آزدان آز، چوخ‌دان چوخ (۳)
چئویرن: رامین جهانگیرزاده
ترجمه: رامین جهانگیرزاده
رامین جهانگیرزاده
00:00
00:00

۱۱- میسیو فوآرو

چیرکینلیکدن دانیشدین واهیمه دوشدو فالیما. فالی آچدیم میسیو فوآرو چیخدی قارشیما. میسیو فوآرو اؤزونو ثبوت ائتمک اوچون، چؤپ اوزاتدی قاریشقالارین یوواسینا. چؤپ اوزانادی، قاریشقالارین یوواسیندان چیخیب، ده‌یدی میسیو فوآرونون دالینا. «هانسیز ایدی منی بیزده‌له‌ین؟» دئدی قاریشقالارا. قاریشقالار دیلینی چیخارتدیلار دئدیلر اونا: «داش باشینا! سنی قارا قورخو باسیب، دوشوبسن بیز قارالارین جانینا. هر قارادان قارا اولماز، قارا قارایا یاراشماز!»
میسیو فوآرو قاریشقالاردان قارا قازان اوغورلاییب، قویدو باشینا، بیر آز دینگیلده‌دیب، دوشوندو. دیشلرینین دیبی دوشونجه ایله دولدو. دیلینین اوجونا گلدی دوشونجه‌لر. سونرا قاییدیب، دابانینا دوشدولر، قولاغینا گیردیلر، بورنوندان چیخیب، قاشیندا اوتوردولار. قاش آتدی اوچمادیلار، داش آتدی گؤزونو اؤز گؤزونو چیخارتدی. گؤزو چیخدی دوشدو قیچینین اوستونه، قیچینی قیچینین اوستونه قویوب، قارنینی قاشیدی. قارنیندان چیبان چیخدی، دئشدی دئشیلمه‌دی. چیرکینلیکلر قارنینا دولدو، قارنیندا اوینادیلار، اویناتدیلار بئللرینی. میسیو فوآرونون سومویونه دوشدو چیکینلیکلرین اویناماغی. اونون سومویو دوشدو. قارنینا داش باغلادی، بیر آز گولدو، بیر آز آغلادی. دونیا باشینا فیرلاندی، دونیا دایاندی او فیرلاندی گیجلدی بولود اولدو. بولودون باشینا هاوا گلدی. هامی دئدی: «خوش گلدی صفا گلدی!»…

۱۲- تانری، شیطان و شئی(پییئس)

[تانری قیچلارینی الینه آلیب، درین فیکره گئدیر. ساکیت اوتوروب، میلیون ایل بیر یئره باخیر، سونرا بیر میلیون ایلدن سونرا شیطانی چاغیریر]
تانری: -آ بالا! آ شیطان، منیم دم دسگاهیمی گتیر ایسته‌ییرم بیر شئی یارادام.
[شیطان ال آیاغینی ییغیشدیریب، تانری‌نین دم‌دسگاهین گتیریر.]
شیطان: ـ بویورون منیم آغام، جسارتدی سوروشا بیله‌رم نه یاراتماق ایسته‌ییرسیز؟!!
تانری غضبله‌نیر شیطانین گؤتونه بیر تپیک چالیب دئییر: – جهنم اول کؤپک اوغلو، اوتانمیرسان هله سوروشورسان. گؤزومون قاباغیندان ایتیل، فیکریمی جایدیرما!
[شیطان باشینی آشاغی سالیب، یولون توتوب گئدیر]
تانری: -هججی مججی لاترججی!
[لومبه لن لوت بیر شئی یارادیر، او شئیه بیر آز پیله‌ییر، شئی شئیلیکدن چیخیر، آدم اولور.]
تانری: – اده شیطان، هارا جهنم اولوبسان، گه گؤر من نه یاراتدیم؟!!
[شیطان بیردن تانری‌نین سسینی ائشیدیب، قاچا قاچا گلیر.]
شیطان: – آ کیشی بسدی قوجا واختیندا بو نه دی یارادیبسان. او دؤنه یاراتدیقلارین گؤرمه‌دین باشینا نه اویون آچدیلار؟!!
[ تانری بو دؤنه حیرصینی ایچینده بوغور، شیطانی دیله توتوب دئییر:- شیطانجیییم بو منیم بنده‌جیییمدیر، سن گرک بونا باش اَیه‌سن، اونا کؤمک ائده‌سن.
شیطان: – یوخ دای من بئزمیشم سنین الیندن، بو دؤنه سیتاییش ائتمه‌رم. واخ واخ واخ! گؤر نه ده سیر صیفتی وار.
تانری: – اده کوچوک من سنینله قوش دیلی دانیشدیم دییه‌سن عاغلین چاشدی! شپیر شوپورونو گؤتور گؤزومون قاباغیندان ایتیل!
[شیطان کیشی کیمی تانری‌نین قاباغیندا دایاندی، یئنی یاراتدیغی شئیی سیتاییش ائتمه‌دی. سونرالار تانری‌نین یاراتدیغی او شئی، تانری‌نین سؤزونو یئره سالیب، یاساق مئیوه دن یئدی، تانری‌نین غضبینه دوچار اولدو، یئره آتیلدی، قوموجو باتدی، دوقتورلار هئچ بیر چاره تاپا بیلمه دی، قوموجو باتمیش بو شئی]

