کیتابین آدی: قاغایی جاناتان
یازار: ریچارد باخ
کؤچورن: ائلیار پولاد
صفحه سایی: ۶۴
چاپ ایلی: ۱۳۹۲
ناشر: پردیس دانش / یاشماق کیتاب ائوی
«قاغایی جاناتان» اوخودوغوم ان کیچیک رومان و چوخ درین معنالی رومانلاردان بیری اولدو. بو رومانی «بالاجا قارابالیق» حئکایه‌سی قده‌ر مفهوملی و ماراقلاندیران رومانلار سیراسیندا گؤردوم.
کیتاب یازیلان زامان(۱۹۷۰نجی ایلده) اونو چاپ ائتمه‌یه ۱۸ ناشردن ساده‌جه بیر ناشر، او دا چوخ ترددودن سونرا چاپ ائدیر، آنجاق چوخ قیسّا مدت عرضینده بیر میلیون نوسخه بو کیتابدان چاپ اولور و چوخ سرعتله دونیا دیللرینه ده چئوریلیر و یاییلیر.
ریچارد باخ «قاغایی جاناتان» رومانیندا انقلابدان و انقلاب اینسانین اؤنجه اؤزوندن باشلانماسیندان، بیرلیک و برابرلیک‌دن سؤز آچیر، نئجه قورخولاریمیزی یئنمه‌میزدن دانیشیر. نئجه کی «صمدعمی» بالاجا قارا بالیق دا بئله دئییر: «یولا دوشسک بوتون قورخولاریمیز تؤکولر.»
شهامت و آردیجیلیق‌دان یازیر، ظالیملره و ظولمی قبول ائده‌نلره قارشی چیخماق، ییخیلدیغیندا آیاغا قالخیب یئنی‌دن باشلاماق، حیاتی دوپ- دولو یاشاماق و یاشارکن اؤیرنمک و گله‌جک اوچون آماج نظرده توتماق، محدودیت‌لری آرادان قالدیرماق، آزاد دوشونجه‌لره اؤنم وئرمک: «اوچماق، بیر قاغایی‌نین ان طبیعی حقی‌دیر، آزادلیق ایسه، وارلیغین بیر پارچاسی‌دیر. بوش اینانجلار اولسون، دب‌لر اولسون، آزادلیغی محدودلاشدیران نه وارسا، قالدیریب آتماق گره‌ک.»
ازدحامدان بیر سس: «بو آزادلیغی محدودلاشدیران سورونون اؤز قانونو ایسه... اونو سؤیله قالدیریب آتمالی‌دیر‌می؟… تکجه گئرچک قانون، آزادلیغی دستکله‌ین قانوندور، باشقا قانون یوخدور،»…
«قاغایی جاناتان» رومانیندان بئله درس آلماق اولار کی سینیرلار آشیلماق اوچوندو و دونیایا گلمک فلسفه‌سی ساده‌جه یاشاییب اؤلمک دئییل، بلکه سینیرلاری آشیب و باشقالارینا نئجه تاثیر ائتمکدن عبارتدیر. نئجه کی قارا بالیق‌دا صمد عمی، یازیب: «منیم یاشاماغیم یا اؤلوموم باشقالارین یاشامیندا نه تاثیر قویاجاق» اؤنملی اولان بودور.
بو کیتاب حاقدا چوخ نظرلر و نقدلر یازیلیب و بیر نئچه‌سین اوخودوم. بو کیتاب دونیادا اوخونماسی گرکن کیتابلارین ۳ نجی سیراسیندادی. ریچارد باخ استعدادلی بیر یازار، مینیاتور رسام کیمی آز سؤزله ده‌یرلی و واختی کئچدیکجه ده‌یری آرتان بیر اثر یازماغی باجارمیش.
«ائله یانلیش باشا دوشولمه‌نین نتیجه‌سینده، سنه یا تانری دئییرلر، یا دا شیطان….»
