وار؟» سوروشورام
-« شعرینده یاشی اولارمی؟» دئییب و تعجوبله منه باخیر، سونرا گولور.
بیر زاد دئمیرم. آمما بیلیرم شعرلرینده یاشی وار؛ انسانلار کیمی، اغاج‌لار کیمی، گونش کیمی… منیم همیشه‌کی عادتیمدی. هر نه‌یین یاشینا باخیرام… بلکه «یاش مهندیسی» یارانمیشام. بیری دانیشاندا دانیشیغینین یاشینا، بیری گولنده گولوشونون یاشینا، بیری باخاندا باخیشینین یاشینا باخیرام. باخیشلارین یاشینین حیاتدا چوخ اؤنملی اولدوغونا اینانیرام. هردن انسانلارین کیتاب اوخوماقلارینین بئله یاشینی حسابلاییرام. بعضن گؤرورم بیر انسانین دانیشیغینین یاشی اؤزوندن چوخ کیچیک‌دیر. اؤزونون اللی یاشی اولسا، دانیشیغینین اون یاشی وار. بونون عکسی ده دوغرودور. بئله اولوب اون یاشیندا اوشاقدان درین بیر سؤز ائشیتمیشم. هردن بیر انسانین گولوشونون یاشی چوخ کؤرپه‌دی. او دریندن گولمور، حوزونلو گولور. هردن ده بیر انسانین گولوشونون یالان اولدوغونو سئزمک اولور. بلکه اینانمیاسیز آمما من سلاملارین دا یاشینا باخیرام، بیری ماهنی اوخویاندا، یا بیر شاعر اؤز شعرینی دیکلمه ائدنده، سسلری‌ایله دویغولارینین یاشینا دا گؤزومو زیلله‌ییرم.
شاعرلرده ده بئله‌دی. شاعیرلرین دویغولارینین، باخیشلارینین، سئچدیکلری کلمه‌لرینین بئله یاشی وار. سیزجه اوتوز ایل شعر دیین شاعرین شعرلرینین‌ده اوتوز یاشی وارمی؟ بیر شاعر بلکه اوتوز ایل شعر دییه آمما باخاندا شعرینین بئش یاشی اولا. باشقا شاعر بلکه اون ایل شعر یازا امما شعرلرینین اوتوز یاشی اولا.. یازارلارا گؤره‌ده عینن بونو دوشونورم. بو یاشا وارماق و یاشی آنلاماق نقد انلامینا گلیر. هردن یوز یاشیندا شعرلر گؤروروک. هردن مین یاشیندا شعرلر اوخویوروق… هردن‌ده ایکی یاشیندا شعر… بعضن تاسسوفله شعره اوخشار بیر یازیلاردا گؤروروک کی آدی شعردی ، آمما منجه دوغولوبدا- دوغولماییبدا. حیات‌ایله اؤلوم اراسیندا آوارا دیر. واختسیز دوغولوب. دستگاه آلتیندا قالمالیدی. بو واختیندا دوغولمایان شعر، اینانین تئز یا گئج اؤله‌جک. زور ایله، تبلیغ ایله و…. ساخلانسادا گئنه اؤله‌جک. تاسسوف بوردادی کی چوخ واخت شاعرین اؤزو شعرینین اؤلوموندن خبرسیزدی و اؤزو ایله بیر یا نئچه جنازه دولاندیریر. هردن شاعرین اطرافینداکی‌لاردا شعرین اؤلومونو گؤره گؤره چئشیدلی مقصدلرله شاعیره یالان ساتیرلار. سیزجه جنازه القیشلانارمی؟!
بعضی آنتولوژی‌لره باخساق بیر یاشیندا شعر، اللی یاشیندا شعر، یاشسیز شعر، یاشلی شعر، اؤلو شعر، دیری شعر و…هامیسی بیربیرینه قاریشیب. اوردا بوتون بو شعرلر بیر یئرده اوتوروبلار. بو آنتولوژی‌نین ضرری، خیریندن چوخ اولدوغونو دوشونورم. هله یاریم شعرلر بیر طرفه، اؤلو شعرلر، همی کیتابی همی اوخوجونو، همی ده ادبیاتی زهرله‌یه بیلرلر. بیر سؤزوده وورغولامالییام کی بیز شاعیرلرین آدینا باخمامیش شعرلرینی دیرلندیرمه‌لییک. هردن شاعیرین آدی‌نین یاشی چئشیدلی سببلر واسیطه‌سی‌ایله، قوندارما شکیلده، شعرلریندن یئکه‌دیر و بو ادبیات‌دا بیر فاجعه‌یارادا بیلر. بئله دورومدا بعضی انسانلار شعره باخماییب طرفین آدینا باخیرلار. اونچون گئرچک منتقد، شعرلرین و حتا حیکایه‌لرین و رومانلارین ، یاشلارینی بیلمک اوچون، شاعیره و یازارا دئییل ، شعرلره و یازیلارا باخمالیدی. اصلن بونلارین سوموک‌لرینه بئله باخمالیدی. بعضی شعرلرین سوموک‌لری ضعیف‌دی، بعضی‌لرینین سوموک‌لری گوجلودور. بعضی لرینین دوغولان زاماندان، سوموک اریمه‌لری وار. بعضی شعرلره بیراز واخت قویساق دورومو یاخشی اولا بیلر. گرک شاعیر بیله شعرینین سوموک‌لرینین گوجلو اولماسینا نه ائتمه‌لیدی! گرک بیله شعره اؤزل کلسیم نئجه الده ائده بیلر! سیز بیلیرسینیز شعرینیزین نئچه یاشی وار؟
◽قایناق: هنر و جامعه درگی‌سی‌نین اونونجو سایی‌سی/ چاغداش تورکجه ادبیات بؤلومو
