ایکی شعر
ثریا خلیق خیاوی
۱.
بارماقلارینین هر بیری بیر اؤلکه؛
اللریمی توتدوغون زامان
اون اؤلکه‌نین کرالیچه‌سی اولورام.
باخیرسان گؤزلریمه!
قهوه ایله زیتونون
قوووشماق آنی، شعر اولور…
ساوالان، اوره‌یی ایله
بیزدن شکیل چکیر؛
داش قارتالین
اوچماغینی حیس ائدیرسن‌می؟
منجه ساوالانین قان قروپو +O دیر،
گؤروشونه گلن بوتون سئوگیلی‌لره
حیات وئریر؛
بو قان
گئرچک سئوگی‌لرین دامارلاریندا
لاختالانماز.
بیز
داغدا نفس چکیریک
یوخسا او بیزده‌می نفس چکیر؟
بو گون ایکی داغ
ال بیر اولوبسونوز،
ساچلاریم
ایکی زیروه‌نین چییینلرینده یاشاییر.
شعرین
اللری گؤیده،
بیر اوووج اوزرلیک توتوب
آی ایشیغینا!!
۲.
اوره‌ییمه بیر تیکه دوشوب
آغریسی یوخ،
ساده‌جه رادیولوژیست دوقتور چکن شکیلده
بیر گونش گؤرونور.
بو گون شعر اوخویاندا
او قده‌ر تامسیندیم
سؤزجوکلر پاپیشدی بیر-بیرینه،
دادلی بیر تیکه اولدو
هیجاندان دوشدو اوره‌ییمه.
بو تیکه‌لره آلیشمیشام
هردن داغ شکیلینده‌دیر
هردن آغاج
هردن گونش، قوش، اولدوز، آی …
خسته دئییلم
بونو نه‌دن قبول ائتمیرسینیز دوقتور؟!
لوطفن اعتیراف ائدین…
گونشه بنزر شعر تیکه‌سی حاققیندا،
شکیلدن شکیله دوشن تیکه‌لر حاققیندا
هئچ بیر شئی بیلمیرسینیز!
چؤرک وئریرسینیز گئتمیر
سو ایچیردیرسینیز گئتمیر
داوا-درمان‌لا اریمیر.
هردن ایشیق سسی گلیر گؤزلریمدن
هردن گونش قاناد چالیر چییین‌لریمده
بو تیکه نه گئده‌ر،
نه ارییَر
اؤلدورمز
اینجیتمز
سیز منی اینجیدیرسینیز !
بیر تیکه شعر دوشوب اوره‌ییمه
مین گونش ووجودومو ساریر.