۱۳- تیندیل TINDIL

… ایلین ایلک دؤرد آییندا، فارس اوشاق ادبیاتیندان ایکی نمونه اولاراق بوردا گتیریرم بلکه بعضی‌لری اؤزلرینه مخصوص بیر فیقور توتاراق داها دئمه‌یه‌لر: «بو رامین ده اؤزونو سارییب، گونده بیر کیتاب چیخاردیر؟!!»
ـ ناصر کشاورز: ۶۰ عونوان کیتاب
ـ مصطفی رحماندوست: ۲۹ عونوان کیتاب
من بیلمیردیم بیر ایلین ایچینده ۶ اوشاق شعر کیتابیمین چیخماسی بعضی‌لرینین تیندیلینا ده‌یه‌جک. بیلسه‌یدیم هئچ واخت بو کیتابلارا یاخین گئتمزدیم. بیزه بئله آداملارین تیندیلی اوشاقلاردان اؤنملی‌دیر. اوشاقلارین کیلوو نئچه دیر آخی؟!!
هر حالدا من اگر بو دوستلاریمیزین تیندیلینا ده‌یمیشم عوذر ایسته‌ییرم و بوندان بئله سؤز وئریرم کی هئچ کیتابا یاخین گئتمه‌یم، یئنه ده دئییرم اوشاقلارین کیلوو نئچه دیر آخی؟!!
سونوندا بونو دا آرتیرمالییام کی بیزیم بوتون اوشاق یازیچیلاریمیزین کیتابلاری بیر فارس شاعیرین چیخان کیتابی قدر دئییل. چیخاردانلارین دا باشینا بیر قاپاز وورون قویمایین چیخاردالار. البتده بیر زامانلار من اؤزوم آریچی ایدیم، موملاماغی یاخشیجاسینا باجاریردیم، نئینمک ایندی قوجالمیشیق بعضی لرینین آغیزلارینی موملایا بیلمیریک. بلکه سیز بیر سؤز دئه سیز، بلکه ائله اونلار حاقلیدیرلار!!

۱۴- اعصاب قورصو

دوستوم منه اعصاب قورصو آتدی، دوغروسو او بیلمیرکی بئناوا بو قورص اؤزو منیم الیمدن زارا گلیب، زیریلداییب زاریلداییر. سونرا منی آتماق ایسته ییر. بو یازیق اعصاب قورصو بونو بیلیرکی منیم کیمی‌لری بیر بوشقا سو ایله ده آتماق اولماز. هله قالمیش بو دوستوموزون اعصاب قورصونا. بیر آز بو قروصلارا باخیب اؤز ـ اؤزومه گولورم. او قدر گولورم کی اعصاب قورصو الیمده پارتلاییر، ایچینده اولان نه وارسا گؤزومه تؤکولور. گؤزلریم عصبی اولور، اؤزونو ساخلایا بیلمیر یاناقلاریمدان ساللانیب دوشور چیینیمه، سونرا ساغ قولومدان سوروشوب گلیر لاپ بارماقلاریمین اوجونا. گؤزلریم او قدر عصبی اولور کی بارماقلاریم اونون عصبی اولماغینا دؤزه بیلمیر؛ هئی بو یازیق کئیبوردون باشینا دؤیور. چاک چوک، چاک چوک، چاک ها چوک سسی اوتاغیما دولور. پنجره یه باخیرام، پنجره دن داش گلیر، داش دوشور بارماقلاریمین اوجونا، یئنه ده بارماقلاریم گؤزلریمین اوجباتیندان بو پنجره دن گلن داشلاری کئیبوردومون باشینا چیرپیر. کئیبرودومداکی حرفلر چیغیریب ـ وای ده ده باشیم یاریلدی ـ دئییرلر. ساعاتا باخیرام، زامانین قیچی قیچینا دولاشیر، سونرا قیچلاری گلیب دوشور یئنه ده منیم بارماقلاریمین اوجونا. یئنه ده بارماقلاریم زامانین قیچلارینی چیرپیر کئیبوردومداکی حرفلرین باشینا. یئنه ده حرفلر چیغیریب باشلارینی توتارکن زامانین قیچینی یامانلاییرلار. زامانین قیچلارینی قایتاریرام ساعاتین ایچینه، بیر آز دالی چکیرم، بلکه زامان هر نه یی آنلادی و باشا دوشدو کی هامارلیقدا یئرییه بیلمه ین شوخوملوقدا شیللاق آتماز.

۱۵- آغزیمیزین اییسینی

بیز دؤرد نفر ایدیک، ساریمساقلی آش ایشدیک. سونرا تاکسی ده ایلشدیک. یازیق تاکسی سوروجوسو بیزی میندیردییی اوچون پئشمان اولدو. بیز آغزیمیزین اییسینی وئرمک ایسته‌میردیک. ایش بئله گلدی. ائله بیزیم توپلوم دا بئله دیر ایش گلنده گلیر. یا گرک اییه دؤزه سن یا داکی سن ده آغزینین اییسینی وئرمه‌لیسن.

اشتراک گذاری در print
چاپ
اوخوماق زامانی: 3 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
باشقا اثرلری

آزدان آز، چوخ‌دان چوخ (۳)

رامین جهانگیرزاده
www.ishiq.net

آذربایجان ادبیات و اینجه‌صنعت سایتی